بۇگىن شاردارا سۋقويماسىنىڭ اۋماعىندا «تازا الەم — بارشاعا ورتاق ءىس!» اتتى پلوگگينگ ءوتتى. تازالىق جۇمىستارىنا ارمرەسلينگتەن 30 الەم چەمپيونى، 20 ازيا چەمپيونى مەن 10 ەل چەمپيونى قاتىستى، – دەپ حابارلايدى Dalanews.kz
شارا ەكولوگيالىق سانانى ارتتىرىپ، تۋعان ەلگە دەگەن سۇيىسپەنشىلىكتى وياتۋعا، سونداي-اق جاس ۇرپاقتى ەڭبەكقورلىق پەن جاۋاپكەرشىلىككە جانە تابيعاتقا جاناشىر بولۋعا باعىتتالعان.
«بۇگىن شاردارا سۋ قويماسىنىڭ جاعالاۋىن تازالاۋ، قوقىستارىن جيناۋ جۇمىستارىنا اۋداننىڭ عانا ەمەس، بۇكىل قازاقستاننىڭ ماقتانىشى – ارمرەستلينگ چەمپيوندارى دا ءوز ۇلەستەرىن قوسىپ وتىر. بۇل – پلوگگينگ سپورتشىلارىمىزدىڭ جاستارعا، وسكەلەڭ ۇرپاققا كورسەتكەن ۇلگىسى. ارمرەستلينگكە كەلىپ جاتتىعىپ جۇرگەن جاستار اعالارىنىڭ جولىمەن اپتا سايىن وسى جاعالاۋدى تازالاۋعا ۋادە بەرىپ وتىر. ءبىز ءوز كەزەگىمىزدە جەرگىلىكتى ب ا ق وكىلدەرى دە قاتىسىپ، سپورتشىلارىمىزعا قولداۋ ءبىلدىرىپ كەلدىك»، دەدى "وسكەن ءوڭىر" گازەتىنىڭ باس رەداكتورى ءسابيت لاحانوۆ.
شاردارا سۋقويماسىنىڭ جاعالاۋىندا وتكەن پلوگگينگ ناتيجەسىندە 100-گە جۋىق ادام قاتىسىپ، ەكى تونناعا جۋىق تۇرمىستىق جانە پلاستيك قالدىقتار جينالدى.
اتاپ وتەيىك، حالىقتى ەكولوگيالىق مادەنيەتكە شاقىرۋ باعىتىندا وبلىستا 7 263 ءىس-شارا ءوتىپ، وعان 350 مىڭعا جۋىق تۇرعىن قاتىسقان.
اكسيا اياسىندا وبلىس كولەمىندە 500 مىڭنان اسا اعاش وتىرعىزىلدى. ءىس-شارالارعا 2 168 ارنايى تەحنيكا جۇمىلدىرىلىپ، 8 مىڭ توننادان اسا تۇرمىستىق قالدىقتار مەن قوقىس شىعارىلدى. سونداي-اق @tazaqazbot تەلەگرامم چات-بوت ارقىلى 2197 ءوتىنىم ءتۇسىپ، 2 167 ءوتىنىم دەر كەزىندە ورىندالدى. ال 30 ءوتىنىم ورىندالۋ بارىسىندا تۇر.
