وڭىردەگى اۋداندار بىرىكتىرىلگەننەن كەيىن ولار مارتەبەسىنەن ايىرىلىپ، بىرتىندەپ جويىلا باستاعان-دى. الايدا، قازاقستاننىڭ مەملەكەتتىك ساياساتى تاۋەلسىزدىك العان كۇننەن باستاپ اۋىلداردى دامىتۋ ءىسى باسىم باعىتقا اينالدى. وسىعان بايلانىستى ءقازىر بۇرىنعى اۋدان ورتالىقتارى جاندانىپ، مەملەكەتتىك باعادارالامار اۋىلداردىڭ وركەندەۋىنە جول اشىپ وتىر.
وسىعان وراي، جىل سوڭىندا سەرەبريانسك قالاسىنىڭ تۇرعىندارىنا جاڭا دەنە شىنىقتىرۋ-ساۋىقتىرۋ كەشەنى قولدانىسقا بەرىلمەك. سپورتتىڭ ءار تۇرىمەن اينالىسۋعا ارنالعان جابىق الاڭىنان بولەك، فۋتبول الاڭى سالىنباقشى.
شىعىس قازاقستان وبلىسىنىڭ اكىمى دانيال احمەتوۆتىڭ تاپسىرماسى بويىنشا، سەرەبريانسك بەيورگانيكالىق ءوندىرىس زاۋىتىنىڭ بۇرىنعى اكىمشىلىك عيماراتى مادەني ورتالىق رەتىندە قايتا جابدىقتالماقشى. ساراپتاما نىساننىڭ جاقسى جاعدايدا ەكەنىن كورسەتتى. كۇردەلى جوندەۋ مەن جابدىقتاۋدان كەيىن مۇندا مۋزىكا مەكتەبى مەن ۇيىرمەلەر ورنالاستىرىلىپ، ارنايى كونسەرت زالى، شىعارماشىلىق پەن قولدانبالى ونەرگە ارنالعان الاڭدار اشىلماق.
كەزەكتە تۇرعان كوپ بالالى وتباسىلار، پەداگوگتار مەن مەديكتەردىڭ وتباسىلارى ءۇشىن بۇرىنعى جاتاقحانا عيماراتىمەن قاتار، 60 پاتەرلى تۇرعىن ءۇي جوندەلەتىن بولادى. ۇيلەر «ءبىر قاباتتى شىعىس» باعدارلاماسى بويىنشا سالىنۋدا.
بيىلعى جىلى بۇرىنعى اۋدان ورتالىعى – تاۆريا اۋىلىندا دامۋ باعدارلاماسى بويىنشا ورتالىق جانە قوسالقى جولداردىڭ بارلىعى اسفالتتالىندى. 16 جەلتوقساندا جاڭا دەنە شىنىقتىرۋ-ساۋىقتىرۋ ورتالىعى ءوز ەسىگىن ايقارا اشىلداى. سونىمەن قاتار سۋ قۇبىرى جەلىلەرى جاڭارتىلىپ جاتقانىن ايتا كەتۋىمىز كەرەك.
اۋىلدا كوپبالالى 14 وتباسى قونىس تويىن تويلايتىن بولادى. اۋىل ءۇشىن ەڭ ماڭىزدى ماسەلە – جىلۋمەن قامتاماسىز ەتۋ ەكەنى بەلگىلى. بۇل ماسەلە دە وڭ شەشىمىن تاپپاق. ايماق باسشىسى اتاپ وتكەندەي، اۋداندىق اۋرۋحانانىڭ قازاندىق قۋاتتىلىعى ارتادى. ول مەكتەپكە، بالاباقشاعا، اۋىلدىق مادەنيەت ۇيىنە جىلۋ بەرۋگە مۇمكىندىك بەرەدى. وسى ماقساتتا قوسىمشا جەلىلەر سالىنۋدا.
سامار اۋىلىندا بۇرىنعى اۋدان ورتالىقتارىن دامىتۋ باعدارلاماسى بويىنشا سۋ قۇبىرى جەلىلەرىن قايتا جاڭارتۋ، كوشەلەردى ورتاشا جوندەۋ جۇرگىزىلۋدە. ەڭ باستىسى – اۋىلدىڭ پەرزەنتحاناسى جاڭا جابدىقتارمەن جابدىقتالدى. ەندى تولعاق قىسقان انالار جۇزدەگەن شاقىرىم جول ءجۇرىپ ابىگەرگە تۇسپەيدى. بولىمشە دارىگەرلەرى الەمنىڭ ۇزدىك كلينيكالارىنان تاعىلىمدامادان وتكەنىن اتاپ وتكەن ءجون.
باعدارلامانىڭ ماڭىزدى تارماقتارىنىڭ ءبىرى – جاس مامانداردى قولداۋ. «جاستار اۋىلدان كەتپەۋى كەرەك» دەپ ەسەپتەيدى جەرگىلىكتى بيلىك ورىندارى. ول ءۇشىن سامارادا جەرگىلىكتى كوللەدجدىڭ جاتاقحاناسى جوندەلەدى. ال جاس ماماندار تۇرعىن ءۇي ساتىپ الۋعا جەڭىلدىكپەن نەسيە الۋ مۇمكىندىگىنە يە بولاتىن بولادى.
وسكەمەننەن 45 شاقىرىمدا ورنالاسقان بوزانباي اۋىلىندا باعدارلاماعا سايكەس، اۋرۋحانا بازاسىندا وڭالتۋ ورتالىعى اشىلادى. ءقازىردىڭ وزىندە ورتالىقتى قاجەتتى جابدىقتارمەن جابدىقتاۋ بويىنشا جوبا دايىندالۋدا. مۇندا دەنە شىنىقتىرۋ-ساۋىقتىرۋ ورتالىعىنىڭ قۇرىلىسى دا باستالىپ كەتكەن. «مادەنيەت ءۇيى» مەن مەكتەپتى قاز-قالپىندا مۇقيات ساقتالعان. اۋىل تۇرعىندارى جاڭا ينفراقۇرىلىمدىق جوبالاردىڭ جاس ماماندار ءۇشىن تابىستى بولاتىنىنا كامىل سەنىمدى. ويتكەنى اۋىلدا جاڭا جۇمىس ورىندارى پايدا بولادى.
