ماسەلەنىڭ ءمان-جايىن ايتا كەتەيىك. ءوزى ورالداعى جەتىمدەر ۇيىندە وسكەن اناردى جولداسى ەكىنشى بالاعا اياعى اۋىر كەزىندە تاستاپ كەتىپتى. بەس ايلىق ۇلى يسلامعا بەرىلەتىن 13 مىڭ تەڭگە جاردەماقى جەتپەگەسىن جاس انا قايىر سۇراۋعا ءماجبۇر بولعان. ال جالداپ تۇرىپ جاتقان پاتەردىڭ يەلەرى قارىزى ءۇشىن اناردى ەكى بالاسىمەن دالاعا قۋعان...
امالى تاۋسىلعان انا ەمشەكتەگى بالاسىن بالاباقشا جاسىنداعى قىزىنا قالدىرىپ ورالداعى ەۋرازيا داڭعىلىنىڭ بويىندا قايىر سۇراعان. «تاڭعى التىدان باستاپ كەشكى تورتكە دەيىن، توڭىپ ءجۇردىم...» دەگەن ەدى انار ەسماعۇلوۆا كتك ارناسىنا بەرگەن سۇحباتىندا.
سوعان قاراماي بالالارىن جەتىمدەر ۇيىنە وتكىزبەگەنىنە سۇيسىنگەنبىز. اناردىڭ ءوزى اتا-اناسى جول اپاتىنان كوز جۇمعاننان كەيىن بالالار ۇيىندە تاربيەلەنىپتى.
تاسباۋىر اكەسى بالالارىنا مۇلدەم قارايلاسپايدى ەكەن. اناردىڭ ءوزى اكىمدىكتەگى پاتەر كەزەگىندە 835ء-شى بولىپ تۇر. ال قولى كەمىس بولىپ تۋعان كىشكەنتاي يسلامعا وتا جاساتۋ كەرەك.
بۇل اقپارات جىلدىڭ باسىندا جاريالانعان ەدى. سودان بەرى نە وزگەردى؟ شىنىمەن دە كومەككە مۇحتاج انار ەسماعۇلوۆاعا باتىس قازاقستان وبلىستىق اكىمدىگىنىڭ بولماسا قالالىق اكىمشىلىكتىڭ تاراپىنان قانداي دا ءبىر قولداۋ كورسەتىلدى مە؟
وسى ماقساتپەن اناردىڭ وزىنە حابارلاسقان ەدىك. ءسوزىن قاز-قالپىندا بەردىك.
– مەن تۋرالى اقپارات شىققاننان كەيىن اكىمدىكتەن ءبىر توپ جاس بالالار كەلىپ قولىما 50 مىڭ تەڭگە ۇستاتتى، سوسىن ازىق-تۇلىك اكەپ تاستادى...
جالپى قايىرىمدى ادامدارعا مىڭ العىس. 150 مىڭ تەڭگە اقشا جيناپ بەردى. وسىنىڭ ارقاسىندا قارىزدارىمنان قۇتىلدىم، بالالارىما قاجەتتى زاتتار ساتىپ الدىم.
بالامدى بالاباقشاعا تۇرعىزدىم. اقشاسىن ءوزىم تولەيمىن. بىلايىنشا، ادامدار بەي-جاي قارامايدى. كوبىنەسە، كيىم-كەشەك جىبەرەدى. سوناۋ الماتىدان ازىق-تۇلىك سالىپ جىبەرەتىن ادامدار بار.
نەگىزى، كوندۋكتور بولىپ ىستەيتىنمىن. ءبىراق، بالام كىشكەنتاي بولعاندىقتان جۇمىسىما شىعا الماي قالدىم. ءقازىر تىماۋدىڭ كەزى، كىشكەنتايلارىم اۋىرىپ قالدى. ءتىپتى، ءدارى الاتىن اقشام بولماي تۇر، – دەيدى انار ەسماعۇلوۆا.
ءبىزدىڭ مۇنداعى ماقساتىمىز بىرەۋدى سىناۋ ەمەس. كەرىسىنشە، ءارى جەتىم وسكەن، ءارى جالعىز قالعان جاس انا انار ەسماعۇلوۆاعا قايىرىمدى ادام قارايلاسسىنشى دەگەن وي.
انارعا كومەك كورسەتەم دەگەن ازاماتتار بولسا، ونىڭ تەلەفونىنا حابارلاسۋىڭىزعا بولادى.
ۇيالى تەلەفونى: 8 (705)-638-48-22
