ءا.كەكىلباي ۇلى اتىنداعى وبلىستىق تاريحي-ولكەتانۋ مۋزەيىندە وتكەن كەزدەسۋگە ەلىمىزدەگى قازىرگى ايتىس ونەرىنىڭ العاشقى ۇيىمداستىرۋشىسى ءجۇرسىن ەرمان، قازىلار القاسىنىڭ ءتوراعاسى سۆەتقالي نۇرجان، ق ر جازۋشىلار وداعى ءتوراعاسىنىڭ ورىنباسارى عالىم جايلىباي، بەلگىلى ايتىسكەر اقىن، بقو قادىر مىرزا ءالي اتىنداعى مادەنيەت جانە ونەر ورتالىعىنىڭ ديرەكتورى باۋىرجان حاليوللا جانە رۇستەم قايىرتاي ۇلى، جانسايا مۋسينا، اسپانبەك شۇعاتايەۆ، شالقارباي ءىزباساروۆ، نۇرلان مۇسايەۆ سىندى ءبىرقاتار اقىندار قاتىستى.
وبلىس اكىمى «Nur Otan» پارتياسىنىڭ قولداۋىمەن «ۇلتتىق مۇرا» باعدارلاماسى اياسىندا وتكىزگەلى وتىرعان شاراعا ات سالىسىپ، ۇلەس قوسۋعا نيەت بىلدىرگەن اقىندارعا العىسىن ايتتى.
– ايتىس – اتادان بالاعا ميراس بولىپ كەلگەن، حالقىمىزدىڭ رۋحاني مادەنيەتىنىڭ ءبىرى. و باستان حالىق اراسىندا جۇرگەن اقىندار ەلدى ىنتىماق پەن تاتۋلىققا، بىرلىك پەن بەرەكەگە شاقىرىپ جىرلارىنا قوسقان. اقىن جىرلارىنىڭ ارقاۋى – ىزگىلىك، ەلدىك، بىرلىك بولعان. تاۋەلسىزدىكتىڭ 30-شى جىلىنا اياق باستىق. تاۋەلسىزدىكتەن ءتاتتى، ازاتتىقتان اسىل نە بار؟! ءبىز ءۇشىن بۇدان ارتىق بايلىعىمىز دا، باعىمىز دا جوق. ولاي بولسا، بۇگىن تاۋەلسىزدىككە دەگەن ەڭ شىرايلى سەزىمدەر مەن شۇرايلى سوزدەردىڭ اقتارىلار كۇنى. ەڭسەلى ەلىمىزدىڭ 30 جىلدا جەتكەن تابىسىنىڭ جىرمەن توگىلەر كۇنى. وسىناۋ ايتىس مەرەكەسىندە سىزدەرگە ساتتىلىك تىلەيمىن، – دەدى س.ترۇموۆ.
ءوڭىر باسشىسىنىڭ ايتۋىنشا، ماڭعىستاۋدا ۇلت ونەرىن، مادەنيەتىن، رۋحانياتىن ۇلىقتاۋ ءىسى ءبىر ءسات تە تولاستاعان جوق. سوڭعى جىلداردىڭ وزىندە بىرنەشە حالىقارالىق، رەسپۋبليكالىق ونەر بايقاۋلارى مەن فەستيۆالدەرى وتكىزىلىپ، ونەر يەلەرىنىڭ مەرەيتويلارى كەڭ كولەمدە اتالدى. «جازۋشىلار وداعىمەن بىرلەسىپ اقىن-جازۋشىلاردىڭ ماڭعىستاۋعا شىعارماشىلىق ساپارىن ۇيىمداستىردىق، فورۋم وتكىزدىك. بۇنداي جيىندار، شىعارماشىلىق جوبالار الداعى ۋاقىتتا دا تۇراقتى ۇيىمداستىرىلادى»،-دەدى وبلىس اكىمى.
كەزدەسۋ سوڭىندا قوناقتارعا «360 اۋليەلى ماڭعىستاۋ» كىتابى تارتۋ ەتىلدى.
«ءتاۋ ەتەرىم – تاۋەلسىزدىك!» اتتى رەسپۋبليكالىق اقىندارا ايتىسى مامىردىڭ 26-27 كۇندەرى وتەدى. ءسوز ونەرىنىڭ دوداسىنا ەلىمىزدىڭ ءار وڭىرىنەن 18 اقىن قاتىسادى. ايتىستى قازاقستاننىڭ ەڭبەك سىڭىرگەن قايراتكەرى ج.ەرمان جۇرگىزەدى. شارا وڭىردەگى ەپيدەميولوگيالىق احۋالعا بايلانىستى سانيتارلىق تالاپتار ساقتالا وتىرا وتكىزىلەدى. ايتىستىڭ تەليەۆيزيالىق تولىق نۇسقاسى الداعى كۇندەرى «ماڭعىستاۋ» تەلەارناسىنان كورسەتىلەدى.
