وسى جازدا مەنىڭ بالa كەزدەگى ارمانىم ورىندالدى. قحر-نىڭ قازاقستانداعى باس كونسۋلدىعىنىڭ جانە كيەلى وقۋ ورداسى ءال-فارابي اتىنداعى ءقازۇۋ-نىڭ سەرىكتەستىك جۇمىسى ناتيجەسىندە ءبىز، قازاقستاندىق جۇڭگو ءتىلىن ۇيرەنۋشى ستۋدەنتتەر قىتايعا جازعى لاگەرگە اتتاندىق. قۋانىشىمىزدا شەك بولماي، توبەمىز قۋانىشتان كوككە جەتتى. قۇجات پەن ۆيزا فورمالدىلىكتەرىن راسىمدەۋ شارالارىمەن اينالىسىپ ءجۇرىپ، قىتايعا ۇشار كۇننىڭ جەتكەنىن بايقاماي قالدىم. بويىمدى تۇسىنىكسىز سەزىمدەر بيلەپ الدى. ءبىر جاعىنان ارمانىمنىڭ ازدان سوڭ ورىندالاتىنىنا قاتتى قۋانسام، ەكىنشى ءبىر جاعىنان وتانىمدى، تۋعان-تۋىستارىمدى قيماستىق سەزىمى پايدا بولدى. وسىنداي سەزىممەن اۋە كولىگىنە كوتەرىلدىم. بىرنەشە ساعات وتكەن سوڭ، مەجەلى ورىنعا بەيجىڭگە كەلىپ جەتتىك. بەيجىڭ - قىتايعا ساياحاتىمنىڭ العاشقى ايالداماسى بولعان سوڭ، مەن ءۇشىن وتە ىستىق قالا، جادىمدا ماڭگى وشپەس ءىز قالدىردى. بەيجىڭ - قىتايدىڭ استاناسى بولىپ قانا قويماي، تاريحي جانە مادەني ورتالىعى بولىپ تابىلادى. بەيجىڭ كوشەلەرىندە قىتايدىڭ تاريحى مەن مادەنيەتى جونىندە سىر شەرتەتىن جادىگەرلەر مەن زاماناۋي قۇرىلىستار كەرەمەت ۇيلەسىمدىلىكتە جاتىر. استانالىق ومىرمەن جەتە تانىسىپ، ۇلكەن اسەر العان ءبىز، ەندى قىتايدىڭ ەكونوميكالىق ورتالىعى - شانحاي قالاسىنا جول تارتتىق. شانحاي - قىتايدىڭ اسىل مارجانى، وتە تەز قارقىنمەن دامىپ كەلە جاتقان ەكونوميكا جانە ساۋدا ورتالىعى بولىپ تابىلادى. ءتىپتى، قىتايدىڭ نيۋ-يوركى دەپ ايتساق، ارتىق ايتپايمىز. تۇنگى قالا كورىنىستەرى تاماشا، كوشە بويى جارىق شامدار، ءتىپتى قۇرىلىستاردىڭ قابىرعالارى دا ۇلكەن تەلەديدار ەكراندارىنا اينالعان. اسپانداعى جۇلدىزدارعا قاراماساڭ، ءتىپتى مەزگىلدىڭ ءتۇن ەكەنىن ۇمىتىپ تا كەتەسىڭ. راسىمەن دە، شانحاي جوعارى دەڭگەيدە دامىعان، بولاشاعىنان زور ءۇمىت كۇتتىرەتىن قالا، الداعى ەكى-ۇش جىلدا الەمنىڭ ماڭىزدى ەكونوميكالىق ورتالىعىنا اينالارى ءسوزسىز. ساپارىمىزدىڭ كەلەسى بەكەتى - چينداو قالاسى. چينداو قىتايدىڭ تۋريستتىك قالاسى، بۇل قالاعا الەمنىڭ تۇكپىر تۇكپىرىنەن، سونىمەن قوسا قىتايدىڭ وزگە دە اۋداندارىنان تۋريستتەر اعىلىپ كەلەدى.
باستى سەبەپ - سارى تەڭىز سۋىنا شومىلۋ، جاعاجايدا دەمالۋ. ءبىزدىڭ دە باستى ماقساتىمىز سول ەدى. چينداوعا كەلە سالا، سارى تەڭىز جاعالاۋىنا بەتتەدىك. كەيىن، تەڭىز تاعامدارىمەن تاماقتاندىق. اشىق تەڭىزدەن جىراقتا تۇراتىن بىزگە چينداو تاعامدارى ەكزوتيكالىق بولىپ كورىندى، الايدا وتە ءدامدى، ءارى پايدالى. وسىلايشا، ءبىزدىڭ قىتايعا ساياحاتىمىز اياقتالدى. بۇل ساپاردان العان تاجىريبەمىز بەن تۇيگەن ويلارىمىز بولاشاقتا ماڭىزدى ءرول اتقارارى ايتپاسا دا تۇسىنىكتى. الايدا، باستىسى جۇڭگو ءتىلىن ۇيرەنۋشى بىزدەرگە بۇل ساپار ءبىلىمىمىزدى جەتىلدىرىپ، قازاق-قىتاي قارىم-قاتىناسىن نىعايتۋ سالاسىندا ايانباي ەڭبەك اتقارۋعا تۇرتكى بولارى ءسوزسىز. وسى ساپاردى ۇيىمداستىرۋشى قحر قازاقستانداعى باس كونسۋلدىعىنا، ساپارعا بارۋعا مۇمكىندىك بەرگەن كيەلى شاڭىراعىمىز ءال - فارابي اتىنداعى قازۇۋ-ىما جانە شىعىستانۋ فاكۋلتەتى مەن جۇڭگو ءتىلىن ۇيرەتكەن ۇستازدارىما ۇلكەن العىس بىلدىرەمىن!
سارتوۆا ا.، قازۇۋ، شىعىستانۋ فاكۋلتەتىنىڭ ستۋدەنتى
شارىپقازى ن.، قازۇۋ، شىعىستانۋ فاكۋلتەتىنىڭ وقىتۋشىسى
