ارنايى كوميسسيانى شقو قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى نۇرلانعازى يبرايەۆ باسقارعان. كوميسسيا قۇرامىنا ق ر دەنساۋلىق ساقتاۋ مينيسترلىگىنىڭ ساراپشىلارى، اتاپ ايتقاندا، ق ر دسم قوعامدىق دەنساۋلىق ساقتاۋ باسقارماسىنىڭ باسشىسى روزا قوجاپوۆا، ينفەكسيالىق جانە پارازيتتىك اۋرۋلاردى ەپيدەميولوگيالىق مونيتورينگىلەۋ دەپارتامەنتىنىڭ ديرەكتورى مانار سماعۇل، س.د.اسفەندياروۆ ات. قازۇمۋ بالالار جۇقپالى اۋرۋلارى كافەدراسىنىڭ دوسەنتى مارينا گولوۆەنكو كىرگەن.
رەسپۋبليكالىق كوميسسيامەن قاتار، شقو دەنساۋلىق ساقتاۋ باسقارماسىنىڭ كوميسسياسى دا قۇرىلعانىن ايتا كەتكەن ءجون. وعان باسقارما باسشىسى رايفا سافيوللينوۆا جەتەكشىلىك ەتتى.
كوميسسيا جۇمىسى بارىسىندا ءۇرجار اۋداندىق ورتالىق اۋرۋحاناسىنىڭ باس دارىگەرى ج.ب.تىلەۋبەرليننىڭ ب ا ق وكىلدەرىنە بالالاردىڭ ا گەپاتيتى جۇقپاسىن جۇقتىرۋىنا قاتىستى جاڭىلىس اقپارات بەرگەنى انىقتالدى.
2018 جىلعى قاڭتار ايىنىڭ 16 كۇنىنە بەلگىلى بولعان اقپارات كەلەسىدەي – 2017 جىلعى قىركۇيەك ايى مەن 2018 جىلعى قاڭتار ايى ارالىعىندا ناۋقاسپەن قارىم-قاتىناستا بولعان 46 بالا تەكسەرىلۋدەن ءوتتى. ولاردىڭ 25ء-سى اۋداندىق اۋرۋحانانىڭ جۇقپالى اۋرۋلار بولىمشەسىنە جاتقىزىلعان. بولىمشەگە جاتقىزىلعانداردىڭ 12-دە سارى اۋىرۋ دياگنوزى راستالىپ وتىر.
سونىمەن قاتار رەسپۋبليكالىق جانە وبلىستىق كوميسسيا شولپان اۋىلىنداعى دارىگەرلىك امبۋلاتورياعا تاعى 19 ادامنىڭ مەديسينالىق كومەككە جۇگىنگەنىن انىقتادى. الايدا اۋداندىق اۋرۋحانا باسشىلىعىنىڭ ەپيدەميولوگيالىق جاعدايعا نەمقۇرايلىعى كەسىرىنەن اۋداننىڭ قوعامدىق دەنساۋلىق ساقتاۋ باسقارماسىنا امبۋلاتوريا باسشىلىعى دەرەۋ مالىمەت بەرمەگەن. سالدارىنان 19 ناۋقاس رەسمي ستاتيستيكاعا ەڭگىزىلگەي قالعان. ولاردىڭ بارلىعى دەر كەزىندە امبۋلاترويالىق دەڭگەيدە ەمدەۋدەن وتكەن. قازىرگى ۋاقىتتا ولاردىڭ دەنساۋلىعى قالىپتى جانە جانىنداعى ادامدارعا ءقاۋىپ توندىرمەيدى.
كوميسسياعا شولپان اۋىلىنى تۇرعىندارى تاراپىنان كامەلەتتىك جاسقا تولماعان بالانى ءۇرجار اۋداندىق ورتالىق اۋرۋحاناسىنا جەتكىزۋ ءۇشىن جانە دارى-دارمەك الۋ ءۇشىن اتا-اناسىنىڭ اقشا تولەگەنى جايلى شاعىم ءتۇستى.
قازىرگى ۋاقىتتا ءبىر بالانىڭ قايتىس بولۋىنا بايلانىستى قىزمەتتىك تەكسەرۋ جۇرگىزىلىپ جاتىر. ماماندار اتالمىش اۋىلداعى مارقۇم بولعان قىز بالادا گەپاتيتتىڭ ا ءتۇرى ەمەس، فۋلمينانتتى، ياعني باسقا اۋىر ءتۇرى مەن وتكىر باۋىر نەكروزى بولۋى مۇمكىن دەپ وتىر. قورتىندىسى ءىىب تەكسەرۋ امالدارىنان كەيىن جاريالانادى.
جالپى تەكسەرۋ ناتيجەسىندە اۋداندىق ورتالىق اۋرۋحانا باسشىلىعى ورەسكەل بۇزۋشىلىقتارعا جول بەرگەن: تۇرعىندارعا مەديسينالىق كومەك كورسەتۋ مەن ونىڭ ساپاسىن قاداعالاۋ نەمقۇرايلى جۇرگىزىلگەن، سانيتارلىق تالاپ ەرەجەسى ورىندالماعان، دياگنوستيكا جاساۋ مەن ەمدەۋ پروتوكولى ساقتالماعان، تىركەۋگە الۋ-ەسەپ بەرۋ قۇجاتتارى دۇرىس جۇرگىزىلمەگەن.
انىقتالعان بۇزۋشىلىقتار بويىنشا تاياۋ ارادا ءۇرجار اۋداندىق ورتالىق اۋرۋحاناسىنداعى جاۋاپتى تۇلعالارعا قاتىستى شارا قولدانىلاتىن بولادى.
ال ازىرگە جۇقپالى ا گەپاتيتىنە قاتىستى وبلىس پەن ءۇرجار اۋدانىندا جاعداي تۇراقتى، ماۋسىمدىق اۋىتقۋدىڭ ۇيعارىندى شەگىندە دەپ وتىر ماماندار. شولپان اۋلىنا كەلەر بولساق، ناۋقاستارمەن قاتىناستا بولعان 140 بالاعا جۇقپالى ا گەپاتيتىنە قارسى ەكپە جاسالعان. بارلىق ۇيلەر مەن اۋىلداعى مەكتەپكە دەزينفەكسيا جاسالىپ، اۋىز سۋدان 62 رەت سىناما الىنىپ، تازا ەكەنى انىقتالدى.
