ول الدىمەن ورداباسى اۋدانىنداعى «KazKioti» تراكتور زاۋىتىندا بولدى. وڭتۇستىك كورەيا ينجەنەرلەرىنىڭ ۇلگىسى بويىنشا تراكتور قۇراستىرىلاتىن زاۋىتتىڭ ونىمىنە سۇرانىس جوعارى. ءقازىر وسى كاسىپورىننان تراكتور الاتىن شارۋالارعا «قازاگروقارجى» قارجىلىق كومپانياسى ارقىلى نەسيە بەرۋ شارالارى قولعا الىنۋدا.
بۇل زاۋىت تولىق كۇشىنە ەنسە، جىلىنا 6 مىڭ تراكتور قۇراستىرۋعا قاۋھارلى. ءومىرزاق شوكەيەۆ كاسىپورىننىڭ جۇمىسىنا وڭ باعا بەرىپ، قاجەت بولعان جاعدايدا مەملەكەت تاراپىنان قارجىلاي قولداۋ كورسەتىلەتىنىن جەتكىزدى. مۇنداي جوبالار ەل ەكونوميكاسىنا پايدالى ەكەنىنە توقتالدى. سونداي-اق ءومىرزاق شوكەيەۆ ورداباسى اۋدانىنداعى جىلىجايلاردىڭ جۇمىسىنا دا جوعارى باعا بەردى. ۆەدومستۆو باسشىسىنا تۇركىستان وبلىسىنىڭ اكىمى جانسەيىت تۇيمەبايەۆ اۋىل شارۋاشىلىعى، سونىڭ ىشىندە جىلىجاي ءىسىن جانداندىرۋ باعىتىندا جۇمىستار جۇرگىزىلىپ جاتقانىن اتاپ ءوتتى.
ودان كەيىن ءومىرزاق شوكەيەۆ ارىس قالاسىنداعى اقدالا اۋىلدىق وكرۋگىنە كەلىپ، «جاڭا اقدالا» ءجشس-نىڭ ەگىستىك القابىن ارالاپ كوردى. بۇل كاسىپورىندا تاۋلىگىنە جوعارى ساپالى تومات جانە الما پاستاسى وندىرىلەدى. 2700 گەكتار اۋماقتى الىپ جاتقان كاسىپورىن 2009 جىلى قۇرىلعان. قازىرگى تاڭدا «جاڭا اقدالا» جشس-ىندە 48 ادام تۇراقتى جۇمىس ىستەيدى. ال، ماۋسىمدىق كەزەڭدەردە جۇمىسشىلار سانى 200-گە جەتەدى.
ءومىرزاق شوكەيەۆ تۇركىستان وبلىسىندا اۋىل شارۋاشىلىعىنا باسا ءمان بەرىلىپ، ەلگە پايدالى جوبالار جۇزەگە اسىرىلۋ كەرەكتىگىن ايتتى. ەلباسى جولداۋىندا اۋىل شارۋاشىلىعىن دامىتىپ، شەتەلگە ءونىم ساتۋ مىندەتى جۇكتەلگەنىنە توقتالدى. شارۋالارمەن جۇزدەسىپ، مەملەكەت تاراپىنان بۇل سالاعا قولداۋ جوعارى ەكەنىن اتاپ ءوتىپ، وبلىس شارۋالارىنىڭ باستامالارىنا ساتتىلىك تىلەدى.
تۇركىستان وبلىسى اكىمىنىڭ باسپا ءسوز قىزمەتى
