شىعىس قازاقستان وبلىسىندا ەكولوگيالىق مادەنيەتتى دامىتۋعا ارنالعان بەس جىلدىق جوسپار بەكىتىلدى. جوسپار 2024–2029 جىلدارعا ارنالعان جانە حالىقتىڭ ەكولوگيالىق ساناسىن، ءبىلىمىن ارتتىرۋ مەن اقپاراتتاندىرۋعا باعىتتالعان 44 ءىس-شارانى قامتيدى. بۇل تۋرالى شقو تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ەلامان مۇحتارحانوۆ وڭىرلىك كوممۋنيكاسيالار قىزمەتى الاڭىندا مالىمدەدى، دەپ حابارلايدى Dalanews.kz
قۇجات ق ر ۇكىمەتى بەكىتكەن مەملەكەتتىك تۇجىرىمداماعا سايكەس ازىرلەنىپ، 2024 جىلدىڭ جەلتوقسانىندا ەكولوگيا جانە تابيعي رەسۋرستار مينيسترلىگىمەن كەلىسىلگەن. رەسمي تۇردە 2025 جىلدىڭ 9 ساۋىرىندە وبلىستىق ءماسليحاتتىڭ سەسسياسىندا بەكىتىلدى. تۇجىرىمدامانىڭ ماقساتى – حالىقتىڭ قورشاعان ورتا مەن تابيعي رەسۋرستارعا جاۋاپكەرشىلىكپەن قاراۋىن قالىپتاستىرۋ.
ەكولوگيالىق ويلاۋ مەن مىنەز-قۇلىقتى قالىپتاستىرۋ باعىتىندا ەكولوگيالىق قۇقىق بۇزۋشىلىقتاردى تىركەيتىن قوسىمشا كامەرالار ورناتۋ، اۋا ساپاسىن ونلاين باقىلاۋ جۇيەسىن دامىتۋ، وبلىس ورتالىقتارىندا سۋمەن جابدىقتاۋ جانە سۋ بۇرۋ جۇيەسىن سيفرلاندىرۋ كوزدەلگەن. سونداي-اق تۇرمىستىق قالدىقتاردى سۇرىپتاۋ جانە قايتا وڭدەۋ جوبالارى، قالالار مەن ءىرى ەلدى مەكەندەردە سۋ ۇنەمدەۋ تەحنولوگيالارىن ەنگىزۋ، ەلەكتروموبيلدەردى پايدالانۋ ءۇشىن جاعداي جاساۋ، ەكوبوكستار مەن فاندوماتتار ورناتۋ جوسپارلانعان.
ەكولوگيالىق ءبىلىم بەرۋ مەكتەپ وقۋشىلارىن دا، پەداگوگتاردى دا قامتيدى. وڭىردە ەكولوگيالىق تاقىرىپتاعى شىعارمالار مەن جوبالار كونكۋرستارى، «جاسىل بالاباقشا» سەكىلدى ءبىلىم بەرۋ باعدارلامالارى ىسكە اسىرىلادى. سونىمەن قاتار، «مەن – زەرتتەۋشىمىن» وقۋشىلار بايقاۋى، «تابيعاتتى ايالا» اتتى جاس ولكەتانۋشىلار، ەكولوگتار مەن ناتۋراليستەردىڭ وبلىستىق فورۋمى وتكىزىلەدى. مۇعالىمدەرگە ەكولوگيالىق تاربيە بويىنشا بىلىكتىلىك ارتتىرۋ كۋرستارى ۇيىمداستىرىلادى، ال مەكتەپتەردە ءبىرىڭعاي تاربيە باعدارلاماسى اياسىندا تۇراقتى تۇردە سىنىپ ساعاتتارى وتكىزىلەدى.
اقپاراتتىق-اعارتۋشىلىق جۇمىس جوسپاردا ەرەكشە ورىن الادى. بۇل باعىتتا ەكولوگيالىق بەينەروليكتەر مەن فيلمدەر شىعارۋ، مادەني ءىس-شارالار، اكسيالار مەن ب ا ق وكىلدەرى قاتىساتىن جينالىستار وتكىزۋ كوزدەلگەن. جوسپارلانعان باستامالار قاتارىندا – «World Clean-Up Day» حالىقارالىق اكسياسىنا قاتىسۋ، «ساياباقتار شەرۋى» تابيعاتتى قورعاۋ شاراسى، ەكولوگيالىق ۆولونتەرلىكتى ناسيحاتتاۋ جانە قورشاعان ورتانى لاستاۋعا، ەكولوگيالىق قۇقىق بۇزۋشىلىقتارعا «نولدىك توزىمدىلىك» مادەنيەتىن قالىپتاستىرۋ بار.
بارلىق ءىس-شارالار بەكىتىلگەن مەرزىمدەرگە سايكەس جۇزەگە اسىرىلادى جانە ۋاكىلەتتى ورگانداردىڭ تۇراقتى باقىلاۋىندا بولادى. وڭىرلىك جوسپار قالا جانە اۋدان اكىمدىكتەرىنە، سونداي-اق بارلىق جاۋاپتى مەملەكەتتىك ورگاندارعا ناقتى ىسكە اسىرۋ ءۇشىن جولداندى. قابىلدانعان شارالار ءوڭىردىڭ تۇراقتى ەكولوگيالىق دامۋىنا بەرىك نەگىز قالايدى جانە حالىقتى ەكولوگيالىق باعىتتالعان بولاشاقتى قالىپتاستىرۋعا تارتۋعا مۇمكىندىك بەرەدى.
