Semeide qabyrǵasy buzylǵan eski kópes úiin tarihi qundylyqqa jatqyzýǵa bola ma?
Shyǵys Qazaqstan oblysynyń Semei qalasynda tarihi mańyzdylyǵy men saqtalý dárejesin anyqtaý maqsatynda tarihi-mádeni saraptamadan ótip jatqan burynǵy kópes úiiniń qabyrǵasy ruqsatsyz buzylǵan.
Esterińizge sala keteiik, buǵan deiin ǵimarat iesi onyń janynan saýda úiin salǵan edi. Al onyń ornyna turǵyn úi salý úshin burynǵy kópes úiin buzyp tastaýdy josparlaǵan bolatyn.
Semeige jumys sapary aiasynda Shyǵys Qazaqstan oblysynyń ákimi Danial Ahmetov kásipkermen kezdesip, onymen áńgimelesý barysynda bilik qurylysty bastapqy qalypyna keltirýge qarjy bólýge nietti ekenin aitty. Sondai-aq, ol jergilikti atqarýshy organdar ǵimarattyń tarihi qundylyǵyn rastaý úshin qajetti qujattardy daiyndaǵanyn atap ótti.
ShQO Mádeniet basqarmasynyń aqparaty boiynsha, eski ǵimaratqa jergilikti mańyzy bar tarih jáne mádeniet eskertkishi mártebesin berý protsesi qolǵa alynǵan, sondyqtan onyń iesi ǵimarattyń saqtalýyn qamtamasyz etýi tiis.
– Ǵimarat tarih jáne mádeniet eskertkishteriniń memlekettik tizimine áli engen joq. Alaida biyl 9 maýsym kúni tarih jáne mádeniet eskertkishterin qorǵaý jónindegi oblystyq komissiianyń otyrysynda oǵan jergilikti mańyzy bar tarih jáne mádeniet eskertkishi mártebesin berý máselesi qaraldy, – deidi ShQO Mádeniet basqarmasy basshysynyń mindetin atqarýshy Raýshan Nurmuhanova.
Onyń aitýynsha, 9 maýsymnan bastap kópes úiiniń qazirgi iesi onyń saqtalýyn qamtamasyz etýi kerek. Al ol bolsa ǵimarat qabyrǵalarynyń birin buzýǵa jol bergen. Atalǵan fakt boiynsha Semei qalasynyń Mádeniet jáne tilderdi damytý bólimi quqyq qorǵaý organdaryna júgindi. Eger ǵimaratty iesiniń ózi buzǵany anyqtalsa, oǵan qatysty qylmystyq is qozǵalady.
