ءماجىلىس دەپۋتاتى اسحات ايماعامبەتوۆ قازىرگى ءمۇعالىم بەينەسىنە قاتىستى ءوز ويىن ءبىلدىردى، دەپ حابارلايدى Dalanews.kz.

ول بۇل ماسەلەنى ارىپتەستەر اراسىندا قوزعاعاندا، كەيبىرەۋلەرى: «سەن تىم جاسسىڭ، نەگە مۇندايدى ايتاسىڭ؟ بۇل زاماناۋي كوزقاراسقا جات» – دەپ پىكىر بىلدىرگەنىن ايتتى.

ايماعامبەتوۆ بۇل كوزقاراستى ءبىرشاما كونسەرۆاتيۆتى دەپ مويىنداعانىمەن، قازىرگى زامان – TikTok، Instagram، Netflix كەزەڭى ەكەنىن ەسكەرىپ، سوعان قاراماستان بەلگىلى ءبىر قۇندىلىقتار مەن ۇستازدىق بەينە ساقتالۋى كەرەك ەكەنىن العا تارتتى.

اسحات ايماعامبەتوۆ قازىرگى ءمۇعالىمنىڭ بەينەسى مەن قوعامداعى ورنىن اسا ماڭىزدى دەپ سانايتىنىن ايتتى. ونىڭ سوزىنشە، ۇستازدىڭ وزىندىك ورنى، بەدەلى مەن بەينەسى بولۋى ءتيىس.

«وقۋشىعا جاقىن بولۋ – وتە ماڭىزدى. ءوزىم دە ءقازىر ۇستازدىق قىزمەتتەمىن. ءبىز مەكتەپتە وقىعان كەزىمىزدە ءمۇعالىمدى كورگەندە ەرەكشە قۇرمەتپەن قاراپ، تىنىش وتىراتىن ەدىك»، – دەدى دەپۋتات Adal Adam YouTube ارناسىنا بەرگەن سۇحباتىندا.

ايماعامبەتوۆ بارلىق ءمۇعالىم ءمىنسىز بولدى دەپ كەسىپ ايتۋعا بولمايتىنىن مويىندادى. دەگەنمەن، ول ءمۇعالىم ءيميدجى مەن بەدەلى جاي عانا فورمالدىق ەمەس، قوعامداعى جاۋاپتى مىندەت ەكەنىن ەسكەرتتى.

«ونى ازىلگە، كۇلكىگە اينالدىرۋعا بولمايدى. ريلس تۇسىرگىسى كەلسە، جۇمىس بارىسىن كورسەتسىن، وقۋشىلارمەن جاقسى قارىم-قاتىناسىن پاش ەتسىن. ءبىراق انەكدوت ايتىپ، ترەند قۋالاپ جۇرگەن كەيبىر ۇستازداردىڭ ارەكەتى ويلاندىرادى. ءار نارسەنىڭ ءوز شەگى بولۋى كەرەك»، – دەپ اتاپ ءوتتى ول.

سونداي-اق، اسحات ايماعامبەتوۆ بۇل ماسەلەدە ءبىلىم مينيسترلىگى تاراپىنان ناقتى ۇستانىم قاجەت ەكەنىن جەتكىزدى.