ناقتىلاپ ايتقاندا 10 ادامنان تۇراتىن مەدبريگادان بولەك، قىتايدان جەتكەن گۋمانيتارلىق كومەكتىڭ تاسىمالىنا «شيەۆرون» كومپانياسى قارجىلاي ءارى تەحنيكالىق قولداۋ كورسەتتى.
بۇدان بۇرىن جۇڭگو باسشىسى سي سزينپينمەن تەلەفون ارقىلى تىلدەسكەن قازاقستان پرەزيدەنتى قاسىم-جومارت توقايەۆ اتالعان مەدبريگادانى ەلىمىزگە جىبەرۋ تۋرالى ءسوز بايلاسقان.
دەنساۋلىق ساقتاۋ مينيسترلىگى قوعامدىق دەنساۋلىق دەپارتمەنتى ديرەكتورى ماعريپا ەمبەرگەنوۆانىڭ پىكىرىنشە جۇڭگو دارىگەرلەرى شىڭجاڭدا كوروناۆيرۋسكە قارسى كۇرەسىپ، ابدەن شىڭدالعان.
وسىناۋ دەلەگەسيامەن بىرگە قىتايدان قازاقستانعا 5،5 توننا گۋمانيتارلىق كومەك، ونىڭ ىشىندە دارى-دارمەك، مەد.ماسكا جانە مەد.تەحنيكا قوسا جەتتى.
وسى ساپاردى ۇيىمداستىرۋشىلاردىڭ ءبىرى كولۋمبيا ۋنيۆەرسيتەتى جانىنداعى ICAP ورتالىعىنىڭ ورتا ازيا بويىنشا ديرەكتورى اننا دەريابينانىڭ ايتۋىنشا جۇڭگو دارىگەرلەرىنىڭ قازاقستانعا كەلۋى "شيەۆرون" كومپانياسىنىڭ قارجىلاي قولداۋى ارقاسىندا جۇزەگە اسقان.
«بيىل ءبىزدىڭ ورتالىق «شيەۆرون» كومپانياسىنان گرانت الدى. جوبانىڭ باستى ماقساتى – دەنساۋلىق ساقتاۋ مينيسترلىگىمەن بىرلەسە وتىرا، ءازىر ۆيرۋسكە قارسى كۇرەسىپ جاتقان قازاقستاندىق دارىگەرلەر مەن مەد.ورتالىقتاردىڭ الەۋەتىن ارتتىرۋ ەدى.
مىنەكەي، كوروناۆيرۋسكە قارسى كۇرەستە مول تاجىريبەسى بار جۇڭگو ماماندارىن قازاقستانعا شاقىرۋ – وسىناۋ جوبا اياسىندا وتكىزىلگەن العاشقى شارا بولدى»، – دەيدى ول.
ءىسار ورتالىعى مەديسينا سالاسىندا يننوۆاسيالىق جوبالار ازىرلەپ، ونى قولدانىسقا ەنگىزۋمەن اينالىسادى. 2011 جىلدان بەرى ءىسار قازاقستان دەنساۋلىق ساقتاۋ مينيسترلىگىمەن ۆيچ-ينفەكسيا جوبالارىنىڭ ناتيجەسىن ارتتىرۋ بويىنشا بىرلەسىپ جۇمىس جۇرگىزۋدە.
ال ەلىمىزگە تابان تىرەگەن جۇڭگو دارىگەرلەرى كوروناۆيرۋسپەن كۇرەستە بىلگەنىن بولىسۋگە ءازىر وتىر. ولار قازاقستاندا 15 كۇن بولادى.
«قىتايدان ارنايى كەلگەن مەدبريگادا شىڭجاڭدا كوروناۆيرۋسكە قارسى كۇرەسىپ، شىڭدالعان دارىگەرلەر. ولاردىڭ اراسىندا ازىرگى كۇنى اۋاداي قاجەت پۋلمونولوگتار، ەپيدەميولوگتار، ينفەكسيونيستەر، نيەۆرولوگتار جانە باسقا دا جوعارى ساناتتى ماماندار بار.
