بۇگىن سقو اكىمى عاۋەز نۇرمۇحامبەتوۆتىڭ رەسەيلىك «ۋا» كومپانياسىنىڭ باسقارۋشى ديرەكتورى ەلەنا فيليپپوۆا جانە «گريندار» كومپانياسىنىڭ ديرەكتورى ەۆگەنيي ۋساچەنكومەن كەزدەسۋى ءوتتى،– دەپ حابارلايدى Dalanews.kz
جۇزدەسۋ بارىسىندا وبلىس اۋداندارىندا ورگانيكالىق تىڭايتقىشتار وندىرەتىن بىرنەشە زاۋىت سالۋ جونىندەگى ينۆەستيسيالىق جوبا تالقىلاندى. جوبا ديقانداردى ساپالى تىڭايتقىشتارمەن قامتاماسىز ەتپەك.
"مەملەكەت تاراپىنان شەتەلدىك ينۆەستورلارعا جوبانى قىسقا مەرزىمدە ىسكە اسىرۋ ءۇشىن بارلىق قاجەتتى كومەك كورسەتىلەدى. ءبىز بارلىق ينۆەستورلارعا جوبانى يدەيادان باستاپ جوبالىق قۋاتقا شىققانعا دەيىنگى بارلىق كەزەڭدەرىندە قولداۋ بىلدىرەمىز"، - دەپ اتاپ ءوتتى ءوڭىر باسشىسى.
وبلىستا جىل سايىن توپىراقتىڭ قۇنارلىلىعىن ارتتىرىپ، ونىمدىلىكتى كوبەيتۋ ماقساتىندا مينەرالدىق تىڭايتقىشتاردى ەنگىزۋ كولەمى ءوسىپ كەلەدى. تەك بيىل 333 مىڭ توننا مينەرالدىق تىڭايتقىش ەنگىزىلەدى. وسى ورايدا جاڭا كاسىپورىننىڭ سالىنۋى ءوڭىردىڭ اگروونەركاسىپتىك كەشەنىنىڭ دامۋىنا ەلەۋلى ۇلەس قوسپاق.
