تۇركىستان وبلىسىنىڭ اكىمى دارحان ساتىبالدى سارىاعاش اۋدانىنداعى «جىبەك جولى» كەدەن بەكەتىن رەتكە كەلتىرۋ بويىنشا جاۋاپتى سالا باسشىلارىمەن كەزدەستى. بۇل باعىتتا كەزەڭ-كەزەڭىمەن اۋقىمدى جۇمىستار جۇزەگە اسپاق. جينالىستا وسى ماقساتتا جۇزەگە اسىرىلاتىن تۇركىستان وبلىسىنىڭ قۇرىلىس، ساۋلەت جانە قالا قۇرىلىسى باسقارماسىنىڭ جوباسى جان-جاقتى زەردەلەندى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
قازاقستان مەن وزبەكستان اراسىنداعى جولاۋشىلار اعىمى جانە جۇك كولىكتەرى قوزعالىسى ءۇشىن اسا ماڭىزدى بەكەت تاۋلىك بويى جۇمىس ىستەيدى. شەكارا ايماعىنداعى ينفراقۇرىلىمدى، اۆتوتۇراقتاردى رەتتەۋ، قىزمەت كورەتۋ ورىندارىن رەتتەۋ، جولاۋشىلار مەن تۇرعىندارعا قولايلى جاعداي جاساۋ، كوگالداندىرۋ، سانيتارلىق-ەپيدەميولوگيالىق جاعدايىن رەتكە كەلتىرۋ، باعىتىندا جۇمىستار جالعاسادى.
سارىاعاش اۋدانىنداعى «جىبەك جولى» كەدەن بەكەتى - تەك قازاقستان مەن وزبەكستان شەكاراسىندا عانا ەمەس، ورتا ازياداعى ەڭ ءىرى كەدەن بەكەتتەرىنىڭ ءبىرى سانالادى. كۇن سايىن شەكارادان 40 مىڭعا دەيىن جولاۋشى، 1200 جەڭىل اۆتوموبيل جانە اۆتوبۋس وتەدى. وتكىزۋ پۋنكتىنىڭ ەسەپتىك وتكىزۋ قابىلەتى تاۋلىگىنە 17 500 ادامدى قۇراسا، ادامداردىڭ ناقتى اعىنى 2،5 ەسەدەن اسادى. وتكەن جىلى وتكىزۋ پۋنكتى ارقىلى 8 ملن ادام وتكەن.
