بۇعان قاتىستى «اقتوبە اقپارات» ورتالىعى رەسمي حابارلاما بەرگەن-دى. وندا اقتوبە وبلىسىنىڭ اكىمى ب.ساپاربايەۆتىڭ شقو اكىمى بولىپ تۇرعان تۇستا ءبىر دە ءبىر گەكتار جەردىڭ شەتەل ازاماتتارىنا ساتىلماعانى ايتىلعان.
«ايدىن ەگەۋبايەۆتىڭ بۇل مالىمدەمەسىنە قاتىستى «اقتوبە اقپاراتقا» شقو ءۇرجار اۋدانى اكىمىنىڭ مىندەتىن اتقارۋشى جارقىنبەك بايسابىروۆ مالىمەت بەردى. ونىڭ ايتۋىنشا، 2010-2011 جىلدارى مەملەكەتتىك جەر قورىنان «دارەمەت» ج ش س ديرەكتورى س.حۆان (29827 گا)، «ىرعىن» ج ش س ديرەكتورى ا.ىزىمعالييەۆ (8 712 گا)، «مانفاگات» ج ش س ديرەكتورى ن.تاسمۇراتوۆتار (48 903 گا) جەر العان، ال بەردىبەك ساپاربايەۆ شقو اكىمى بولىپ تۇرعان تۇستا وبلىستا جەر قحر ازاماتتارىنا ساتىلعان جوق»، دەلىنگەن حابارلامادا.
مۇنى وبلىس اكىمى بەردىبەك ساپاربايەۆتىڭ ءوزى دە راستادى.
اقتوبە وبلىسىنىڭ الەۋمەتتىك-ەكونوميكالىق دامۋىنىڭ 2016 جىلدىڭ ءبىرىنشى جارتى جىلدىعىن قورىتىندىلاعان جيىندا جۋرناليست اسقار اقتىلەۋوۆتىڭ سۇراعىنا ايماق باسشىسى بىلاي دەپ جاۋاپ بەردى:
— بىرىنشىدەن، مەن جەر ساتتى دەپ جازعان جىگىتتى كورگەنىم جوق، تانىمايمىن دا. ءبىزدىڭ مەملەكەتتىڭ زاڭى بويىنشا ۇلتاراقتاي جەر شەتەلدىكتەرگە ساتىلمايدى. وسى ۋاقىتقا دەيىن مەن ول كىسىنىڭ ايتقانىنا قاتىستى ۇندەمەي وتىرعانىمنىڭ سەبەبى – رەسمي مالىمەت كۇتتىم. رەسمي مالىمەتتى وزدەرىڭىز الدىڭىزدار. مەن شىعىس قازاقستان وبلىسىنىڭ اكىمى بولىپ تۇرعان كەزدە ءبىر دە ءبىر سوتىق جەر شەتەلدىكتەرگە ساتىلعان جوق. ەگەر ول ازاماتتىڭ بۇعان قاتىستى كۇمانى بولسا، بارسىن، تەكسەرسىن.
مەن بۇل ماسەلە تۋرالى كوپ ويلاندىم. جانە ول كىسىنى رەسمي تۇردە سوتقا بەرەمىن دەپ شەشتىم. سەبەبى ول وسىنداي مالىمەتتى الەۋمەتتىك جەلىگە جاريالاعاننان كەيىن مەنىڭ اتىما كوپتەگەن cءوز ايتىلدى: «سەنگەن ساپاربايەۆىمىز وسىلاي ىستەيتىن بولسا، باسقالارى نە ىستەمەيدى؟» دەگەن سەكىلدى مەنىڭ ابىرويىما نۇقسان كەلتىرەتىن سوزدەر ايتىلدى. سوندىقتان، مەن ونى سوتقا بەرەمىن، ماتەريالدىق شىعىن وندىرەمىن جانە ونى قانداي دا ءبىر جەتىمدەر ۇيىنە اۋدارامىن، — دەدى ب.ساپاربايەۆ.
سونداي-اق ب.ساپاربايەۆ الەۋمەتتىك جەلى پايدالانۋشىلارىن مادەنيەتتى بولۋعا شاقىردى: «بىزدە الەۋمەتتىك جەلىلەردى پايدالانۋ دەڭگەيى وتە تومەن. ءبىز الەۋمەتتىك جەلىلەردى ءبىر-بىرىمىزدىڭ وكپەلەرىمىزدى ايتۋعا، بىر-بىرىمىزبەن ەسەپ ايىرىسۋعا پايدالانامىز. سودان كەلىپ بىرەۋلەردىڭ سوزىنە سەنەمىز. بۇل دۇرىس ەمەس. سوندىقتان، الەۋمەتتىك جەلىلەردى پايدالانۋدا دا ادامدا ۇلكەن مادەنيەت بولۋى كەرەك»، — دەدى ايماق باسشىسى.
دەرەككوز: aktobenews.kz
