ونىڭ ايتۋىنشا، قالادا الەۋمەتتىك نەسيەلىك تۇرعىن ءۇي سانىن كوبەيتۋ ماقساتىندا 2026 جىلعا دەيىن بيۋدجەت ەسەبىنەن 1 ميلليون شارشى مەتردى قۇرايتىن تۇرعىن ءۇي سالىنادى.
– قالادا الەۋمەتتىك تۇرعىن ۇيگە سۇرانىس جوعارى. بۇگىندە ول 198 623 ادامدى قۇرايدى. ونىڭ ىشىندە 150 مىڭ ادام الەۋمەتتىك نەسيە الۋعا ءوتىنىش بەرگەن «وتباسى بانك» سالىمشىلارى بولسا، 48 623ء-ى الەۋمەتتىك جالدامالى تۇرعىن ءۇي الۋ ءۇشىن باسپانا كەزەگىندە تۇرعان ازاماتتار.
وسى ماسەلەنى شەشۋ ماقساتىندا تۇرعىن ءۇيدىڭ قولجەتىمدىلىگىن ارتتىرىپ، مەملەكەتتىك باعدارلاما بويىنشا بەلگىلەنگەن باعادا ۇلەستىرۋ ءۇشىن جوعارى ساپالى الەۋمەتتىك نەسيەلىك تۇرعىن ۇيلەردىڭ سانىن كوبەيتۋ قاجەت. الداعى 5 جىلدا وسى ساناتتاعى ۇيلەردىڭ شارشى مەترىن 1 ميلليونعا، ياعني، 38 264 پاتەرگە جەتكىزۋ كوزدەلۋدە. وسى جىلى مەملەكەتتىك باعدارلاما ەسەبىنەن 173 مىڭ شارشى مەتردەن استام باسپانا پايدالانۋعا بەرىلەدى، – دەدى باسقارما باسشىسى.
ەسكە سالساق، وتكەن جىلى بارلىق قارجى كوزدەرىنىڭ ەسەبىنەن قالادا 1 ملن شارشى مەتر تۇرعىن ءۇي پايدالانۋعا بەرىلدى. سونىڭ ىشىندە 140 مىڭ شارشى مەترى الەۋمەتتىك ءۇي.
ەسەپتى جيىندا باسقارما باسشىسى ينجەنەرلىك ينفراقۇرىلىم، ءبىلىم بەرۋ، دەنساۋلىق ساقتاۋ، مادەنيەت جانە اباتتاندىرۋ نىساندارىنىڭ قۇرىلىسى مەن الدا قويىلعان جوسپارلارعا دا توقتالىپ ءوتتى. سونىڭ ىشىندە بيىل قالادا جالپى 1800 ورىنعا ارنالعان 6 ءبىلىم بەرۋ نىسانى پايدالانۋعا بەرىلەتىنىن ءمالىم ەتتى.
سالا مامانى تۇرعىن ءۇي جانە الەۋمەتتىك ماقساتتاعى نىسانداردىڭ قۇرىلىسى بارىسىندا زاماناۋي قۇرىلىس ماتەريالدارىن پايدالانۋ تۋرالى ۇسىنىسىندا جەتكىزدى.
تۇرعىن ءۇي جاعدايىن جاقسارتۋعا ەرەكشە كوڭىل ءبولۋ كەرەكتىگىن ايتقان قالا باسشىسى كەزەكتە تۇرعان ازاماتتاردى باسپانامەن قامتۋ ءۇشىن سالىناتىن الەۋمەتتىك تۇرعىن ۇيلەردىڭ ساپاسىنا باسا نازار اۋدارۋدى تاپسىردى.
مۇرات ايتەنوۆ قولجەتىمدى باسپانامەن قامتاماسىز ەتۋ – مەملەكەتتىڭ الەۋمەتتىك ساياساتىنىڭ باستى مىندەتتەرىنىڭ ءبىرى ەكەنىن ايتىپ، وسى باعىتتاعى جۇمىستاردىڭ ءتيىستى دەڭگەيدە جۇزەگە اسىرىلۋى ءوز باقىلاۋىندا بولاتىنىن جەتكىزدى.
