باعدات امىرەيەۆ تۇركىستانداعى وزگەرىستەرگە، اتقارىلىپ جاتقان جۇمىستارعا وڭ باعاسىن بەرىپ، تۇركى كەڭەسى اياسىندا ماڭىزدى باستامالاردىڭ ءبىرقاتارىن وسى شاھاردا جۇزەگە اسىرۋعا قولداۋ بولاتىنىن جەتكىزدى.
– 2021 جىلعى 31 ناۋرىزدا «تۇركىستان – تۇركى الەمىنىڭ رۋحاني استاناسى» تاقىرىبىندا تۇركىتىلدەس مەملەكەتتەردىڭ ىنتىماقتاستىق كەڭەسى ءوتىپ، «تۇركىستان دەكلاراسياسى» قابىلداندى. قازىرگى تاڭدا تۇركى كەڭەسىنە مۇشە مەملەكەتتەر اراسىندا كاسىپكەرلىكتى قولداۋ باعىتىندا ورتاق ينۆەستيسيالىق قور قۇرۋ جۇمىستارى ءجۇرىپ جاتىر، – دەگەن ول تۇركى كەڭەسى ارقىلى تۇركىستاننىڭ تاريحي-مادەني عانا ەمەس، ەكونوميكالىق ءرولىن ارتتىرۋ باعىتىندا دا يگى ىستەردى تالقىلاۋعا دايىن ەكەنىن اتاپ ءوتتى.
ءومىرزاق شوكەيەۆ ينۆەستيسيالىق قوردىڭ رەسمي شتاب-پاتەرىن تۇركىستاننان اشۋ جونىندە ۇسىنىس ءبىلدىردى. سونىمەن بىرگە تۇركى كەڭەسى ۇيىمى اياسىندا تۇركىستاندا ەركىن ەكونوميكالىق ايماق اشۋ ءۇشىن لوگيستيكا ماسەلەسىن شەشۋگە، تۇركى مەملەكەتتەرى كاسىپكەرلەرىنىڭ فورۋمىن تۇركىستاندا قابىلداۋعا مۇددەلى ەكەنىن جەتكىزدى.
«بىزگە تۇركىستاندى تۇركى الەمىنىڭ ورتالىعىنا اينالدىرۋ مىندەتى جۇكتەلدى. وسى رەتتە باۋىرلاس ەلدەرگە ورتاق حالىقارالىق ۇيىمداردىڭ ءبىرىنىڭ باس كەڭسەسى تۇركىستاندا ورنالاسۋى ءتيىس دەپ ەسەپتەيمىن. تۇركى كەڭەسىمەن بىرلەسىپ، اۋقىمدى جوبالاردى جۇزەگە اسىرۋعا دايىنبىز»، – دەدى وبلىس اكىمى.
