وقۋ-اعارتۋ مينيسترلىگى سەمەيدە ءبىر توپ جاسوسپىرىمەن الىمجەتتىك كورگەن 6-سىنىپ وقۋشىسىنىڭ وقيعاسىنا قاتىستى رەسمي مالىمدەمە جاسادى، دەپ حابارلايدى Dalanews.kz.
“سوڭعى كۇندەرى بۇقارالىق اقپارات قۇرالدارى مەن الەۋمەتتىك جەلىلەردە سەمەي قالاسىندا جاسوسپىرىمدەردىڭ كامەلەتكە تولماعان بالاعا كۇش كورسەتكەنى تۇسىرىلگەن بەينەجازبا كەڭىنەن تارالۋدا. بۇل جاعدايدى ودان ءارى ۋشىقتىرماۋ جانە بالاعا قوسىمشا مورالدىق زيان كەلتىرمەۋ ءۇشىن اتالعان بەينەماتەريالدى تاراتۋدى توقتاتۋعا شاقىرامىز. ەرەكشە الاڭداۋشىلىق تۋدىراتىن جايت – كەيبىر بلوگەرلەر زارداپ شەككەن بالانىڭ فوتوسۋرەتتەرىن جاريالاۋدا. مۇنداي ارەكەتتەر بالانىڭ پسيحولوگيالىق جاراقاتىن تەرەڭدەتە تۇسەدى”، - دەپ جازىلعان مينيسترلىك مالىمدەمەسىندە.
ۆەدومستۆونىڭ مالىمەتىنشە، بالالاردىڭ قۇقىقتارىن قورعاۋ كوميتەتى بۇل ءىستى ءجىتى باقىلاۋدا ۇستاپ وتىر.
“كىنالىلەر جاۋاپكەرشىلىككە تارتىلدى. وقيعا ورنىندا بالا قۇقىقتارى جونىندەگى وڭىرلىك ۋاكىل جۇمىس ىستەۋدە. بارلىق كامەلەتكە تولماعان ازاماتتاردىڭ قۇقىقتارى مەملەكەتتىك دەڭگەيدە قورعالعان جانە كەپىلدەندىرىلگەن.
ەسكە سالامىز، ق ر "بۇقارالىق اقپارات قۇرالدارى تۋرالى" زاڭىنىڭ 14-بابى، 5-تارماعىنا سايكەس، زارداپ شەككەن بالالاردىڭ جەكە باسىنا قاتىستى جانە بيومەتريالىق دەرەكتەرىن، ونىڭ ىشىندە ولاردىڭ فوتوسۋرەتتەرى مەن جەكە باسىن انىقتاۋعا مۇمكىندىك بەرەتىن كەز كەلگەن اقپاراتتى تاراتۋعا تىيىم سالىنادى”، - دەپ قوستى مينيسترلىك.
ايتا كەتەيىك، بۇعان دەيىن بەلگىلى ۇستاز، Qazbilim جوباسىنىڭ اۆتورى اياتجان احمەتجان ۇلى اتالعان جاعدايعا بايلانىستى پىكىر ءبىلدىرىپ، ماسەلەنىڭ ءتۇپ-تامىرى تەرەڭدە جاتقانىن ايتتى.
“مەن ول جەردەن ەشتەڭە كۇتپەدىم. سەبەبى قالا اكىمى مەن ءبىلىم ءبولىمى باسشىسىنىڭ مۇعالىمگە الىمجەتتىك جاساۋىنان ءمۇعالىم شىرشادان ۇشىپ كەتىپ، جارالاندى ەمەس پە؟ ءدال سوندايلار توقتاعاندا عانا وقۋشىلار اراسىنداعى الىمجەتتىك تە توقتاۋى مۇمكىن”، - دەيدى ول.
ونىڭ ايتۋىنشا، قوعامداعى قاتىگەزدىك پەن زورلىق-زومبىلىق ەرەسەكتەردىڭ بىر-بىرىنە كورسەتەتىن قارىم-قاتىناسىنان باستاۋ الادى.
“اۋىرلاۋ شىعار. ءبىراق اگرەسسيا اگرەسسيانى تۋدىرادى. اكىمشىلىكتىڭ مۇعالىمگە كورسەتكەن اگرەسسياسى — ءمۇعالىمنىڭ وقۋشىعا اگرەسسياسىن تۋدىرادى. ءمۇعالىم مەن اتا-انانىڭ بالاعا كورسەتكەن اگرەسسياسى — ولاردىڭ جۇرەگىن قاتايتىپ، بىر-بىرىنە اگرەسسياسىن تۋدىرادى.
ۇيىندە اتا-اناسى بالاسىنىڭ كوزىنشە بوقتىق ءسوزدى ەركىن قولدانىپ، اۋىر سوزدەر ايتاتىن بولسا، بالا ءۇشىن بۇل قالىپتى جاعدايعا اينالادى. مۇنداي ورتادا وسكەن بالا بوقتاۋدى دا، توبەلەستى دە، الىمجەتتىكتى دە قالىپتى قۇبىلىس رەتىندە قابىلدايدى. ويتكەنى بالاپان ۇيادا نە كورسە، ۇشقاندا سونى ىلەدى”، — دەپ قوستى ول.
ۇستاز بۇل وقيعانىڭ قوعامدى ءدۇر سىلكىندىرگەنىمەن، شىن مانىندە جابۋلى كۇيىندە قالىپ جاتقان جاعدايلاردىڭ الدەقايدا كوپ ەكەنىن ايتتى.
ايتا كەتەيىك، بۇعان دەيىن سەمەيدە ءبىر توپ ءجاسوسپىرىم 6-سىنىپ وقۋشىسىن جابىلىپ تەپكىنىڭ استىنا العان ەدى. سونىمەن قاتار ونى قورلاپ، مۇشەقاپ ۇرلەتىپ، ۆيدەوعا تۇسىرگەن.
ءقازىر پوليسيا بولعان وقيعا بويىنشا قىلمىستىق ءىس قوزعادى.
وسى جاعدايعا بايلانىستى مەكتەپ ديرەكتورى جۇمىستان بوساتىلدى.
ال الىمجەتتىك كورسەتكەن بالالار ارنايى مەكتەپتەردە وقيتىندى بولدى.
سونىمەن قاتار وتكەن جىلى جاڭا جىلدىق شىرشانى بەزەندىرۋ كەزىندە 23 جاستاعى ءمۇعالىم بيىكتەن قۇلاپ، اۋىر جاراقات العان ەدى. ول ءبىراز ۋاقىت توسەك تارتىپ جاتىپ قالدى. تەكسەرۋ بارىسىندا ەڭبەك ينسپەكسياسى جۇمىس بەرۋشىنىڭ كىناسىن تولىق دالەلدەدى. ءسويتىپ جۇمىس بەرۋشى زارداپ شەككەن پەداگوگتىڭ ەم-دوم كەزەڭىندەگى جالاقىسىن تولىق تولەۋگە جانە ەمگە جۇمساعان شىعىندارىن وتەۋگە مىندەتتەلدى.
