Tabiǵat janashyry Boris Sherbakov óziniń sanaly ǵumyryn Shyǵys Qazaqstan oblysynyń tumsa tabiǵatyn dáripteýge arnaǵan ólketanýshy.
Jinalǵan qaýym Dostyq úiiniń foiesinde ólketanýshynyń ómiri men shyǵarmashylyǵynan syr shertetin kórmeni tashalaý múmkindigine ie boldy. Kórmege qoiylǵan fotolar men birqatar kúndelik dápterden Boris Sherbakovtyń qanshalyqty tabiǵat janashyry bolǵanyn anyq baiqaýǵa bolady.
Belgili ǵalym-natýralist óziniń sanaly ǵumyryn aimaqtyń bioalýandyǵyn saqtap, damytýǵa arnady. Aitalyq, Boris Sherbakovtyń bastamasymen Batys-Altai qoryǵy qurylyp, atalǵan aimaqta 10 jylǵa deiin (2017 jyldan bastap) ańshylyq jasaýǵa tyiym salynǵan bolatyn.
Sonymen qatar Tarbaǵatai jáne Marqakól tabiǵi qoryǵynyń qurylýyna da bir kisidei atsalysqany belgili. Taǵyda aita tússek, Boris Sherbakov Ridder aýdanynda aǵash kesý isine da tosqaýyl qoiýǵa úles qosty.
Kórmeden ólketanýshy-ǵalymnyń 300-den astam ekspeditsiialarǵa qatysyp, Qazaqstan, Ortalyq Aziia, Altai, Úndistan, Vetnam syndy elderdi aralǵanyn baiqaýǵa bolady.
Ol jazýshylyq qasietiniń arqasynda 20-dan astam ǵylymi-kópshilik jáne kórkem ádebi kitaptardyń avtory atanǵanyn aita ketýimiz kerek.
Alqaly basqosýda mereitoi iesin oblys ákimi Danial Ahmetovtyń atynan ShQO Máslihatynyń hatshysy Vladimir Golovatiýk quttyqtady.
– Búgin biz úshin úlken qýanysh. Oblys ákimi Danial Ahmetovtyń júrekjardy lebizin qabyl alyńyz. Sizdiń sanaly ǵumyryńyzǵa kóz salǵan adam qamshynyń sabyndai qysqa ómirdi mándi, sándi ótkizýdiń qanshalyqty mańyzdy ekenin túsiner edi. Shyǵys Qazaqstan oblysynyń tabiǵatyn qorǵaýda sizdiń sińrgen eńbegińiz ushan-teńiz. Siz tabiǵat janashyry retinde jas urpaqqa qorshaǵan ortany aialaýdyń qanshylyqty mańyzdy ekenin naqty ispen dáleldep kórsettińiz, – dep máslihat hatshysy júrekjardy lebizin aitty.
