قالا جاستارىنىڭ باستاماسىمەن ۇيىمداستىرىلعان قايىرىمدىلىق شاراسىنا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان، ءماسليحات حاتشىسى باحادىر نارىمبەتوۆ قاتىستى.
شارا بارىسىندا ءسوز العان قالا اكىمىنىڭ ءبىرىنشى ورىنباسارى شىڭعىس مۇقان بەلسەندى جاستارعا العىسىن ءبىلدىرىپ، اتتاناتىن جول كەرۋەنىنە ساتتىلىك تىلەدى.
– جاستاردىڭ بەلسەندىلىگى، ەلدىڭ ىنتىماعى، اۋىزبىرشىلىگى جايباراقات كەزدە ەمەس، وسىنداي ەلدىڭ باسىنا قيىندىق تۇسكەن كەزدە كورىنەدى. قالا جاستارى بىرىگىپ، ريددەردەگى جەرلەستەرىمىزگە كومەكتەسىپ، حالىق اراسىندا ۇندەۋ تاستاپ، 2 جۇك كولىگىمەن گۋمانيتارلىق كوش-كەرۋەندى جاساقتاعان ەكەن. بۇعان قالامىزداعى كاسىپكەرلەر دە ۇلەس قوستى. ولار زارداپ شەككەن وتباسىلارىنا قاجەتتى تۇرمىستىق زاتتاردى جىبەرىپ جاتىر. مەملەكەتتىلىكتىڭ ءمانىن ءتۇسىنىپ، يگى ىسكە اتسالىسقان بارشا ازاماتتارعا، قالا جاستارىنا شاھار باسشىسى مۇرات دۇيسەنبەك ۇلىنىڭ اتىنان زور العىس ايتامىز، – دەدى قالا اكىمىنىڭ ءبىرىنشى ورىنباسارى.
سونداي-اق ىزگى شاراعا قالالىق اۋىل شارۋاشىلىعى جانە ۆەتەريناريا باسقارماسىنىڭ باسشىسى اسقار قانىبەكوۆ، قۇرىلىس باسقارماسىنىڭ باسشىسى ەربول احمەتوۆ جانە مۇرات جولدىقوجايەۆ، اسقار الىمبەكوۆ، نۇرسۇلتان بالابييەۆ سىندى ازاماتتار بەلسەندى قولداۋ كورسەتكەن. مۇنان بولەك «بال تەكستيل» 50 كىلەم جەتكىزسە، ءبىرقاتار كاسىپكەر ازاماتتار زارداپ شەككەن وتباسىلارعا ازىق-تۇلىكپەن قاتار قىسقا تولقىندى پەش، ىدىس-اياق جىبەرگەن.
ايتا كەتەيىك، 2021 جىلعى 10 مامىردا شىعىس قازاقستان وبلىسى ريددەر ورمان شارۋاشىلىعىندا ءورت شىققان بولاتىن. ءتىلسىز جاۋدان زارداپ شەككەن تۇرعىندارعا كومەك كورسەتۋ الداعى ۋاقىتتا دا جالعاسادى.
