Sherzat Bolatty óltirý isi boiynsha qaralyp jatqan sotta qoǵamda úlken rezonans týdyrǵan videoǵa bailanysty tekserý bastaldy, dep habarlaidy Dalanews.kz.
Buǵan internette sottalýshylardyń sot zalyndaǵy shyny kabinadan kúlip shyqqan kezi túsirilgen beinejazbanyń taralýy túrtki bolǵan. TikTok jelisine júktelgen bul video jurtshylyqtyń teris reaktsiiasyn týǵyzyp, is boiynsha qoǵamdyq qysymdy kúsheitti.
5 mamyrda ótken sot otyrysynda aiyptalýshylardyń qorǵaýshylary videonyń taralýyna yqpal etken adam retinde sot protsesiniń bir qatysýshysyn kórsetti.
– Men túsinbedim, ol túste boldy ma, álde keiin be, tórteýiniń jái ǵana kúlimsiregenin kórdik. Biz olardyń nege kúlip turǵanyn bilmeimiz. Bul videony TikTok-qa jariialap jibergen, endi ol jaqta neshe túrli pikir jazylýda. Muny eskerýlerińizdi suraimyn, – dedi protsestiń bir qatysýshysy.
Beinejazbany taratýy múmkin azamat óz kezeginde bul aiypty joqqa shyǵardy. Ol jábirlenýshi taraptyń advokaty Meiirman Shekeevtiń mobilografy ekenin, sot protsesine alǵashqy otyrystan beri qatysyp kele jatqanyn aitty. Onyń aitýynsha, ol sottalýshylardy múlde túsirmegen jáne túsirýge qatysty shekteýlerdi jaqsy biledi. Sondai-aq daý týǵyzǵan videonyń kóldeneń formatta, shtativ arqyly túsirilgen bolýy múmkin ekenin, al ózi tek qolmen túsiretinin jetkizdi. Video YouTube formatyna beiimdelgen.
Sot tóraǵasy Erjan Januzaqov bul jaǵdaiǵa bailanysty tekserý júrgizilip jatqanyn málimdedi.
"Atalǵan fakti boiynsha sot tekserý júrgizip jatyr. Nátijesi týraly sizderge qosymsha habarlanady. Taǵy da eskertemin: Joǵarǵy sottyń YouTube-arnasynda tikelei efir júrip jatqandyqtan, BAQ-qa óz betinshe strim júrgizýge tyiym salynady. Sonymen qatar, sottalýshylardy túsirýge qatań túrde tyiym salynady", – dedi sýdia.
Eske salaiyq, buǵan deiin Sherzattyń ólimine qatysty sot protsesinde memlekettik aiyptaýshy marqum Nurqanat Ǵaiypbaevtyń tergeý kezinde bergen jaýaptaryn oqyp bergen bolatyn. Nurqanat bul is boiynsha jábirlenýshi retinde tanylǵan.
Onyń aitýynsha, oqiǵa kúni ol Qamajai dúkeniniń qasyndaǵy et dúkenine et ákelgen. Bul shamamen keshki saǵat 19:00-19:30 aralyǵy bolǵan. Sol kezde Bolat Nurymov habarlasyp, úige qaýyn alyp kelýdi suraǵan. Sherzatpen birge dúken ishin rettep, tazalap bitirgende saǵat 20:00 shamasy edi. Nurqanattyń sózinshe, Sherzat kún boiy qasynda bolyp, birge mal soiǵan. Úige qaitýǵa usynys jasaǵanda Sherzat "Nurqanat aǵa, siz úige qaityńyz, men dúkendi jinastyryp, artynan baramyn" degen. Nurqanat úiine ózi qaityp, keshki asyn ishken soń uiyqtaǵan. Túngi saǵat 23:00 shamasynda jeńgesi oiatyp, Qarjaýbai aǵasynyń shuǵyl dúkenge shaqyryp jatqanyn jetkizgen.
Telefon arqyly sóileskende Qarjaýbai aǵasy Sherzattyń bireýmen tóbelesip qalǵanyn aitqan. Osydan keiin Nurqanat ákesiniń kóligin minip, dúkenge barǵan.
