بۇگىن «ۇلتتىق دومبىرا كۇنى». ەلىمىزدىڭ بارلىق وڭىرلەردە ۇلتتىق مەرەكە ۇلىقتالۋدا.
قازاقستان حالقى اسسەمبلەياسى «قاسيەتتى دومبىرا» اكسياسىن ۇيىمداستىرىپ ءدال وسى كۇنى ءسابيلى بولعان جاس جۇبايلاردى قۇتتىقتاۋدا.
«دومبىرا كۇنى» اياسىندا شىعىس قازاقستاندا جاستى دا، جاسامىستى دا بەي-جاي قالدىرماعان ۇلتتىق ماندەگى شارالار ۇيىمداستىرىلىپ، قالاداعى جازعى تەاتردىڭ الدىندا ايگىلى «التاي» فولكلور ءانسامبلى ونەر كورسەتتى.
بۇدان بولەك ۇلتتىق قولونەر بۇيىمدارىنىڭ كورمەسى ۇيىمداستىرىلىپ قالا تۇرعىندارى وزدەرىن قىزىقتىرعان كادەسىيلاردى ساتىپ الدى.
كەشقۇرىم وسكەمەندەگى مۋزەي-قورىقتىڭ ۇلكەن الاڭىندا «قاسيەتىڭنەن اينالدىم، ۇلى دومبىرا!» اتتى كونسەرتتىك باعدارلاماسى ۇيىمداستىرىلادى. بۇل كەشتە بايجىگىت اتىنداعى ۇلتتىق وركەستردىڭ ۇزدىك دومبىراشىلارى مەن ەسترادا جۇلدىزدارى ونەر كورسەتەدى.
ال اسسامبلەيا ۇيىمداستىرعان اكسيا اياسىندا قالاداعى «انا مەن بالا» ورتالىعىندا دۇنيە ەسىگىن اشقان سابيلەرگە سىي تارتۋ ەتىلدى.
جەرگىلىكتى «دوستىق ءۇيىنىڭ» مامانى ۆلاديسلاۆ ارتامانوۆتىڭ ايتۋىنشا اكسيانىڭ نەگىزگى ماقساتى قازاقتىڭ ۇلتتىق داستۇرلەرىن ۇلىقتاۋ، قازاقتىڭ قارا دومبىراسىنىڭ قادىر-قاسيەتىن دارىپتەۋ.
«قازاقتىڭ جانى – دومبىرا. وسى اسپاپتىڭ قوڭىر ۇنىنە بولەنگەن اباي قانداي، شاكارىم قانداي. اسسامبلەيا مۇشەلەرى – دومبىرا ءاربىر قازاقستاندىقتىڭ ۇيىندە تۇرۋى ءتيىس دەپ سانايدى. دومبىراسىن ساقتاعان قازاق حالقى داستۇر-مادەنيەتىن دە ساقتاپ قالدى. ەلباسى جانە پرەزيدەنتىمىز ايتاتىن «رۋحاني جاڭعىرۋ» باعدارلاماسىنىڭ وزەگى دە وسىندا»، – دەيدى ول.
«انا مەن بالا» ورتالىعىندا ءدال بۇگىن گاۋسار ەسىمدى التىن اسىقتاي ءبۇلدىرشىن ءومىر ەسىگىن اشتى. «دوستىق ءۇيىنىڭ» وكىلدەرى باقىتتى وتباسىنى قۋانىشتارىمەن قۇتتىقتاپ دومبىرا سىيلادى ءارى جاڭا تۋعان بالاعا العاشقى ۋاقىتتا اۋاداي قاجەت بولاتىن كەرەك-جابدىقپەن قامتاماسىز ەتتى.
«قىزىمنىڭ قازاقتىڭ كۇي تاريحىندا ءىز قالدىرعان ايگىلى كۇيشىلەرگە ۇقساعانىن قالايمىن. گاۋسارىمنىڭ وسىناۋ مۋزىكالىق اسپاپتى بارىنشا مەڭگەرۋىنە كۇش سالامىن. اربىردەن سوڭ ءاۋ دەمەيتىن قازاق جوق، دومبىرا تارتۋ قازاقتىڭ قانىندا بار. شىر ەتىپ دۇنيەگە كەلگەن قىزىمدى دومبىرانىڭ اۋەنىمەن ۇيقىعا بولەيمىز»، – دەدى گاۋساردىڭ اكەسى دارحان شوماتوۆ.
ايتا كەتەلىك، «دومبىرا كۇنىندە» شىعىستا قازىرگە دەيىن 25 بالا ومىرگە كەلگەن. كۇن اياقتالعانعا دەيىن تاعى 18 ءسابي جارىق دۇنيە ەسىگىن اشادى دەپ كۇتىلۋدە.
