بۇگىن وڭتۇستىك جۇرتى ۇلىستىڭ ۇلى كۇنىن شىمكەنت قالاسىندا اتاپ ءوتتى. بۇل كۇنگى مەرەكەنىڭ ەرەكشەلىگى – جاڭا ارباتتىڭ اشىلۋىنان باستالدى. سالتاناتتى شاراعا قاتىسقان وبلىس اكىمى ج.تۇيمەبايەۆ شاھار تۇرعىندارىن جاڭا دەمالىس ورنىنىڭ اشىلۋىمەن قۇتتىقتادى.



مەرەكە قالاداعى ورتالىق اتشابارداعى ۇلتتىق سپورت ويىن تۇرلەرىنەن وتكەن جارىسپەن جالعاستى. اتاپ ايتقاندا، كوكپار، بايگە، قىز قۋۋ ويىندارى جينالعان جۇرتتىڭ دەلەبەسىن قوزدىردى. بيىلعى ناۋرىز مەيرامىنداعى سايىستىڭ ەرەكشەلىگى العاشقى رەت تاي جارىسى مەن قىسقا قاشىقتىقتاعى ات جارىسى ءوتتى. سونداي-اق، قوناقتار جامبى اتۋ، اۋدارىسپاق، تەڭگە ءىلۋ،  تازى-توبەت جارىسى، قوشقار كوتەرۋ سىندى سايىستاردى تاماشالادى. ۇلتتىق ويىندار دا شەت قالمادى، اسىرەسە، ۇمىت بولا باستاعان شوگەن ويىنى العاش رەت كورسەتىلىپ، كوپشىلىكتى تامساندىردى.



بۇل كۇنگى نەگىزگى مەرەكەلىك شارا ناۋرىز الاڭىنداعى «ناۋرىز كوكتەم – شىمقالا» تارتۋىمەن جالعاسىپ تاپتى. العاشقى بولىپ كۇنگەي ءوڭىر تۇرعىندارىنا اق تىلەگىن ارناعان وبلىس باسشىسى ۇلىستىڭ ۇلى كۇنىمەن قۇتتىقتادى

.

– ناۋرىز مەيرامى – تابيعاتتىڭ تىلسىم قۇدىرەتى كۇن مەن ءتۇننىڭ تەڭەسەر ساتىنە تۇسپا-تۇس كەلگەنىمەن ەرەكشەلەنەدى. ناۋرىز– ەجەلدەن جاڭا مەن جاقسىنىڭ، مەيىرىم مەن شاپاعاتتىڭ، ادەپ پەن يماندىلىقتىڭ باستاۋى بولىپ وتىرعان. بۇل كۇن – جاڭارۋ، جاسارۋ كەزەڭى. ۇلىستىڭ ۇلى كۇنى ءدال بۇگىن وتىزىنشى رەت تويلانىپ وتىر. بۇل – تاۋەلسىزدىگىمىزدىڭ، مەملەكەت باسشىسىنىڭ جۇرگىزىپ وتىرعان ساياساتىنىڭ جەمىسى. ءبىزدىڭ قاسيەتتى وڭتۇستىك جەرىنە كوكتەم ەرتە كەلەدى. سوندىقتان دا وڭتۇستىك جۇرتى بۇل مەرەكەگە ەرەكشە ىقىلاسپەن دايىندالادى. ۇلىستىڭ ۇلى كۇنىندە، قىدىر دارىعان ءقادىر تاڭىندا تىلەگەن ارماندارىمىز ورىندالا بەرسىن، – دەدى جانسەيىت قانسەيىت ۇلى.

سونداي-اق، ايماق باسشىسى وبلىسقا ەڭبەگى سىڭگەن ءبىرقاتار ازاماتتاردى «وبلىستىڭ قۇرمەتتى ازاماتى» اتاعىمەن ماراپاتتادى.



مەرەكەلىك تارتۋ «شاتتىق»، «ايگولەك» بي انسامبلدەرىنىڭ  “كوكتەم وڭتۇستىكتەن باستالادى” اتتى حورەوگرافيالىق قويىلىمىمەن جالعاستى. ساحنادا كوكتەمگە ارنالىپ “ايتىس” مۋزىكالىق ءنومىرى كورسەتىلدى. وڭتۇستىك حالقىن ۇلىق مەرەكەمەن قۇتتىقتاپ، ەلىمىزگە بەلگىلى “ۇلىتاۋ”، “الاش ۇلى”، “وركەن” سىندى ۇجىمدار اننەن شاشۋ شاشتى. ش.قالداياقوۆ اتىنداعى وبلىستىق فيلارمونيانىڭ سۇگىر اتىنداعى ۇلت اسپاپتار وركەسترى مەن وبلىستىق وپەرا جانە بالەت تەاترىنىڭ سيمفونيالىق وركەسترى ەلگە كوتەرىڭكى كوڭىل سىيلادى.



بۇدان بولەك وبلىس اكىمى ءدال وسى ناۋرىز مەيرامىندا «نۇرلى جول» باعدارلاماسى اياسىندا سالىنعان اكىمشىلىك ىسكەرلىك ورتالىعىنداعى №37 ءۇيدىڭ  پاتەر كىلتتەرىن يەلەرىنە تابىستادى. ۇلىستىڭ ۇلى كۇنىندە باسپانالى بولعان وتباسىلار قۋانىشقا كەنەلدى.

وقو اكىمىنىڭ باسپا ءسوز قىزمەتى