شىعىس قازاقستان وبلىسىنىڭ سەمەي قالاسىندا تاريحي ماڭىزدىلىعى مەن ساقتالۋ دارەجەسىن انىقتاۋ ماقساتىندا تاريحي-مادەني ساراپتامادان ءوتىپ جاتقان بۇرىنعى كوپەس ءۇيىنىڭ قابىرعاسى رۇقساتسىز بۇزىلعان.
ەستەرىڭىزگە سالا كەتەيىك، بۇعان دەيىن عيمارات يەسى ونىڭ جانىنان ساۋدا ءۇيىن سالعان ەدى. ال ونىڭ ورنىنا تۇرعىن ءۇي سالۋ ءۇشىن بۇرىنعى كوپەس ءۇيىن بۇزىپ تاستاۋدى جوسپارلاعان بولاتىن.
سەمەيگە جۇمىس ساپارى اياسىندا شىعىس قازاقستان وبلىسىنىڭ اكىمى دانيال احمەتوۆ كاسىپكەرمەن كەزدەسىپ، ونىمەن اڭگىمەلەسۋ بارىسىندا بيلىك قۇرىلىستى باستاپقى قالىپىنا كەلتىرۋگە قارجى بولۋگە نيەتتى ەكەنىن ايتتى. سونداي-اق، ول جەرگىلىكتى اتقارۋشى ورگاندار عيماراتتىڭ تاريحي قۇندىلىعىن راستاۋ ءۇشىن قاجەتتى قۇجاتتاردى دايىنداعانىن اتاپ ءوتتى.
شقو مادەنيەت باسقارماسىنىڭ اقپاراتى بويىنشا، ەسكى عيماراتقا جەرگىلىكتى ماڭىزى بار تاريح جانە مادەنيەت ەسكەرتكىشى مارتەبەسىن بەرۋ پروسەسى قولعا الىنعان، سوندىقتان ونىڭ يەسى عيماراتتىڭ ساقتالۋىن قامتاماسىز ەتۋى ءتيىس.
– عيمارات تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە ءالى ەنگەن جوق. الايدا بيىل 9 ماۋسىم كۇنى تاريح جانە مادەنيەت ەسكەرتكىشتەرىن قورعاۋ جونىندەگى وبلىستىق كوميسسيانىڭ وتىرىسىندا وعان جەرگىلىكتى ماڭىزى بار تاريح جانە مادەنيەت ەسكەرتكىشى مارتەبەسىن بەرۋ ماسەلەسى قارالدى، – دەيدى شقو مادەنيەت باسقارماسى باسشىسىنىڭ مىندەتىن اتقارۋشى راۋشان نۇرمۇحانوۆا.
ونىڭ ايتۋىنشا، 9 ماۋسىمنان باستاپ كوپەس ءۇيىنىڭ قازىرگى يەسى ونىڭ ساقتالۋىن قامتاماسىز ەتۋى كەرەك. ال ول بولسا عيمارات قابىرعالارىنىڭ ءبىرىن بۇزۋعا جول بەرگەن. اتالعان فاكت بويىنشا سەمەي قالاسىنىڭ مادەنيەت جانە تىلدەردى دامىتۋ ءبولىمى قۇقىق قورعاۋ ورگاندارىنا جۇگىندى. ەگەر عيماراتتى يەسىنىڭ ءوزى بۇزعانى انىقتالسا، وعان قاتىستى قىلمىستىق ءىس قوزعالادى.
