اياگوزدىڭ جاعدايى ايتپاسا دا تۇسىنىكتى. مۇقاعالي جىرلاعان «اياداي بۇلاقتىڭ» اياق استىنان تۋلاپ، ارناسىنان اسىپ كەتۋى اعايىن-جۇرتتى ابىگەرگە سالىپ-اق جاتىر. ەلدىڭ بەرەكە-بىرلىگى وسىندايدا كورىنە مە دەيمىن. قاراپايىم حالىق تا، قالتالى كاسىپكەر دە، مەملەكەتتىك قىزمەتشى دە قولدان كەلگەنىن ايانىپ قالىپ جاتقان جوق. «نۇر وتان» پارتياسى وبلىستىق فيليالىنىڭ ۇيىتقى بولۋىمەن بۇدان بىرنەشە كۇن بۇرىن وسكەمەندە گۋمانيتارلىق بەكەتتەر اشىلعان-تىن. ول جەرگە ازىق-تۇلىك پەن وزگە دە كەرەكتى زاتتار تولاسسىز كەلىپ تۇسۋدە.



– ءبىز وبلىسىمىزداعى ءبىرقاتار مەكەمەگە ۇندەۋ تاستاعانبىز. قول ۇشىن سوزۋدان ەشقايسىسى باس تارتپادى. گۋمانيتارلىق بەكەتتەرگە كەلىپ تۇسكەن زاتتاردى مىنا تۇرعان «كاماز» كولىگىنە ارتىپ قويدىق. جولعا شىققالى تۇر. قيىندىق شەگىپ جاتقان اعايىنعا بۇل از دا بولسا سەپتىگىن تيگىزەدى دەپ سەنەمىز. مۇندا 10 توننا ازىق-تۇلىك پەن 15 توننا قۇرىلىس ماتەريالدارى جانە كيىم-كەشەك بار، – دەدى «نۇر وتان» پارتياسى وبلىستىق فيليالى ءتوراعاسىنىڭ ءبىرىنشى ورىنباسارى انۋاربەك مۇحتارحانوۆ.

انۋاربەك مۇحتارحانوۆتىڭ ايتۋىنشا، كومەك كورسەتۋدىڭ باس-اياعى بۇل ەمەس، وسى ۋاقىتقا دەيىن دە اياگوزدىكتەرگە ۇن، كارتوپ، ماي، ماكارون ونىمدەرى جانە باسقا دا قاجەتتى دۇنيەلەر جىبەرىلگەن ەكەن.

– اياگوزدەگى جاعدايعا شىنايى الاڭداپ، كومەگىن اياماعان ازاماتتار مەن مەكەمەلەرگە العىس ايتۋدىڭ رەتى كەلگەن سەكىلدى. وبلىستىق جانە قالالىق ءماسليحات دەپۋتاتتارى: لۇقبەك تۇماشينوۆ، ەرجان نۇربايەۆ، ءاليا دوسىبايەۆا، سەيىلجان سايلاۋبايەۆقا، سونداي-اق «مارات م»، «شىعىساگروحولدينگ»، «كسەدو»، «ۆوستوك-مولوكو» سىندى بىرنەشە سەرىكتەستىككە مىڭ دا ءبىر العىس، – دەدى انۋاربەك مۇحتارحانوۆ. – شىنىن ايتساق، اياگوزدەن وزگە وڭىرلەردىڭ دە جاعدايى سونشالىقتى ءماز ەمەس، سوعان قاراماستان كاتونقاراعاي، شەمونايحا، اباي، گلۋبوكوە سياقتى اۋداندار مەن سەمەي، ريددەر قالالارى كومەك كورسەتىپ جاتىر.

وسى ورايدا ايتا كەتەيىك، «نۇر وتان» پارتياسىنىڭ پاۆلودار، قىزىلوردا، اقتوبە، اتىراۋ، باتىس قازاقستان وبلىستارىنداعى فيليالدارى دا اياگوزگە كومەك كەرۋەنىن جونەلتكەلى جاتىر ەكەن.

تاسقىن بولات ۇلى

 

https://dalanews.kz/35221