قازاقستاندىق شارۋالار جاڭا سۋ كودەكسىنە سايكەس، 2 ملن تەكشە مەترگە دەيىن ەرىگەن قار سۋىن ءوز بەتىنشە جيناي الادى، – دەپ حابارلايدى Dalanews.kz.
جاڭا سۋ كودەكسىنە سايكەس، سۋ پايدالانۋشىلار اۋىل شارۋاشىلىعى قاجەتتىلىكتەرى ءۇشىن ەرىگەن قار سۋىن ارنايى رۇقساتسىز ءوز بەتىنشە جيناي الادى. بۇل ءۇشىن كولەمى 2 ملن تەكشە مەتردەن اسپايتىن توعان، سۋ قويماسى نەمەسە وزگە دە قويما سالۋ قاجەت.
ەرىگەن قار سۋىن جيناۋعا ارنالعان گيدروتەحنيكالىق قۇرىلىمدار قاۋىپسىزدىك تالاپتارىنا ساي بولۋى ءتيىس، وزەندەرمەن، كولدەرمەن جانە باسقا دا سۋ نىساندارىمەن بايلانىسپاۋى كەرەك ءارى قورشاعان ورتاعا زيان كەلتىرمەۋى قاجەت. قۇرىلىس اياقتالعاننان كەيىن باسسەيندىك سۋ ينسپەكسياسىن حاباردار ەتىپ، بۇل نىساندى ارنايى تىزىمگە ەنگىزۋ قاجەت.
بۇل شارا ديقانداردى سۋارمالى سۋمەن قامتاماسىز ەتۋدى جاقسارتۋعا جانە قازاقستانداعى اۋىل شارۋاشىلىعىنىڭ دامۋىنا باعىتتالعان.
جاڭا سۋ كودەكسىنە مەملەكەت باسشىسى بيىل 9 ساۋىردە قول قويعان بولاتىن. قۇجات 10 ماۋسىمدا كۇشىنە ەنەدى.
– جاڭا سۋ كودەكسى قازاقستانداعى سۋ سالاسىنىڭ بارلىق باعىتتارىن قامتيدى. ونىڭ باستى مىندەتتەرى – سۋ ۇنەمدەۋ جونىندەگى جالپىۇلتتىق ساياساتتى قالىپتاستىرۋ جانە دامىتۋ، ەلدى مەكەندەردە سۋمەن جابدىقتاۋ جانە سۋ بۇرۋدى رەتتەۋ، بالاما سۋ كوزدەرىن (جاڭبىر جانە ەرىگەن قار سۋلارى، تازارتىلعان اعىن سۋلار، تۇششىتىلعان تۇزدى سۋلار) پايدالانۋ، سونداي-اق سۋ رەسۋرستارىن قورعاۋ مەن ءتيىمدى پايدالانۋ دەڭگەيىن ارتتىرۋ، – دەدى سۋ ساياساتى دەپارتامەنتىنىڭ ديرەكتورى سەرىكجان بەكەتايەۆ.
