شەرزات بولاتتى ءولتىرۋ ءىسى بويىنشا قارالىپ جاتقان سوتتا قوعامدا ۇلكەن رەزونانس تۋدىرعان ۆيدەوعا بايلانىستى تەكسەرۋ باستالدى، دەپ حابارلايدى Dalanews.kz.
بۇعان ينتەرنەتتە سوتتالۋشىلاردىڭ سوت زالىنداعى شىنى كابينادان كۇلىپ شىققان كەزى تۇسىرىلگەن بەينەجازبانىڭ تارالۋى تۇرتكى بولعان. TikTok جەلىسىنە جۇكتەلگەن بۇل ۆيدەو جۇرتشىلىقتىڭ تەرىس رەاكسياسىن تۋعىزىپ، ءىس بويىنشا قوعامدىق قىسىمدى كۇشەيتتى.
5 مامىردا وتكەن سوت وتىرىسىندا ايىپتالۋشىلاردىڭ قورعاۋشىلارى ۆيدەونىڭ تارالۋىنا ىقپال ەتكەن ادام رەتىندە سوت پروسەسىنىڭ ءبىر قاتىسۋشىسىن كورسەتتى.
– مەن تۇسىنبەدىم، ول تۇستە بولدى ما، الدە كەيىن بە، تورتەۋىنىڭ ءجاي عانا كۇلىمسىرەگەنىن كوردىك. ءبىز ولاردىڭ نەگە كۇلىپ تۇرعانىن بىلمەيمىز. بۇل ۆيدەونى TikTok-قا جاريالاپ جىبەرگەن، ەندى ول جاقتا نەشە ءتۇرلى پىكىر جازىلۋدا. مۇنى ەسكەرۋلەرىڭىزدى سۇرايمىن، – دەدى پروسەستىڭ ءبىر قاتىسۋشىسى.
بەينەجازبانى تاراتۋى مۇمكىن ازامات ءوز كەزەگىندە بۇل ايىپتى جوققا شىعاردى. ول جابىرلەنۋشى تاراپتىڭ ادۆوكاتى مەيىرمان شەكەيەۆتىڭ موبيلوگرافى ەكەنىن، سوت پروسەسىنە العاشقى وتىرىستان بەرى قاتىسىپ كەلە جاتقانىن ايتتى. ونىڭ ايتۋىنشا، ول سوتتالۋشىلاردى مۇلدە تۇسىرمەگەن جانە تۇسىرۋگە قاتىستى شەكتەۋلەردى جاقسى بىلەدى. سونداي-اق داۋ تۋعىزعان ۆيدەونىڭ كولدەنەڭ فورماتتا، شتاتيۆ ارقىلى تۇسىرىلگەن بولۋى مۇمكىن ەكەنىن، ال ءوزى تەك قولمەن تۇسىرەتىنىن جەتكىزدى. ۆيدەو YouTube فورماتىنا بەيىمدەلگەن.
سوت ءتوراعاسى ەرجان جانۇزاقوۆ بۇل جاعدايعا بايلانىستى تەكسەرۋ جۇرگىزىلىپ جاتقانىن مالىمدەدى.
"اتالعان فاكتى بويىنشا سوت تەكسەرۋ جۇرگىزىپ جاتىر. ناتيجەسى تۋرالى سىزدەرگە قوسىمشا حابارلانادى. تاعى دا ەسكەرتەمىن: جوعارعى سوتتىڭ YouTube-ارناسىندا تىكەلەي ەفير ءجۇرىپ جاتقاندىقتان، باق-قا ءوز بەتىنشە ستريم جۇرگىزۋگە تىيىم سالىنادى. سونىمەن قاتار، سوتتالۋشىلاردى تۇسىرۋگە قاتاڭ تۇردە تىيىم سالىنادى"، – دەدى سۋديا.
ەسكە سالايىق، بۇعان دەيىن شەرزاتتىڭ ولىمىنە قاتىستى سوت پروسەسىندە مەملەكەتتىك ايىپتاۋشى مارقۇم نۇرقانات عايىپبايەۆتىڭ تەرگەۋ كەزىندە بەرگەن جاۋاپتارىن وقىپ بەرگەن بولاتىن. نۇرقانات بۇل ءىس بويىنشا جابىرلەنۋشى رەتىندە تانىلعان.
ونىڭ ايتۋىنشا، وقيعا كۇنى ول قاماجاي دۇكەنىنىڭ قاسىنداعى ەت دۇكەنىنە ەت اكەلگەن. بۇل شامامەن كەشكى ساعات 19:00-19:30 ارالىعى بولعان. سول كەزدە بولات نۇرىموۆ حابارلاسىپ، ۇيگە قاۋىن الىپ كەلۋدى سۇراعان. شەرزاتپەن بىرگە دۇكەن ءىشىن رەتتەپ، تازالاپ بىتىرگەندە ساعات 20:00 شاماسى ەدى. نۇرقاناتتىڭ سوزىنشە، شەرزات كۇن بويى قاسىندا بولىپ، بىرگە مال سويعان. ۇيگە قايتۋعا ۇسىنىس جاساعاندا شەرزات "نۇرقانات اعا، ءسىز ۇيگە قايتىڭىز، مەن دۇكەندى جيناستىرىپ، ارتىنان بارامىن" دەگەن. نۇرقانات ۇيىنە ءوزى قايتىپ، كەشكى اسىن ىشكەن سوڭ ۇيىقتاعان. تۇنگى ساعات 23:00 شاماسىندا جەڭگەسى وياتىپ، قارجاۋباي اعاسىنىڭ شۇعىل دۇكەنگە شاقىرىپ جاتقانىن جەتكىزگەن.
