جوبانىڭ باستى ماقساتى – ق ر دەنساۋلىق ساقتاۋ مينيسترلىگىنە مەديسينالىق مەكەمەلەردىڭ ينفەكسيانى دياگنوستيكالاۋ، ەمدەۋ، الدىن الۋ جانە ينفەكسيالىق باقىلاۋ بويىنشا الەۋەتىن ارتتىرۋعا قولداۋ كورسەتۋ بولىپ تابىلادى.
جوبانى الماتى قالاسىندا ىسكە اسىرۋ ءۇشىن ICAP الماتى قالاسىنىڭ قوعامدىق دەنساۋلىق ساقتاۋ باسقارماسىمەن (قدسب) ىنتىماقتاستىق تۋرالى مەموراندۋمعا جانە «جوعارى مەديسينالىق كوللەدج» شجق مكك-مەن قدسب COVID-19 ەپيدەمياسىندا ارەكەت ەتۋ جۇمىستارىنا تارتاتىن مەديسينالىق جانە مەديسينالىق ەمەس جۇمىسكەرلەردى بىرلەسىپ وقىتۋ تۋرالى مەموراندۋمعا قول قويدى.
10 شىلدەدە COVID-19 ۆيرۋسىن ەمدەۋ بويىنشا جاڭا ستاسيوناردىڭ جۇمىسىنا جۇمىلدىرىلعان مەديسينالىق قىزمەتكەرلەرگە ارنالىپ جوسپارلانعان ونلاين سەمينارلاردىڭ ەكەۋى ءوتتى.
كىرىسپە سەمينارلاردا COVID-19 ەپيدەميولوگياسىنا قاتىستى اقپارات بەرىلىپ، ينفەكسيانىڭ الدىن الۋ جانە COVID-19 ەپيدەمياسى جاعدايىندا ينفەكسيالىق باقىلاۋ بويىنشا شارالار تۇسىندىرىلەدى. وعان شاعىن جانە ورتا مەديسينا پەرسونالى اراسىنان شامامەن 50 ادام قاتىسقانىن ايتا كەتۋىمىز كەرەك.
سەميناردا جەكە قورعانىس قۇرالدارىن كيۋ جانە شەشۋ داعدىلارىن نىعايتۋ بويىنشا تاجىريبەلىك ساباقتار «حالىق ارەنا» كەشەنىندە ۇيىمداستىرىلدى. الداعى سەمينارلار دارىگەرلەرگە ارنالىپ، اق حالاتتى ابزال جاندار COVID-19 ۆيرۋسىمەن اۋىرعان پاسيەنتتەردى كۇتۋ مەن ەمدەۋ بويىنشا بىلىكتىلىكتەرىن جەتىلدىرەدى.
ۇيىمداستىرۋشىلار بۇل وقۋ ورتا جانە كىشى مەديسينا پەرسونالىنىڭ COVID-19 پاسيەنتتەرىنە كومەك كورسەتۋ مەن ەمدەۋدى ۇيىمداستىرۋ، مەديسينالىق مەكەمەلەردە الدىن الۋ جانە ەپيدەمياعا قارسى شارالار وتكىزۋ ماسەلەلەرى بويىنشا ءبىلىمى مەن داعدىلارىن ارتتىراتىنا سەنىمدە.
سونىمەن قاتار وقۋ بارىسىندا، مەديسينالىق پەرسونالدىڭ كوروناۆيرۋستىق ينفەكسيانى جۇقتىرۋىنا جول بەرمەۋدە ماڭىزدى ءرول اتقاراتىن، مەديسينالىق قىزمەتكەرلەردىڭ ستاندارتتى ساقتىق شارالارىن ورىنداۋىنا جانە جەكە قورعانىس قۇرالدارىن دۇرىس پايدالانۋىنا ەرەكشە نازار اۋدارىلادى.
قازاقستان رەسپۋبليكاسىمەن 27 جىلدان استام بويعى سەرىكتەستىك بارىسىندا «شيەۆرون» كومپانياسى جەرگىلىكتى مەديسينالىق مەكەمەلەردىڭ ينفراقۇرىلىمدارىن جاقسارتۋعا جانە قازاقستاندىق دارىگەرلەردىڭ الەۋەتىن دامىتۋعا باعىتتالعان كوپتەگەن جوبالاردى ىسكە اسىرىپ كەلەدى.
بيىلعى جىلدىڭ ناۋرىزىندا كومپانيا الماتى بالالار ينفەكسيالىق اۋرۋحاناسىندا COVID–19 ۆيرۋسىنا شالدىققان پاسيەنتتەردى ەمدەۋ ءۇشىن ەكى جوعارى تەحنولوگيالىق يۆل (وكپەنى جاساندى جەلدەتۋ) اپپاراتىن ورناتتى. سونىمەن قاتار ءساۋىر ايىندا «شيەۆرون» ICAP ورتالىعىمەن بىرگە دەنساۋلىق ساقتاۋ مينيسترلىگىنە قىتايدان COVID–19 بويىنشا ماماندار دەلەگاسياسىنىڭ ساپارىن ۇيىمداستىرۋعا كومەكتەستى.
مامىر-ماۋسىم ايلارىندا كومپانيا الماتى قالاسى مەديسينالىق قىزمەتكەرلەرىن قورعاۋ ءۇشىن 70 000 رەسپيراتور ماسكا جانە 2 850 جەكە قورعانىس قۇرالدارىنىڭ تولىق جيىنتىعىن ساتىپ الىپ تاپسىرۋعا كومەكتەستى.
ICAP ورتالىعى اقش، نيۋ-يورك قالاسىنداعى مەيلمان اتىنداعى كولۋمبيا ۋنيۆەرسيتەتىنىڭ قوعامدىق دەنساۋلىق ساقتاۋ مەكتەبىنىڭ بولىگى. ورتالىق جۇمىسىنىڭ نەگىزگى ماقساتى وتباسىلار مەن قاۋىمداستىقتار دەنساۋلىعىن جاقسارتۋ بولىپ تابىلادى.
بۇگىنگى تاڭدا ICAP 30-دان استام ەلدە دەنساۋلىق مينيسترلىكتەرىنە دەنساۋلىق ساقتاۋ جۇيەلەرىن نىعايتۋ، مەديسينا قىزمەتكەرلەرىن وقىتۋ، دەنساۋلىق ساقتاۋ سالاسىندا يننوۆاسيالىق ادىستەردى ازىرلەۋ جانە ءىس جۇزىندە پايدالانۋ سالاسىندا كونسۋلتاسيالىق-ادىستەمەلىك كومەك كورسەتەتىن جانە ءىرى اۋقىمدى زەرتتەۋ جوبالارىن جۇرگىزەتىن ءىرى حالىقارالىق ۇيىم.
قازاقستان رەسپۋبليكاسىندا ICAP 2011 جىلدان بەرى ايتۆ ينفەكسيالارى بويىنشا باعدارلامالاردىڭ تيىمدىلىگىن ارتتىرۋ ماسەلەلەرى بويىنشا دەنساۋلىق ساقتاۋ مينيسترلىگىمەن تىعىز جۇمىس ىستەپ كەلەدى.
اننا دەريابينا
