وبلىس باسشىسى بايدىبەك اۋدانىنا جۇمىس ساپارى بارىسىندا اۋدان اقساقالدارىمەن كەزدەسىپ، وزەكتى ماسەلەلەر توڭىرەگىندە پىكىر الماستى. اۋدان تۇرعىندارى سۋ قويماسىنىڭ قازىرگى جاعدايىن تەكسەرىپ، قاجەت بولسا جوندەۋ جۇمىستارىن جۇرگىزۋدى، وسىلايشا، ءقاۋىپتىڭ الدىن الۋدى جەتكىزدى. وبلىس اكىمى ستراتەگيالىق ماڭىزى بار نىسان رەسپۋبليكالىق مەنشىكتەگى مۇلىك بولعاندىقتان، مۇنداي ماڭىزدى شەشىمدەردىڭ مينيسترلىك تاراپىنان قابىلداناتىنىن ءتۇسىندىردى. اتالعان ماسەلەگە قاتىستى وبلىس تاراپىنان ۇسىنىستار جولداناتىنىن ايتتى.
«قاپشاعاي» سۋ قويماسى 1982 جىلى سالىنعان. 34 ملن. تەكشە مەتر سۋ سيادى. ءوڭىر باسشىسى كوپتى كورگەن ابىز اقساقالدارمەن جۇزدەسۋدىڭ ماڭىزدىلىعىن باسا ايتتى. كارانتين شارالارى ساقتالىپ ۇيىمداستىرىلعان وتىرىستا اۋدان اۋماعىنداعى ءبىرقاتار ۇسىنىستار ورتاعا سالىنىپ، تالقىلاندى.
– جاھاندى جاۋلاعان ىندەتتىڭ ورشۋىنەن بايلانىس ءۇزىلىپ، باسقوسۋلار توقتاتىلعانى بەلگىلى. بۇگىندە ەلىمىز بويىنشا تۇركىستان وبلىسى «جاسىل اۋماقتا» تۇر. بۇل ۇلكەن جۇمىستىڭ كورسەتكىشى. ءقازىر وزدەرىڭىزبەن كەزدەسۋدى قايتا جانداندىرىپ جاتىرمىز. ءار اۋداننان اقساقالداردى جيناپ، قانداي وڭدى جاعدايلار، قانداي كەمشىلىكتەر بولىپ جاتقانىن تالقىلاۋدامىز. ويتكەنى ءبىز ءۇشىن كەرى بايلانىستىڭ بولۋى وتە ماڭىزدى. ەل ىشىندەگى ىنتىماق پەن بىرلىكتىڭ تىزگىنى اۋىل اقساقالدارىنىڭ قولىندا تۇرعانى انىق، – دەدى وبلىس اكىمى ءوز سوزىندە.
بايدىبەك اۋدانىنىڭ اقساقالدارى ايماقتاعى الەۋمەتتىك-ەكونوميكالىق ماسەلەلەردى قوزعاپ، اقىل-كەڭەستەرىمەن ءبولىستى. اۋىز سۋ، تۇرعىن ءۇي ماسەلەلەرىن كوتەردى. اۋدان ورتالىعىندا كەزەكتە تۇرعان وتباسىلار ءۇشىن كوپقاباتتى تۇرعىن ۇيلەر تۇرعىزۋدى ۇسىندى. وبلىس باسشىسى اۋىلدى جەرلەردە كوپقاباتتى ءۇي تۇرعىزۋدىڭ قاتەلىگىن ءتۇسىندىردى.
– تۇرعىن ءۇي سالۋ ۇسىنىسىن قولدايمىن. دەگەنمەن، اۋىلدى جەرلەردە كوپقاباتتى تۇرعىن ءۇي سالۋ – قاتە. پروبلەماعا اينالار ماسەلە. كارىز جۇيەسىن جۇرگىزۋدىڭ ماشاقاتى ءبىر بولەك. كوپقاباتتى ۇيدەن كورى، اۋىلدا جەر ۇيلەر سالۋ كەرەك. جەر جەتەدى. كەزەكتە تۇرعان ازاماتتار ءۇشىن شاعىن جەر ۇيلەر تۇرعىزۋعا بولادى. جوباسىن قاراستىرايىق، – دەدى ءومىرزاق شوكەيەۆ.
جيىندا ءسوز العان تۇركىستان وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ ەلدىڭ اۋىزبىرشىلىگى مەن ىنتىماعىن نىعايتۋدا ارداگەرلەردىڭ ەڭبەگى وراسان ەكەنىن اتاپ ءوتتى. اۋداننىڭ ماسەلەسىن كوتەرۋگە كەلگەن اقساقالدارىنىڭ بەلسەندىلىگى ءۇشىن ريزاشىلىعىن ءبىلدىردى.
