ايتا كەتەلىك، بىلتىرعى جىلدان باستاپ تۇركىستان وبلىسىنداعى شاردارالىق ديقاندار يننوۆاسيالىق ادىسپەن پياز ەگۋ جۇمىستارىن باستاپ كەتتى.
سونىڭ ءبىرى 5 جىلدان بەرى پياز ەگۋ جۇمىسىمەن اينالىسىپ كەلە جاتقان «تۇرار» شارۋا قوجالىعى بيىلعى جىلى 35 گەكتار القاپقا ءدان سەپكەن ەكەن. «رانكو» دەپ اتالاتىن جاڭا تۇقىم سورتىن ەگىپ جاتقان ديقاندار بيىلعى جىل جەمىستى بولدى دەيدى. وتكەن جىلى شارۋالار ەككەن پيازدىڭ گەكتارىنا 80 توننادان ءونىم السا، بيىل گەكتارىنا 100 توننادان استام ءونىم العان ەكەن.
ايتا كەتەيىك، ديقاندار پياز تۇقىمىن ءبىر مەزەتتە بىرنەشە جۇمىستى اتقاراتىن جاڭا زاماناۋي تەحنيكامەن سەپكەن. ياعني، تەحنيكا، بىرىنشىدەن اراسى 3 سم-دەن تۇقىم تاستاسا، ەكىنشىدەن، تامشىلاتىپ سۋعاراتىن سۋ تۇتىگىن قوسا كومۋدە. سونداي-اق، ءبىر گەكتار جەرگە 6 كەلىدەي تۇقىم كەتسە، جوعارى سورتتى تۇقىمنىڭ ءبىر كەلىسى 64 مىڭ تەڭگە تۇرادى. جەردى جىرتۋدان باستاپ، جيىن-تەرىم ناۋقانىنا دەيىنگى جالپى شىعىننىڭ كولەمى ءار گەكتارعا 1 ملن. 300 مىڭ تەڭگەدەن جۇمسالادى ەكەن. الايدا، تۇسكەن ءونىم كەتكەن شىعىندى ەسەلەپ جابادى دەيدى ديقاندار.