Dúkenniń aldynda Darhan esimdi jigit turǵanyn kórgen. Sherzat oǵan jaqyndap, ákesine dóreki sóilegeni úshin eskertý jasaǵan. Nurqanattyń aitýynsha, sol sátte Darhan Sherzatqa til tigizgen soń, Sherzat ony uryp jibergen. Keiin Sherzat Darhanmen erteń, saý kúide sóilesýdi usynǵan.
Sol arada Darhan Nurbolǵa habarlasyp, oqiǵa ornyna Nurbol golf kóligimen kelgen. Nurbol ózin "hýtorskiimin" dep tanystyryp, áńgimeni ýshyqtyrmai, kelesi kúni sóilesýge kelisken. Biraq dúkendegi tólem máselesi sheshilmegen.
Nurqanattyń aitýynsha, Darhan Qarjaýbaiǵa jalǵan chek kórsetken soń, qaitadan janjal bastalǵan. Nurbol Nurqanatpen sózge kelip, dúkenge kirip ózi tólem jasaǵan. Osydan keiin olar ýaqytsha tarasqan. Nurqanat kóliktiń kiltin Sherzatqa berip, úige qaitýǵa jibergen.
Biraq kóp uzamai Darhan, Nurbol jáne olarmen birge taǵy bir jigit qaitadan dúkenge kelip, janjal qaita órshigen.
Nurqanattyń aitýynsha, Darhan betin jyryp alǵanyn aitqan. Sol sátte Qarjaýbai men Nurbol arasynda taǵy janjal shyqqan. Sherzat ekeýin ajyratpaq bolǵan. Nurbol dúken ishinde Qarjaýbaiǵa pyshaq kórsetken. Budan keiin Nurbol óz tanystaryna, aldymen "Chikaǵa", keiin Nurqiiasqa habarlasqan.
Budan ári jaǵdai ýshyqqan. Nurqanat Sherzatqa úige qaitýǵa keńes bergen. Al ózi dúkenniń aldynda qalyp, Nurbolmen tildesken. Biraq keiin basqa kólikter de kelip, Abzal, Nurqiias, Shyńǵys jáne taǵy birneshe adam dúken aldyna jinalǵan.
Nurqanattyń aitýynsha, olar amandasyp bolǵan soń, dúken esigin ashyp, artyndaǵylarǵa "delaite" degen belgi bergen.
Osy kezde Nurqiias Ahmet esimdi balany uryp, betonǵa qulatqan. Abzal Ahmetti jaǵasynan ustap turǵan jerinen Nurqanat ony qutqaryp alǵan. Keiin jigitter Nurqanatqa shabýyl jasaǵan. Nurqiias ony uryp, Nurqanat ta qarsylyq bildirgen.
Qarjaýbai dúken ishinde qamalyp qalǵan. Esikti bir qyz ustap, ony shyǵarmai turǵan. Osy kezde basqa bir qyz mersedesten pyshaqtardy alyp berip turǵan.
Nurqanattyń aitýynsha, Nurqiias oǵan birneshe ret pyshaq sermegen. Sherzat bul kezde Abzalǵa shabýyl jasap, Nurqanatty qorǵaýǵa kelgen. Biraq oqiǵa ornyna jinalǵan on shaqty jigit shabýyl jasaǵan soń, Nurqanat Sherzatqa "qasha ber" degen.
Nurqanat 10-15 metr jerde alystap júrgende, Sherzat "Nurqanat aǵa, maǵan birnárse tyǵyp aldy" dep úsh ret aiqailaǵan. Júgirip barǵan Nurqanat onyń sol jaq arqa tusyna pyshaq suǵylǵanyn kórgen.
Nurqanat jigitterge toqtaýdy, jedel járdem shaqyrýdy suraǵanymen, ony birneshe adam uryp-soqqan. Abzal onyń jambasyna pyshaq suqqan, taǵy bireý basynan metall zatpen urǵan. Odan keiin Nurqanat esinen tanyp, tek aýrýhanada esin jiǵan.
