بيىل وبلىستىق جانە اۋداندىق ماڭىزى بار جولداردان جالپى ۇزىندىعى 137 شاقىرىم بولاتىن 9 ۋچاسكەنى جوندەۋ جوسپارلانعان، ونىڭ ىشىندە 86 شاقىرىمى – وبلىستىق، 51 شاقىرىمى – اۋداندىق ماڭىزى بار جولدار. بۇدان باسقا، قالالار مەن اۋدانداردىڭ 201 شاقىرىم كوشە-جول جەلىسىن جوندەۋگە 7،4 ملرد.تەڭگە كوزدەلگەن. ونىڭ ىشىندە، «اۋىل – ەل بەسىگى» باعدارلاماسى اياسىندا 34 ەلدى مەكەندەگى 165 شاقىرىم كوشەلەردى جوندەۋگە 3،7 ملرد.تەڭگە ءبولىندى.
– «ۇلكەن نارىن – كۇرشىم» جولىنىڭ 11 شاقىرىمى، «ماقانشى – جالاڭاشكول» جولىنىڭ 20 شاقىرىمى، «اياگوز – قاراۋىل – سەمەي – قاينار» جولىنىڭ 11 شاقىرىمى، «ومبى – مايقاپشاعاي – شىلىكتى – اقجار» جولىنىڭ 20 شاقىرىمى، «كۇرشىم – قالجىر» جولىنىڭ 15 شاقىرىمى، «تاۆريا– كامەنكا – تروينيسكوە» جولىنىڭ 10 شاقىرىمى، «سوگىر – بارلىق – اقسۋ» جولىنىڭ 14 شاقىرىمى، «كۇرشىم – اقسۋات – اقسۋات» جولىنىڭ 27 شاقىرىمى جوندەۋ جۇمىستارىمەن قامتىلادى، – دەپ باياندادى شقو جولاۋشىلار كولىگى جانە اۆتوموبيل جولدارى باسقارماسىنىڭ باسشىسى نۇرجان ءجۇمادىلوۆ.
ايماق باسشىسى دانيال احمەتوۆ اكىمدەرگە جول-جوندەۋ جۇمىستارىنىڭ جۇرگىزىلۋىنە باقىلاۋدى كۇشەيتۋدى جانە ساپاسىن مۇقيات تەكسەرۋدى، سونداي-اق كەپىلدىك مەرزىمى بار پايدالانۋعا بەرىلگەن ۋچاسكەلەردى تەكسەرۋدى تاپسىردى.
– وسكەمەن جانە سەمەي قالالارى بويىنشا جۇرگىزىلىپ جاتقان جوندەۋ جولدارىنىڭ ساپاسىنا قاتىستى كوپ شاعىمدار بار. وسكەمەن، سەمەي قالالارىنىڭ اكىمدەرى ورىندالاتىن جۇمىستاردىڭ ساپاسىن قوسىمشا تەكسەرۋدى قامتاماسىز ەتسىن، سونداي-اق كەپىلدىك مەرزىمى بار، بۇعان دەيىن ەنگىزىلگەن ۋچاسكەلەردى تەكسەرسىن. كوشە-جول جەلىسىن قايتا قۇرۋ، كۇردەلى جانە ورتاشا جوندەۋ جۇمىستارىن جۇرگىزۋدى ەرەكشە باقىلاۋعا الۋدى تاپسىرامىن. اياقتالۋى 2021 جىلعا جوسپارلانعان نىسانداردى پايدالانۋعا بەرۋدى قامتاماسىز ەتۋ قاجەت، – دەدى دانيال احمەتوۆ.
شىعىس قازاقستان وبلىسىنىڭ اكىمى، سونداي-اق بۇقتىرما سۋ قويماسى ارقىلى وتەتىن كوپىر قۇرىلىسىنىڭ ساپاسىنىڭ ماڭىزدىلىعىن اتاپ ءوتتى. سونىمەن قاتار، بۇگىنگى تاڭدا سەمەي قالاسىندا اۆتوجول كوپىرىن قايتا جاڭارتۋعا جوبالىق-سمەتالىق قۇجاتتاما ازىرلەندى. قازىرگى ۋاقىتتا جوبا مەملەكەتتىك ساراپتامادان وتۋدە. ال جالپى قۇنى 31،1 ملرد تەڭگەنى قۇرايدى.
