بۇل تۋرالى شقو جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى ەربولات وشاقبايەۆ مالىمدەدى.
باسقارما باسشىسىنىڭ ايتۋىنشا، وبلىستىڭ بارلىق قالالارى مەن اۋداندارىندا قونىس اۋدارعان ازاماتتارعا مەملەكەتتىك قولداۋ كورسەتىلىپ، وتباسىنىڭ ءار مۇشەسىنە كوشۋ، باسپانا جالداۋ، كوممۋنالدىق تولەمدەر ءۇشىن سۋبسيديا تۇرىندە ماتەريالدىق كومەك قاراستىرىلعان.
سونداي-اق، بىردەن جۇمىسپەن قامتىلادى.
كەي قالالار مەن اۋدانداردا تەگىن باسپانا مەن جەر تەلىمدەرى، ۇساق ءمۇيىزدى مال باسى، ودان بولەك، ءوز كاسىبىن اشۋعا دا سۋبسيديا بەرىلۋى مۇمكىن.
وسى مۇمكىندىكتەردى ارىس قالاسىنىڭ تۇرعىندارىنا پايدالانۋعا بولادى ەكەن.
ەستەرىڭىزگە سالا كەتسەك، تۇركىستان وبلىسىنداعى ارىس قالاسىندا جارىلىس بولىپ، توتەنشە جاعداي جاريالاندى. قالا تۇرعىندارى كورشىلەس ەلدى مەكەندەرگە ەۆاكۋاسيالاندى.
-بۇگىنگى تاڭدا وسى ماقساتتارعا بىزگە رەسپۋبليكالىق بيۋدجەتتەن 736 ميلليون تەڭگە ءبولىنىپ وتىر. 1566 ادامعا كۆوتا بەرىلگەن. 1528 بوس ورىن بار.
ەگەر ارىس قالاسىنان شقو-عا قونىس اۋدارۋعا نيەت بىلدىرگەن ازاماتتاردىڭ سانى ارتا تۇسسە، رەسپۋبليكادان كۆوتا سانىن كوبەيتۋدى سۇرايمىز.
ونداي ماسەلەلەر شەشۋگە بولادى. كەز-كەلگەن ۋاقىتتا ارىس قالاسىنا بارىپ، بوس ورىن قىزمەتتەرىنىڭ جارمەڭكەسىن ۇيىمداستىرۋعا، جەرگىلىكتى حالىقپەن ءتۇسىندىرۋ جۇمىستارىن جۇرگىزۋگە دايىن وتىرمىز. 1000 ادامدى قابىلداي الامىز، - دەيدى ەربولات وشاقبايەۆ.
كوشىپ كەلگەن ازاماتتار بىردەن جۇمىسپەن قامتىلادى. جالاقى مولشەرى 80 مىڭ تەڭگەدەن كەم ەمەس. وتباسىنداعى بالالار كەزەكتەن تىس مەكتەپ پەن بالاباقشاعا ورنالاستىرىلىپ، تەگىن تاماق جانە مەكتەپ فورماسى سەكىلدى قاجەتتىلىكتەرمەن قامتاماسىز ەتىلەدى. قوسىمشا كومەك رەتىندە تۇرعىن ءۇي بەرۋ، ونى دايىنداۋ، جوندەۋ جۇمىستارىن جۇرگىزۋ، قوي-ەشكى سەكىلدى ۇساق ءمۇيىزدى مال بەرۋ قاراستىرىلعان. سونىمەن قاتار، بەرىلگەن سۋبسيدياداعى قاراجاتتى جيناپ، قالاعان باسپاناسىن ساتىپ الۋ مۇمكىندىگى دە بار.
-اسىرەسە، التاي، ريددەر، زايسان، اياگوز قالالارى مەن جارما، كوكپەكتى اۋداندارىندا قونىس اۋدارۋشىلارعا اسا جاقسى جاعداي جاسالۋدا، - دەيدى باسقارما باسشىسى.
ايماققا اسا قاجەت ماماندىقتار: اگرونوم، پەداگوگ، بالاباقشا كۇتۋشىلەرى، مەديسينالىق قىزمەتكەرلەر، مارال ءوسىرۋشى، جۇرگىزۋشىلەر (ۆ، س، D كاتەگوريالارى بويىنشا)، حورەوگرافيا، ان-كۇي ماماندارى، ينفورماتيكا، اعىلشىن ءتىلى، حيميا، بيولوگيا پاندەرىنىڭ ماماندارى.
https://youtu.be/JhXYBCGjzkM
