“شىمبۇلاق” تاۋ-شاڭعى كۋرورتىندا Regular Season كەزەڭىنىڭ باستالۋىنا بايلانىستى High Season كەزىندە توقتاتىلعان جەڭىلدىك باعدارلامالارى قايتا كۇشىنە ەندى، دەپ حابارلايدى Dalanews.kz.
جۇمىس كۇندەرى زەينەتكەرلەر مەن مۇگەدەكتىگى بار جاندار راستاۋشى قۇجاتتارىن ۇسىنعان جاعدايدا كۋرورت اۋماعىنا تەگىن كىرە الادى.
سونداي-اق كوپبالالى وتباسىلار، ارداگەرلەر، ەڭبەك ءوتىلى بويىنشا زەينەتكە شىققان ازاماتتار جانە باسقا دا الەۋمەتتىك وسال توپ وكىلدەرى جۇمىس كۇندەرى بيلەتتەر مەن سكي-پاسستاردى جەڭىلدىكپەن ساتىپ الۋ مۇمكىندىگىنە يە.
ال 5 جاسقا دەيىنگى بالالار ءۇشىن شىمبۇلاققا كىرۋ كەز كەلگەن كۇنى جانە كەز كەلگەن ماۋسىمدا تەگىن. بۇل ءۇشىن كاسسادان سكي-پاسس كارتاسىن ساتىپ الىپ، وعان ءنول سوماسىندا ابونەمەنت جۇكتەۋ جەتكىلىكتى.
كۋرورت وكىلدەرىنىڭ ايتۋىنشا، جىل سايىن شىمبۇلاق الەۋمەتتىك وسال ساناتقا جاتاتىن 190 مىڭعا جۋىق قوناقتى قابىلدايدى، بۇل جالپى كەلۋشىلەردىڭ شامامەن 20%-ىن قۇرايدى.
