Onyń aitýynsha, qalada áleýmettik nesielik turǵyn úi sanyn kóbeitý maqsatynda 2026 jylǵa deiin biýdjet esebinen 1 million sharshy metrdi quraityn turǵyn úi salynady.
– Qalada áleýmettik turǵyn úige suranys joǵary. Búginde ol 198 623 adamdy quraidy. Onyń ishinde 150 myń adam áleýmettik nesie alýǵa ótinish bergen «Otbasy bank» salymshylary bolsa, 48 623-i áleýmettik jaldamaly turǵyn úi alý úshin baspana kezeginde turǵan azamattar.
Osy máseleni sheshý maqsatynda turǵyn úidiń qoljetimdiligin arttyryp, memlekettik baǵdarlama boiynsha belgilengen baǵada úlestirý úshin joǵary sapaly áleýmettik nesielik turǵyn úilerdiń sanyn kóbeitý qajet. Aldaǵy 5 jylda osy sanattaǵy úilerdiń sharshy metrin 1 millionǵa, iaǵni, 38 264 páterge jetkizý kózdelýde. Osy jyly memlekettik baǵdarlama esebinen 173 myń sharshy metrden astam baspana paidalanýǵa beriledi, – dedi basqarma basshysy.
Eske salsaq, ótken jyly barlyq qarjy kózderiniń esebinen qalada 1 mln sharshy metr turǵyn úi paidalanýǵa berildi. Sonyń ishinde 140 myń sharshy metri áleýmettik úi.
Esepti jiynda basqarma basshysy injenerlik infraqurylym, bilim berý, densaýlyq saqtaý, mádeniet jáne abattandyrý nysandarynyń qurylysy men alda qoiylǵan josparlarǵa da toqtalyp ótti. Sonyń ishinde biyl qalada jalpy 1800 orynǵa arnalǵan 6 bilim berý nysany paidalanýǵa beriletinin málim etti.
Sala mamany turǵyn úi jáne áleýmettik maqsattaǵy nysandardyń qurylysy barysynda zamanaýi qurylys materialdaryn paidalaný týraly usynysynda jetkizdi.
Turǵyn úi jaǵdaiyn jaqsartýǵa erekshe kóńil bólý kerektigin aitqan qala basshysy kezekte turǵan azamattardy baspanamen qamtý úshin salynatyn áleýmettik turǵyn úilerdiń sapasyna basa nazar aýdarýdy tapsyrdy.
Murat Áitenov qoljetimdi baspanamen qamtamasyz etý – memlekettiń áleýmettik saiasatynyń basty mindetteriniń biri ekenin aityp, osy baǵyttaǵy jumystardyń tiisti deńgeide júzege asyrylýy óz baqylaýynda bolatynyn jetkizdi.
