بۇگىن اباي وبلىسىندا ەڭبەك كۇنىن مەرەكەلەۋ اياسىندا «ەڭبەك جولى» رەسپۋبليكالىق بايقاۋىنىڭ وبلىستىق كەزەڭىنىڭ جەڭىمپازدارى سالتاناتتى جاعدايدا ماراپاتتالدى. بايقاۋ جىل سايىن وبلىستىق جانە رەسپۋبليكالىق دەڭگەيدە ءۇش نوميناسيا بويىنشا ۇيىمداستىرىلىپ تۇرادى. وسى جولى دا «ۇزدىك ەڭبەك اۋلەتى»، «ەڭبەكشى جاستاردىڭ ۇزدىك تالىمگەرى»، «ۇزدىك جاس ءوندىرىس قىزمەتكەرى» دەگەن اتالىمدار بويىنشا ۇزدىكتەر انىقتالدى، – دەپ حابارلايدى Dalanews.kz اباي وبلىسى اكىمىنىڭ باسپا ءسوز قىزمەتىنە سىلتەمە جاساپ.

ايتۋلى شاراعا قاتىسۋشىلاردى اباي وبلىس اكىمى اپپاراتىنىڭ باسشىسى جاسۇلان سارسەبايەۆ اق تىلەگىن ارناپ، جينالعان قاۋىمدى ەڭبەك كۇنىمەن قۇتتىقتادى.

بايقاۋدىڭ وبلىستىق كەزەڭىن قورىتىندىلاۋ بارسىندا اباي وبلىسىندا «ۇزدىك ەڭبەك اۋلەتى» اتالىمى بويىنشا جالپى ەڭبەك وتىلدەرى 592 جىلدى قۇرايتىن تەمىرجولشىلار اۋلەتىنىڭ وكىلى ەڭسەبايەۆتار ۇزدىك دەپ تانىلدى.

ال «ەڭبەكشى جاستاردىڭ ۇزدىك تالىمگەرى» اتالىمى بويىنشا جارما اۋداندىق اۋرۋحاناسىندا 39 جىل ەڭبەك ەتىپ كەلە جاتقان سارا سۇلەيمەنوۆا جەڭىمپاز اتانسا، «ۇزدىك جاس ءوندىرىس قىزمەتكەرى» نوميناسياسىنا ايگەرىم اعاتانوۆا يە بولدى.

ايگەرىم حانىم وسى نوميناسيا بويىنشا رەسپۋبليكالىق كەزەڭنىڭ جەڭىمپازى اتانعانىن ايتا كەتۋىمىز كەرەك. ول «ۆوستوك برويلەر» جشس-دە باس مال دارىگەرى بولىپ جۇمىس ىستەيدى.

سونىمەن قاتار، شارۋا قوجالىقتارى، زاۋىتتار مەن ءتۇرلى كاسىپورىنداردىڭ وكىلدەرى دە العىس حاتقا يە بولدى.

ەڭبەك وزاتتارىن ماراپاتتاۋ راسىمىنەن كەيىن سەمەي قالاسىنداعى ورتالىق ارباتتا بوس جۇمىس ورىندارى جارمەڭكەسى، «ەڭبەك ادامى» كورمەسى ءوتتى.  كورمەدە مەملەكەتتىك گرانت يەگەرلەرى ازاماتتاردى ءوز كاسىپتەرىمەن تانىستىرىپ، قالاي جۇمىس جاساۋ كەرەكتىگى جايىنداعى ىس-تاجىريبەلەرىمەن  ءبولىستى.

بۇدان كەيىن مەرەكەلىك ءىس-شارا ءا.قاشاۋبايەۆ اتىنداعى مەملەكەتتىك فيلارمونيا ونەرپازدارى دايىنداعان كونسەرتتىك باعدارلاماعا ۇلاستى.