تابيعات جاناشىرى بوريس ششەرباكوۆ ءوزىنىڭ سانالى عۇمىرىن شىعىس قازاقستان وبلىسىنىڭ تۇمسا تابيعاتىن دارىپتەۋگە ارناعان ولكەتانۋشى.
جينالعان قاۋىم دوستىق ءۇيىنىڭ فويەسىندە ولكەتانۋشىنىڭ ءومىرى مەن شىعارماشىلىعىنان سىر شەرتەتىن كورمەنى تاشالاۋ مۇمكىندىگىنە يە بولدى. كورمەگە قويىلعان فوتولار مەن ءبىرقاتار كۇندەلىك داپتەردەن بوريس ششەرباكوۆتىڭ قانشالىقتى تابيعات جاناشىرى بولعانىن انىق بايقاۋعا بولادى.
بەلگىلى عالىم-ناتۋراليست ءوزىنىڭ سانالى عۇمىرىن ايماقتىڭ بيوالۋاندىعىن ساقتاپ، دامىتۋعا ارنادى. ايتالىق، بوريس ششەرباكوۆتىڭ باستاماسىمەن باتىس-التاي قورىعى قۇرىلىپ، اتالعان ايماقتا 10 جىلعا دەيىن (2017 جىلدان باستاپ) اڭشىلىق جاساۋعا تىيىم سالىنعان بولاتىن.
سونىمەن قاتار تارباعاتاي جانە مارقاكول تابيعي قورىعىنىڭ قۇرىلۋىنا دا ءبىر كىسىدەي اتسالىسقانى بەلگىلى. تاعىدا ايتا تۇسسەك، بوريس ششەرباكوۆ ريددەر اۋدانىندا اعاش كەسۋ ىسىنە دا توسقاۋىل قويۋعا ۇلەس قوستى.
كورمەدەن ولكەتانۋشى-عالىمنىڭ 300-دەن استام ەكسپەديسيالارعا قاتىسىپ، قازاقستان، ورتالىق ازيا، التاي، ءۇندىستان، ۆەتنام سىندى ەلدەردى ارالعانىن بايقاۋعا بولادى.
ول جازۋشىلىق قاسيەتىنىڭ ارقاسىندا 20-دان استام عىلىمي-كوپشىلىك جانە كوركەم ادەبي كىتاپتاردىڭ اۆتورى اتانعانىن ايتا كەتۋىمىز كەرەك.
القالى باسقوسۋدا مەرەيتوي يەسىن وبلىس اكىمى دانيال احمەتوۆتىڭ اتىنان شقو ءماسليحاتىنىڭ حاتشىسى ۆلاديمير گولوۆاتيۋك قۇتتىقتادى.
– بۇگىن ءبىز ءۇشىن ۇلكەن قۋانىش. وبلىس اكىمى دانيال احمەتوۆتىڭ جۇرەكجاردى لەبىزىن قابىل الىڭىز. ءسىزدىڭ سانالى عۇمىرىڭىزعا كوز سالعان ادام قامشىنىڭ سابىنداي قىسقا ءومىردى ءماندى، ءساندى وتكىزۋدىڭ قانشالىقتى ماڭىزدى ەكەنىن تۇسىنەر ەدى. شىعىس قازاقستان وبلىسىنىڭ تابيعاتىن قورعاۋدا ءسىزدىڭ سىڭرگەن ەڭبەگىڭىز ۇشان-تەڭىز. ءسىز تابيعات جاناشىرى رەتىندە جاس ۇرپاققا قورشاعان ورتانى ايالاۋدىڭ قانشىلىقتى ماڭىزدى ەكەنىن ناقتى ىسپەن دالەلدەپ كورسەتتىڭىز، – دەپ ءماسليحات حاتشىسى جۇرەكجاردى لەبىزىن ايتتى.
