Jobanyń basty maqsaty – QR Densaýlyq saqtaý mınıstrligine medısınalyq mekemelerdiń ınfeksıany dıagnostıkalaý, emdeý, aldyn alý jáne ınfeksıalyq baqylaý boıynsha áleýetin arttyrýǵa qoldaý kórsetý bolyp tabylady.
Jobany Almaty qalasynda iske asyrý úshin ICAP Almaty qalasynyń Qoǵamdyq densaýlyq saqtaý basqarmasymen (QDSB) yntymaqtastyq týraly memorandýmǵa jáne «Joǵary medısınalyq kolej» SHJQ MKK-men QDSB COVID-19 epıdemıasynda áreket etý jumystaryna tartatyn medısınalyq jáne medısınalyq emes jumyskerlerdi birlesip oqytý týraly memorandýmǵa qol qoıdy.
10 shildede COVID-19 vırýsyn emdeý boıynsha jańa stasıonardyń jumysyna jumyldyrylǵan medısınalyq qyzmetkerlerge arnalyp josparlanǵan onlaın semınarlardyń ekeýi ótti.
Kirispe semınarlarda COVID-19 epıdemıologıasyna qatysty aqparat berilip, ınfeksıanyń aldyn alý jáne COVID-19 epıdemıasy jaǵdaıynda ınfeksıalyq baqylaý boıynsha sharalar túsindiriledi. Oǵan shaǵyn jáne orta medısına personaly arasynan shamamen 50 adam qatysqanyn aıta ketýimiz kerek.
Semınarda jeke qorǵanys quraldaryn kıý jáne sheshý daǵdylaryn nyǵaıtý boıynsha tájirıbelik sabaqtar «Halyq Arena» kesheninde uıymdastyryldy. Aldaǵy semınarlar dárigerlerge arnalyp, aq halatty abzal jandar COVID-19 vırýsymen aýyrǵan pasıentterdi kútý men emdeý boıynsha biliktilikterin jetildiredi.
Uıymdastyrýshylar bul oqý orta jáne kishi medısına personalynyń COVID-19 pasıentterine kómek kórsetý men emdeýdi uıymdastyrý, medısınalyq mekemelerde aldyn alý jáne epıdemıaǵa qarsy sharalar ótkizý máseleleri boıynsha bilimi men daǵdylaryn arttyratyna senimde.
Sonymen qatar oqý barysynda, medısınalyq personaldyń koronavırýstyq ınfeksıany juqtyrýyna jol bermeýde mańyzdy ról atqaratyn, medısınalyq qyzmetkerlerdiń standartty saqtyq sharalaryn oryndaýyna jáne jeke qorǵanys quraldaryn durys paıdalanýyna erekshe nazar aýdarylady.
Qazaqstan Respýblıkasymen 27 jyldan astam boıǵy seriktestik barysynda «Shevron» kompanıasy jergilikti medısınalyq mekemelerdiń ınfraqurylymdaryn jaqsartýǵa jáne qazaqstandyq dárigerlerdiń áleýetin damytýǵa baǵyttalǵan kóptegen jobalardy iske asyryp keledi.
Bıylǵy jyldyń naýryzynda kompanıa Almaty balalar ınfeksıalyq aýrýhanasynda COVID–19 vırýsyna shaldyqqan pasıentterdi emdeý úshin eki joǵary tehnologıalyq IVL (ókpeni jasandy jeldetý) apparatyn ornatty. Sonymen qatar sáýir aıynda «Shevron» ICAP ortalyǵymen birge Densaýlyq saqtaý mınıstrligine Qytaıdan COVID–19 boıynsha mamandar delegasıasynyń saparyn uıymdastyrýǵa kómektesti.
Mamyr-maýsym aılarynda kompanıa Almaty qalasy medısınalyq qyzmetkerlerin qorǵaý úshin 70 000 respırator maska jáne 2 850 jeke qorǵanys quraldarynyń tolyq jıyntyǵyn satyp alyp tapsyrýǵa kómektesti.
ICAP ortalyǵy AQSH, Nú-Iork qalasyndaǵy Meılman atyndaǵy Kolýmbıa ýnıversıtetiniń qoǵamdyq densaýlyq saqtaý mektebiniń bóligi. Ortalyq jumysynyń negizgi maqsaty otbasylar men qaýymdastyqtar densaýlyǵyn jaqsartý bolyp tabylady.
Búgingi tańda ICAP 30-dan astam elde densaýlyq mınıstrlikterine densaýlyq saqtaý júıelerin nyǵaıtý, medısına qyzmetkerlerin oqytý, densaýlyq saqtaý salasynda ınovasıalyq ádisterdi ázirleý jáne is júzinde paıdalaný salasynda konsýltasıalyq-ádistemelik kómek kórsetetin jáne iri aýqymdy zertteý jobalaryn júrgizetin iri halyqaralyq uıym.
Qazaqstan Respýblıkasynda ICAP 2011 jyldan beri AITV ınfeksıalary boıynsha baǵdarlamalardyń tıimdiligin arttyrý máseleleri boıynsha Densaýlyq saqtaý mınıstrligimen tyǵyz jumys istep keledi.
Anna DERÁBINA
