سەناتور اسەم راحمەتوۆا قازاقستان مەن رەسەي اراسىنداعى قارىم-قاتىناسقا بايلانىستى ءوز ويىن ورتاعا سالدى، دەپ جازادى Dalanews.kz.

سەنات دەپۋتاتى رەسەي پرەزيدەنتى ۆلاديمير ءپۋتيننىڭ ەلىمىزگە مەملەكەتتىك ساپارمەن كەلۋىن ەكىجاقتى ىنتىماقتاستىق ءۇشىن ماڭىزدى وقيعا دەپ باعالادى.

"وسى اپتادا ۆلاديمير پۋتين قازاقستانعا ۇلكەن دەلەگاسيامەن كەلدى. ەكى ەل باسشىلارى بيىل بىرنەشە رەت كەزدەسكەنىمەن، بۇل ساپاردىڭ ەرەكشەلىگى – ونىڭ مەملەكەتتىك دەڭگەيدە ءوتۋى. مەملەكەتتىك ساپار ءارقاشان ەرەكشە رولگە يە. بۇل جولى شاعىن جانە كەڭەيتىلگەن فورماتتا كەلىسسوزدەر ۇيىمداستىرىلدى. سونىمەن قاتار دەلەگاسيا مۇشەلەرى استاناداعى ءبىرقاتار وندىرىستىك جانە الەۋمەتتىك نىسانداردى ارالاپ، ناقتى كەلىسىمدەرگە قول قويىلدى. ءار سالادا وداقتاستىق قارىم-قاتىناستى تەرەڭدەتۋ ءۇشىن ورتاق نيەت ءبىلدىرىلدى"، – دەدى سەناتور Baq.kz پورتالىنا.

ونىڭ ايتۋىنشا، قازاقستان مەن رەسەي اراسىنداعى ءوزارا بايلانىس ساۋدا، ءوندىرىس، قاۋىپسىزدىك جانە الەۋمەتتىك ماسەلەلەردى قامتيتىن كەڭ اۋقىمدى سەرىكتەستىككە نەگىزدەلگەن.

"ءبىزدى 7500 شاقىرىمدىق ورتاق شەكارا عانا ەمەس، تىعىز بايلانىسقان تاعدىر دا بىرىكتىرەدى. ەكى ەلدە تۋىستارى مەن جاقىندارى تۇراتىن ادامدار از ەمەس. ءبىرى – تاريحي وتانىنا ورالسا، ەندى ءبىرى بالالارىن شەتەلدە وقىتۋدا. وسىنداي كەزدەسۋلەر حالىقتىڭ ورتاق مۇددەلەرىن شەشۋگە ىقپال ەتەدى. ساۋدا، ءوندىرىس پەن قاۋىپسىزدىك سالالارىنداعى كۇردەلى ماسەلەلەردى بىرلەسە شەشۋ قاجەت. بۇل ساپار ەكىجاقتى ساياسي ديالوگتىڭ قارقىنىن كۇشەيتىپ، ەكى ەلدىڭ دە ىنتىماقتاستىققا دەگەن قىزىعۋشىلىعىن ناقتى كورسەتتى"، – دەپ قورىتىندىلادى اسەم راحمەتوۆا.