Semeide qarjy piramidasynan zardap shekken júzdegen adam sottyń ádil sheshimin kútip otyr. Keltirilgen jalpy shyǵyn kólemi milliard teńgeden asyp ketken. Is boiynsha 100-den astam adam jábirlenýshi dep tanylyp, alty kúdiktige aiyp taǵylǵan, dep habarlaidy Dalanews.kz «Jetinshi arnaǵa» silteme jasap.
Qala turǵyndarynyń biri ońai tabys týraly ýádelerge senip, qarjy piramidasynyń qurbany bolǵan. Kópten kútken óz úiiniń ornyna ol bir jarym jyldan beri jaldamaly páterden páterge kóship júr. Áieldiń aitýynsha, birneshe jyl buryn onyń otbasy piramidany uiymdastyrýshylarǵa 15 million teńge bergen.
Jábirlenýshiniń tanysy aqsha salsa, kópbalaly otbasyǵa keń ári jaily baspana alyp beriletinin aityp sendirgen. Qazir bes balasy bar ana balalarymen birge ýaqytsha týystarynyń úiin panalap otyr.
«Shynymdy aitsam, bizdiń jaǵdaiymyzdy biletin, bes balam bar ekenin, onyń ishinde erekshe qajettiligi bar balam baryn biletin adamnyń osyndai áreketke baratynyn elestete almadym. Sot isi ázirge alǵa jyljityn túri joq. Ádil sheshim bolady dep úmittenemiz», – dedi áiel jýrnalisterge.
Qomaqty qarajat salǵandardyń arasynda kópbalaly áke de bar. Onyń aitýynsha, ol shamamen 200 million teńgesinen aiyrylǵan.
«Men “Rahat” JShS-ne shamamen eki júz million teńge saldym. Alǵashynda az mólsherde saldyq, keiin kóbirek investitsiialai bastadyq, óitkeni sendik. Biraq bizdiń senimimizdi paidalanyp ketti. Endi aqshamyzdy qaitara almai otyrmyz», – dedi ol.
Jábirlenýshilerdiń aitýynsha, keibir adamdar salǵan qarjysynan aiyrylǵanyn kótere almaǵan. Kópshiligi kólik alyp, baspana satyp alyp, balalaryna jarqyn bolashaq syilaýdy armandaǵan. Alaida olardyń úmiti aqtalmaǵan. Tek Semeidiń ózinde qarjy piramidasynan zardap shekken 141 adam resmi túrde jábirlenýshi retinde tanylǵan.
Tergeý dereginshe, tólemder qarjy piramidalaryna tán klassikalyq shema boiynsha júrgizilgen – jańa salymshylardyń aqshasy burynǵy salymshylarǵa taratylǵan.
Abai oblysy boiynsha Ekonomikalyq tergep-tekserý departamenti basshysynyń orynbasary Sáken Qondybaevtyń aitýynsha, jalpy shyǵyn kólemi milliard teńgeden asady. Onyń ishinde 200 million teńgeden astam qarajat ishinara ótelgen.
Qazirgi ýaqytta is sot qaraýynda.
Quqyq qorǵaý organdary qazaqstandyqtardy mundai usynystarǵa senbei, qarjylyq jobalardy muqiiat tekserýge shaqyrdy.