15 كۇن ىشىندە ولار نۇر-سۇلتان، الماتى جانە قاراعاندى قالالارىنداعى اۋرۋحانالارعا بارىپ، ونداعى قاۋىپسىزدىك شاراسىمەن تانىسادى ءارى دارىگەرلەرگە ارناپ ونلاين ءدارىس وتكىزەدى»، – دەيدى اننا دەريابينا.
بۇدان بولەك قىتايدان جەتكەن ارنايى بريگادا كوروناۆيرۋستىڭ دارىگەرلەر اراسىندا تارالۋىنا توسقاۋىل بولاتىن ادىس-امالدارمەن بولىسپەك.
«ۆيرۋس قىتايدا 3 مىڭنان اسا دارىگەرگە جۇقتى. ونىڭ 90 پايىزى ۋحاننان انىقتالدى. كەيىننەن دارىگەرلەر اراسىندا ءتۇسىندىرۋ جۇمىسىن جۇرگىزىپ، ولاردىڭ ناۋقاسپان بايلانىس ورناتۋعا قاتىستى ساۋاتىن ارتتىرىپ، قاجەتتى كەرەك-جاراقپەن قامتاماسىز ەتتىك.
سونىڭ ناتيجەسىندە ۆيرۋس جۇقتىرعان دارىگەرلەر سانىن ازايتتىق»، – دەيدى وسى دەلەگاسيا قۇرامىنداعى جۇقپالى اۋرۋلار دارىگەرى لۋ سياوبو.
قازاقستاندا كوروناۆيرۋس جۇقتىرعان دارىگەرلەر سانى 120، ولاردىڭ 67ء-ى ۆيرۋس جۇقتىرعان ازاماتتارعا تىكەلەي كومەك كورسەتكەن.
بۇدان بۇرىن دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس جۇقتىرعان قازاقستاندىقتاردىڭ 80 پايىزى اۋرۋدى جەڭىل وتكەرۋدە ەكەنىن ايتقان. الايدا ىندەتتىڭ شارىقتاۋ شەگىنە ءالى جەتپەگەنىمىزدى ەسكە سالعان-تىن. ءبىرتانوۆ الداعى 2 اپتا ەل ءۇشىن وتە اۋىر بولاتىنىن ەسكەرتكەن.
ەل پرەزيدەنتى قاسىم-جومارت توقايەۆتىڭ بۇيرىعىمەن قازاقستانداعى توتەنشە جاعداي 30 ساۋىرگە دەيىن سوزىلدى. مەملەكەت باسشىسى سونىمەن قاتار نۇر-سۇلتان، الماتى ءجانا شىمكەنت قالاسىنداعى كارانتيندى ايدىڭ اياعىنا دەيىن ۇزارتۋ تۋرالى شەشىم قابىلدادى.
ءدال ءقازىر قازاقستاندا كوروناۆيرۋس جۇقتىرعان ادام سانى 800-دەن استى، ولاردىڭ ىشىندە 17 ادام اۋىر حالدە جاتىر.
«قىتايدان كەلگەن مەدبريگادا ەلدىڭ وسى ىندەتتەن تەزىرەك ارىلۋىنا اتسالىسادى. ولاردىڭ ۆيرۋستى انىقتاۋداعى شاپشاڭدىعى، ەم-دوم تاسىلدەرى جانە ينفەكسيانىڭ تارالۋىن باقىلاۋ جولدارى ناتيجەسىن بەرەدى دەپ سەنەيىك. وسى ىسكە بارىنشا قولداۋ كورسەتكەن «شيەۆرون» كومپانياسىنا العىسىمدى بىلدىرەمىن"، - دەيدى اننا دەريابينا.
ايتا كەتەلىك بۇدان بۇرىن «شيەۆرون» كومپانيانىڭ قارجىلاي قولداۋىمەن الماتى قالاسىنداعى كلينيكالىق ينفەكسيالىق بالالار اۋرۋحاناسىنا جالپى قۇنى 71،8 ملن تەڭگەنى قۇرايتىن جاڭا ەكى جاساندى تىنىس الۋ اپپاراتتارى تابىستالعان.
