Májilis depýtaty Ashat Aimaǵambetov qazirgi muǵalim beinesine qatysty óz oiyn bildirdi, dep habarlaidy Dalanews.kz.
Ol bul máseleni áriptester arasynda qozǵaǵanda, keibireýleri: «Sen tym jassyń, nege mundaidy aitasyń? Bul zamanaýi kózqarasqa jat» – dep pikir bildirgenin aitty.
Aimaǵambetov bul kózqarasty birshama konservativti dep moiyndaǵanymen, qazirgi zaman – TikTok, Instagram, Netflix kezeńi ekenin eskerip, soǵan qaramastan belgili bir qundylyqtar men ustazdyq beine saqtalýy kerek ekenin alǵa tartty.
Ashat Aimaǵambetov qazirgi muǵalimniń beinesi men qoǵamdaǵy ornyn asa mańyzdy dep sanaitynyn aitty. Onyń sózinshe, ustazdyń ózindik orny, bedeli men beinesi bolýy tiis.
«Oqýshyǵa jaqyn bolý – óte mańyzdy. Ózim de qazir ustazdyq qyzmettemin. Biz mektepte oqyǵan kezimizde muǵalimdi kórgende erekshe qurmetpen qarap, tynysh otyratyn edik», – dedi depýtat Adal Adam YouTube arnasyna bergen suhbatynda.
Aimaǵambetov barlyq muǵalim minsiz boldy dep kesip aitýǵa bolmaitynyn moiyndady. Degenmen, ol muǵalim imidji men bedeli jai ǵana formaldyq emes, qoǵamdaǵy jaýapty mindet ekenin eskertti.
«Ony ázilge, kúlkige ainaldyrýǵa bolmaidy. Rils túsirgisi kelse, jumys barysyn kórsetsin, oqýshylarmen jaqsy qarym-qatynasyn pash etsin. Biraq anekdot aityp, trend qýalap júrgen keibir ustazdardyń áreketi oilandyrady. Ár nárseniń óz shegi bolýy kerek», – dep atap ótti ol.
Sondai-aq, Ashat Aimaǵambetov bul máselede bilim ministrligi tarapynan naqty ustanym qajet ekenin jetkizdi.