تەلەفون ارقىلى سويلەسكەندە قارجاۋباي اعاسى شەرزاتتىڭ بىرەۋمەن توبەلەسىپ قالعانىن ايتقان. وسىدان كەيىن نۇرقانات اكەسىنىڭ كولىگىن ءمىنىپ، دۇكەنگە بارعان.
دۇكەننىڭ الدىندا دارحان ەسىمدى جىگىت تۇرعانىن كورگەن. شەرزات وعان جاقىنداپ، اكەسىنە دورەكى سويلەگەنى ءۇشىن ەسكەرتۋ جاساعان. نۇرقاناتتىڭ ايتۋىنشا، سول ساتتە دارحان شەرزاتقا ءتىل تيگىزگەن سوڭ، شەرزات ونى ۇرىپ جىبەرگەن. كەيىن شەرزات دارحانمەن ەرتەڭ، ساۋ كۇيدە سويلەسۋدى ۇسىنعان.
سول ارادا دارحان نۇربولعا حابارلاسىپ، وقيعا ورنىنا نۇربول گولف كولىگىمەن كەلگەن. نۇربول ءوزىن "حۋتورسكييمىن" دەپ تانىستىرىپ، اڭگىمەنى ۋشىقتىرماي، كەلەسى كۇنى سويلەسۋگە كەلىسكەن. ءبىراق دۇكەندەگى تولەم ماسەلەسى شەشىلمەگەن.
نۇرقاناتتىڭ ايتۋىنشا، دارحان قارجاۋبايعا جالعان چەك كورسەتكەن سوڭ، قايتادان جانجال باستالعان. نۇربول نۇرقاناتپەن سوزگە كەلىپ، دۇكەنگە كىرىپ ءوزى تولەم جاساعان. وسىدان كەيىن ولار ۋاقىتشا تاراسقان. نۇرقانات كولىكتىڭ كىلتىن شەرزاتقا بەرىپ، ۇيگە قايتۋعا جىبەرگەن.
ءبىراق كوپ ۇزاماي دارحان، نۇربول جانە ولارمەن بىرگە تاعى ءبىر جىگىت قايتادان دۇكەنگە كەلىپ، جانجال قايتا ورشىگەن.
نۇرقاناتتىڭ ايتۋىنشا، دارحان بەتىن جىرىپ العانىن ايتقان. سول ساتتە قارجاۋباي مەن نۇربول اراسىندا تاعى جانجال شىققان. شەرزات ەكەۋىن اجىراتپاق بولعان. نۇربول دۇكەن ىشىندە قارجاۋبايعا پىشاق كورسەتكەن. بۇدان كەيىن نۇربول ءوز تانىستارىنا، الدىمەن "چيكاعا"، كەيىن نۇرقياسقا حابارلاسقان.
بۇدان ءارى جاعداي ۋشىققان. نۇرقانات شەرزاتقا ۇيگە قايتۋعا كەڭەس بەرگەن. ال ءوزى دۇكەننىڭ الدىندا قالىپ، نۇربولمەن تىلدەسكەن. ءبىراق كەيىن باسقا كولىكتەر دە كەلىپ، ابزال، نۇرقياس، شىڭعىس جانە تاعى بىرنەشە ادام دۇكەن الدىنا جينالعان.
نۇرقاناتتىڭ ايتۋىنشا، ولار امانداسىپ بولعان سوڭ، دۇكەن ەسىگىن اشىپ، ارتىنداعىلارعا "دەلايتە" دەگەن بەلگى بەرگەن.
وسى كەزدە نۇرقياس احمەت ەسىمدى بالانى ۇرىپ، بەتونعا قۇلاتقان. ابزال احمەتتى جاعاسىنان ۇستاپ تۇرعان جەرىنەن نۇرقانات ونى قۇتقارىپ العان. كەيىن جىگىتتەر نۇرقاناتقا شابۋىل جاساعان. نۇرقياس ونى ۇرىپ، نۇرقانات تا قارسىلىق بىلدىرگەن.
قارجاۋباي دۇكەن ىشىندە قامالىپ قالعان. ەسىكتى ءبىر قىز ۇستاپ، ونى شىعارماي تۇرعان. وسى كەزدە باسقا ءبىر قىز مەرسەدەستەن پىشاقتاردى الىپ بەرىپ تۇرعان.
نۇرقاناتتىڭ ايتۋىنشا، نۇرقياس وعان بىرنەشە رەت پىشاق سەرمەگەن. شەرزات بۇل كەزدە ابزالعا شابۋىل جاساپ، نۇرقاناتتى قورعاۋعا كەلگەن. ءبىراق وقيعا ورنىنا جينالعان ون شاقتى جىگىت شابۋىل جاساعان سوڭ، نۇرقانات شەرزاتقا "قاشا بەر" دەگەن.
نۇرقانات 10-15 مەتر جەردە الىستاپ جۇرگەندە، شەرزات "نۇرقانات اعا، ماعان بىرنارسە تىعىپ الدى" دەپ ءۇش رەت ايقايلاعان. جۇگىرىپ بارعان نۇرقانات ونىڭ سول جاق ارقا تۇسىنا پىشاق سۇعىلعانىن كورگەن.
نۇرقانات جىگىتتەرگە توقتاۋدى، جەدەل جاردەم شاقىرۋدى سۇراعانىمەن، ونى بىرنەشە ادام ۇرىپ-سوققان. ابزال ونىڭ جامباسىنا پىشاق سۇققان، تاعى بىرەۋ باسىنان مەتالل زاتپەن ۇرعان. ودان كەيىن نۇرقانات ەسىنەن تانىپ، تەك اۋرۋحانادا ەسىن جيعان.
