سەمەيدە قارجى پيراميداسىنان زارداپ شەككەن جٷزدەگەن ادام سوتتىڭ ەدٸل شەشٸمٸن كٷتٸپ وتىر. كەلتٸرٸلگەن جالپى شىعىن كٶلەمٸ ميلليارد تەڭگەدەن اسىپ كەتكەن. ٸس بويىنشا 100-دەن استام ادام جەبٸرلەنۋشٸ دەپ تانىلىپ, التى كٷدٸكتٸگە ايىپ تاعىلعان, دەپ حابارلايدى Dalanews.kz «جەتٸنشٸ ارناعا» سٸلتەمە جاساپ.
قالا تۇرعىندارىنىڭ بٸرٸ وڭاي تابىس تۋرالى ۋەدەلەرگە سەنٸپ, قارجى پيراميداسىنىڭ قۇربانى بولعان. كٶپتەن كٷتكەن ٶز ٷيٸنٸڭ ورنىنا ول بٸر جارىم جىلدان بەرٸ جالدامالى پەتەردەن پەتەرگە كٶشٸپ جٷر. ەيەلدٸڭ ايتۋىنشا, بٸرنەشە جىل بۇرىن ونىڭ وتباسى پيراميدانى ۇيىمداستىرۋشىلارعا 15 ميلليون تەڭگە بەرگەن.
جەبٸرلەنۋشٸنٸڭ تانىسى اقشا سالسا, كٶپبالالى وتباسىعا كەڭ ەرٸ جايلى باسپانا الىپ بەرٸلەتٸنٸن ايتىپ سەندٸرگەن. قازٸر بەس بالاسى بار انا بالالارىمەن بٸرگە ۋاقىتشا تۋىستارىنىڭ ٷيٸن پانالاپ وتىر.
«شىنىمدى ايتسام, بٸزدٸڭ جاعدايىمىزدى بٸلەتٸن, بەس بالام بار ەكەنٸن, ونىڭ ٸشٸندە ەرەكشە قاجەتتٸلٸگٸ بار بالام بارىن بٸلەتٸن ادامنىڭ وسىنداي ەرەكەتكە باراتىنىن ەلەستەتە المادىم. سوت ٸسٸ ەزٸرگە العا جىلجيتىن تٷرٸ جوق. ەدٸل شەشٸم بولادى دەپ ٷمٸتتەنەمٸز», – دەدٸ ەيەل جۋرناليستەرگە.
قوماقتى قاراجات سالعانداردىڭ اراسىندا كٶپبالالى ەكە دە بار. ونىڭ ايتۋىنشا, ول شامامەن 200 ميلليون تەڭگەسٸنەن ايىرىلعان.
«مەن “راحات” جشس-نە شامامەن ەكٸ جٷز ميلليون تەڭگە سالدىم. العاشىندا از مٶلشەردە سالدىق, كەيٸن كٶبٸرەك ينۆەستيتسييالاي باستادىق, ٶيتكەنٸ سەندٸك. بٸراق بٸزدٸڭ سەنٸمٸمٸزدٸ پايدالانىپ كەتتٸ. ەندٸ اقشامىزدى قايتارا الماي وتىرمىز», – دەدٸ ول.
جەبٸرلەنۋشٸلەردٸڭ ايتۋىنشا, كەيبٸر ادامدار سالعان قارجىسىنان ايىرىلعانىن كٶتەرە الماعان. كٶپشٸلٸگٸ كٶلٸك الىپ, باسپانا ساتىپ الىپ, بالالارىنا جارقىن بولاشاق سىيلاۋدى ارمانداعان. الايدا ولاردىڭ ٷمٸتٸ اقتالماعان. تەك سەمەيدٸڭ ٶزٸندە قارجى پيراميداسىنان زارداپ شەككەن 141 ادام رەسمي تٷردە جەبٸرلەنۋشٸ رەتٸندە تانىلعان.
تەرگەۋ دەرەگٸنشە, تٶلەمدەر قارجى پيراميدالارىنا تەن كلاسسيكالىق سحەما بويىنشا جٷرگٸزٸلگەن – جاڭا سالىمشىلاردىڭ اقشاسى بۇرىنعى سالىمشىلارعا تاراتىلعان.
اباي وبلىسى بويىنشا ەكونوميكالىق تەرگەپ-تەكسەرۋ دەپارتامەنتٸ باسشىسىنىڭ ورىنباسارى سەكەن قوندىباەۆتىڭ ايتۋىنشا, جالپى شىعىن كٶلەمٸ ميلليارد تەڭگەدەن اسادى. ونىڭ ٸشٸندە 200 ميلليون تەڭگەدەن استام قاراجات ٸشٸنارا ٶتەلگەن.
قازٸرگٸ ۋاقىتتا ٸس سوت قاراۋىندا.
قۇقىق قورعاۋ ورگاندارى قازاقستاندىقتاردى مۇنداي ۇسىنىستارعا سەنبەي, قارجىلىق جوبالاردى مۇقييات تەكسەرۋگە شاقىردى.
