شقو ەكٸمٸ دانيال احمەتوۆ جۇمىس ساپارىمەن كاتونقاراعاي اۋدانىندا بولدى. بۇل تۋرالى ايماق باسشىسى ەلەۋمەتتٸك جەلٸلەردەگٸ پاراقشالارىندا جازدى.
بٸرقاتار اۋىلداردى ارالاپ, شەكارا ماڭىنداعى اۋماقتاردى دامىتۋ تۋرالى ايماقتىق باعدارلاما اياسىندا اتقارىلىپ جاتقان جۇمىستاردىڭ بارىسىمەن تانىسقانىن جەتكٸزدٸ.
«جالپى اتالمىش باعدارلاما بويىنشا كاتونقاراعاي اۋدانىندا 6 ميللياردتان استام تەڭگەگە 76 جوبا جٷزەگە اسىرىلدى. ونىڭ ٸشٸندە 24 جوبانى جۇمىسپەن قامتۋ جول كارتاسى قامتىدى. نەتيجەسٸندە 20 مەكتەپتە, 6 مەدەني وشاقتا جٶندەۋ جۇمىستارى جٷرگٸزٸلدٸ. اۋىلارالىق 30 شاقىرىم جولعا اسفالت تٶسەلدٸ.
كاتونقاراعاي اۋىلىنداعى ساياباق تولىق اباتتاندىرۋدان ٶتتٸ. جاقىندا وسى ساياباقتا التايدىڭ اسقار جازۋشىسى ديداحمەت ەشٸمحانوۆقا ەدەمٸ ەسكەرتكٸش اشىلدى.
اۋىلدا سونداي-اق, زاماناۋي تالاپتارعا ساي جابىق باسسەينٸ بار دەنە شىنىقتىرۋ-ساۋىقتىرۋ كەشەنٸ بوي كٶتەرٸپ جاتىر. كەلەر جىلدىڭ مامىر ايىنا دەيٸن جۇمىستار تولىق اياقتالىپ, نىسان قولدانىسقا بەرٸلەدٸ دەپ جوسپارلانۋدا. جوبانىڭ جالپى قۇنى 730 ملن. تەڭگە. مەردٸگەر كومپانييا بيىل نەگٸزگٸ قۇرىلىس-مونتاج جۇمىستارىن اياقتاۋعا نيەتتٸ. سونىمەن قاتار, قازاندىقتى سالىپ, ينجەنەرلٸك كوممۋنيكاتسييا جەلٸلەرٸن دە وسى جىلى جٷرگٸزەدٸ.
ەكٸ جىل بۇرىن سولداتوۆو اۋىلىندا بولعانمىن. سول كەزدە ەلدٸمەكەندەگٸ مەدەنيەت ٷيٸن جٶندەۋگە قاراجات بٶلۋدٸ تاپسىرعان ەدٸم. بٷگٸن اتقارىلعان جۇمىستىڭ نەتيجەسٸ كٶڭٸلٸمنەن شىقتى. كلۋب ٸشٸندە, سونىمەن قاتار, دەرٸگەرلٸك امبۋلاتورييا, سپورت زالدار, جەرگٸلٸكتٸ ەكٸمشٸلٸك ورىن تەپكەن. اۋىلعا سونداي-اق, ورتالىقتاندىرىلعان سۋ قۇبىرلارى تٶسەلدٸ. بٷگٸندە 200-گە تارتا ابونەنت قوسىلعان»
ايتا كەتۋ كەرەك, سوڭعى جىلدارى كاتونقاراعاي اۋدانىنداعى 9 اۋىلعا سۋ تارتىلدى. بۇعان قوسا كٶپبالالى انالاردى قولداۋ باعدارلاماسى دا ويداعىداي جٷزەگە اسۋدا دەپ جازادى دانيال احمەتوۆ.
قازٸرگٸ تاڭدا اۋدان ورتالىعىندا ەكٸ پەتەرلٸ 10 ٷيدٸڭ قۇرىلىسى اياقتالۋعا شاق قالدى. تاعى 30 پەتەرلٸ كٶپقاباتتى ٷي سالۋ جوسپارى تۇر.
