ءوڭىر باسشىسى دانيال احمەتوۆتىڭ ايتۋىنشا، ەل پرەزيدەنتى قاسىم-جومارت كەمەل ۇلى توقايەۆتىڭ تاپسىرماسى بويىنشا قىتايدان شىققان كوروناۆيرۋستىڭ تارالۋىنا جول بەرمەۋ ءۇشىن شقو-دا جەدەل شتاب قۇرىلدى. ءوڭىردىڭ بارلىق مەديسينالىق ۇيىمدارى جوعارى دايىندىق رەجيمىندە جۇمىسقا كىرىستى، دەپ حابارلايدى Dalanews.kz.
وڭىردە ۆيرۋسقا قارسى پرەپاراتتاردىڭ قاجەتتى قورى جەتكىلىكتى، سونداي-اق 12 400 قورعانىش كوستيۋمدەرى، 670 000 رەسپيراتور جانە 7 ملن. بىررەتتىك ماسكالار بار. كۇدىككە ىلىنگەن، ۆيرۋس جۇقتىرعان ادامداردى تاسىمالدايتىن 2 جەكە كولىك كاپسۋلاسىن دايىن. تاعى 4 كاپسۋلاعا جانە ل-1 ءتيپتى 18 قورعانىش كوستيۋمىنە ءوتىنىم بەرىلدى.
- قحر-مەن ءبىزدىڭ وبلىستىڭ شىعىس بولىگى شەكتەسەدى. 2 اقپانعا دەيىن "باقتى" جانە "مايقاپشاعاي" كەدەن بەكەتتەرى ارقىلى شەكارادان ءوتۋ توقتاتىلدى. قازىرگى تاڭدا ەكى باعىتتا دا ازاماتتار مەن تاۋارلاردىڭ قوزعالىسىن تولىق توقتاتۋ ماسەلەسى شەشىلۋدە.
شەكارالىق بەكەتتەردەگى سانيتارلىق-باقىلاۋ پۋنكتتەرى تەپلوۆيزورلارمەن جابدىقتالدى. باقتى جانە مايقاپشاعايدا 6 تەپلوۆيزور بار.
سەمەي جانە وسكەمەن اۋەجايلارىندا جولاۋشىلاردى مونيتورينگتەن وتكىزۋ ءۇشىن ءۇش تەپلوۆيزور جۇمىس ىستەيدى. الداعى كۇندەرى "اقتوعاي" تەمىرجول ستانسياسىن تەپلوۆيزورلارمەن قامتاماسىز ەتۋدى جوسپارلاپ وتىرمىز. جۇڭگو شەكاراسىنان ارى-بەرى وتكەن ازاماتتاردىڭ دەنساۋلىق جاعدايى مۇقيات باقىلاۋعا الىنعان. جاعداي مەنىڭ ءجىتى باقىلاۋىمدا، دەپ جازدى وبلىس اكىمى دانيال احمەتوۆ Facebook-تەگى پاراقشاسىندا.
قازىرگى ۋاقىتتا شىعىس قازاقستان وبلىسىنىڭ اۋماعىندا كوروناۆيرۋس دەرتى تىركەلگەن جوق.
