"زامان تالابىنا ساي، بالالارىمىز، ەڭ ءبىرىنشى، ءوز انا ءتىلىن، قازاق ءتىلىن ءبىلۋى كەرەك. سەبەبى، قازاق ءتىلىن ءبىز تەك قازاقستاندا عانا دامىتا الامىز. ەكىنشىدەن، جالپى ينتەگراسيالانۋ ءۇشىن، باسقا كورشى مەملەكەتتەرمەن جۇمىس ىستەۋ ءۇشىن بىزگە ورىس ءتىلى مەن اعىلشىن ءتىلى قاجەت. مىنە، وسى جاعدايعا بايلانىستى ءقازىر مەكتەپتەردە پاندەر قازاق، ورىس جانە اعىلشىن تىلىندە وقىتىلىپ جاتىر"، - دەدى ءشامشيدينوۆا ۇكىمەت كۋلۋارىندا.
مينيستر مەكتەپتەر پاندەردى اعىلشىن تىلىندە وقىتۋعا بىرتىندەپ كوشەتىنىن اتاپ ءوتتى.
"ارينە، ەلدىڭ ءبارىن كوپ تولعاندىرىپ، كوپ شۋلاتقان ماسەلە – ول پاندەردى اعىلشىن تىلىندە وقىتۋ. وسىعان بايلانىستى مينيسترلىك ءقازىر كادرلاردىڭ دايىندىعىنا قاراي بىرتىندەپ كوشۋدى قاراستىرىپ وتىر"، - دەدى ول
ونىڭ ايتۋىنشا، 2016 جىلى جوعارى وقۋ ورىندارىندا اعىلشىن تىلىندە ساباق بەرەتىن مۇعالىمدەردى دايارلاۋعا مەملەكەتتىك تاپسىرىس بەرىلگەن.
"سول تاپسىرىسپەن بولاشاق مۇعالىمدەر كەلەسى جىلدان باستاپ ۋنيۆەرسيتتەردىڭ قابىرعالارىنان شىعا باستايدى. سوندىقتان دا بالالاردى اعىلشىن تىلىندە وقىتۋ ماسەلەسى كەزەڭ-كەزەڭمەن، كادرلاردىڭ جانە مەكتەپتەردىڭ دايىندىعىنا بايلانىستى مەكتەپتەردىڭ قالاۋىمەن بىرتىندەپ ەنگىزىلەدى. ءبىز ءقازىر 15 مەكتەپ نەمەسە 20 مەكتەپ ەنگىزسىن دەگەن تالاپ قويىپ وتىرعان جوقپىز"، - دەدى ءشامشيدينوۆا.
