فەستيۆالدىڭ اشىلۋ سالتاناتىندا ق ر مادەنيەت جانە سپورت مينيسترلىگىنىڭ تەاتر جانە كينوماتوگرافيا باسقارماسىنىڭ باس ساراپشىسى گۇلنافيس مىرزاشيەۆا مينيستر اقتوتى رايىمقۇلوۆانىڭ قۇتتىقتاۋ حاتىن وقىپ بەردى.
مينيستر حانىم ءوزىنىڭ ءۇبۋ حاتىندا «بۇل فەستيۆال بۇكىل سانالى عۇمىرىن ۇلتتىق ونەرگە ارناعان ءامينا ءومىرزاقوۆانىڭ 100 جىلدىعى يۋنەسكو-نىڭ اتاۋلى داتالار كۇنتىزبەسىنە ەنگىزىلگەندىگىمەن ەرەكشەلەنەدى. قازاقستان دراما تەاترلارىنىڭ XXVII رەسپۋبليكالىق فەستيۆالى وتاندىق تەاترلاردىڭ ۇزدىك قويىلىمدارى كورسەتىلەتىن، شىعارماشىلىق بايقاۋلار مەن باستامالار الاڭىنا اينالاتىنا سەنىمدىمىن» دەپ وي قورىتىپتى.
– وتكەندى ۇمىتپاي، ارعىدان كەلە جاتقان ءداستۇرىمىزدى جالعاپ، حالىققا ونەرىمىزدى پاش ەتسەك ءبىزدىڭ ماقساتىمىزدىڭ ورىندالعانى. ءامينا اپامىزبەن بىرگە جۇردىك، بىرگە جۇمىس ىستەدىك. ۇلى شاكەننىڭ دوسى ەدى. ەكەۋى قاتار وتىرعاندا ەلدى كۇلكىگە قارق قىلاتىن. ءامينا – ۇلى اكتريسا، – دەدى فەستيۆالدىڭ اشىلۋ سالتاناتىندا ءسوز سويلەگەن ءاسانالى ءاشىموۆ.
شاراعا ەلىمىزگە تانىمال اكتريسا مەرۋەرت وتەكەشوۆامەن ب ا ق وكىلدەرىنىڭ اراسىندا اشىق پىكىر الماسۋىمەن باستالدى. جيىن بارىسىندا ءسوز العان قۇرمەتتى قوناق قازاقستان تەاترلارى اسسوسياسياسىنىڭ ۆيسە-پرەزيدەنتى، قازاقستاننىڭ ەڭبەك سىڭىرگەن قايراتكەرى، فيلوسوفيا عىلىمىنىڭ دوكتورى، اسحات ماەميروۆ:
– ءامينا ءومىرزاقوۆا تەاتر جانە كينو ونەرىندە جانر تاڭداماعان اكتريسا. قازىرگى تاڭدا ونەر زەرتتەۋشىلەردىڭ الدىندا ۇلكەن ماقساتتار جاتىر. اتاپ ايتسام، ول ءامينا ءومىرزاقوۆا تۋرالى دوكتورلىق، ماگيسترلىك ديسسەرتاسيا قورعاۋ. اپامىزدىڭ تەاترداعى رولدەرى ءوز الدىنا ءبىر توبە، كينوداعى وبرازدارى ءوز الدىنا ءبىر توبە. وتكىزىلگەلى وتىرعان رەسپۋبليكالىق تەاتر فەستيۆالدە كلاسسيكالىق الەمدىك شىعارمالاردان باستاپ، قازاقتىڭ مۇحتار اۋەزوۆ، بەردىبەك سوقپاقبايەۆ سىندى تۇلعالاردىڭ شىعارماسىن ساحنادا سويلەتەتىن بولادى، – دەدى.
سونىمەن قاتار ول ەرمەك امانشايەۆتىڭ، باۋىرجان جاقىپتىڭ، ەرسايىن تولەۋباي سىندى وتاندىق اۆتورلاردىڭ دا شىعارمالارى قاتىساتىنىن ايتتى. شاراعا قاتىسقان تەاتىر ماماندارى فەستيۆال قازاقستانداعى تەاترلاردىڭ تىنىس-تىرشىلىگى، كوركەمدىك دەڭگەيىن، تاقىرىپتىق تۇرعىدان قاي باعىتتا وزگەرىپ جاتقاندىعىن باعداۋ ءۇشىن اسا قاجەت ەكەنىن العا تارتتى.
– ءقازىر قازاقستان تەاترلارى شەتەلگە كوپتەپ شىعۋدا. حالىقارالىق ارەنادا ەڭسەسى بيىك ابىرويى ۇستەم. سەبەبى، «رۋحاني جاڭعىرۋ» باعدارلاماسىنىڭ اياسىندا بىرنەشە حالىقارالىق دەڭگەيدە جوبالار وتكىزىلىپ جاتىر. وسى فەستيۆال دا ءوز ماقساتىنا جەتەدى. سەمەي تەاترى كەزىندە ۇلكەن تەاتر بولدى. ءقازىر وسى شاڭىراقتا ءۇش تەاتر شىعارماشىلىق ۇندەستىكپەن باس قوسقان. اتاپ ايتساق، اباي اتىنداعى قازاق مۋزىكالىق دراما تەاترى، دوستايەۆسكيي اتىنداعى ورىس دراما تەاترى، «داريعا-اي» جاستار تەاترى. سوندىقتان بۇل جەردە تەاتر ءداستۇرى تامىرىن تەرەڭ جايعان دەپ ەسەپتەيمىن، – دەدى بىلىكتى تەاتىر سالاسىنىڭ بىلگىر مامانى.
ءامينا ءومىرزاقوۆانىڭ قاسيەتتى سەمەي توپىراعىنان شىعۋى تەگىن ەمەس. ويتكەنى، قازاق تەاترىنىڭ ءتۇپ تامىرى، العاشقى تەاترلانعان قويىلىم م.اۋەزوۆتىڭ «ەڭىلىك-كەبەك» پەساسى نەگىزىندە ويقۇدىق جايلاۋىندا كورەرمەنگە جول تارتقان بولاتىن.
تەاتر فەستيۆالى قازىلار القاسى قۇرامىندا ءاسانالى ءاشىموۆ، قازاقتىڭ «قىز جىبەگى» مەرۋەرت وتەكەشوۆا، قازاقستاننىڭ ەڭبەك سىڭىرگەن قايراتكەرى اسحات ماەميروۆ سىندى بىلىكتى ازاماتتاردان قۇرالعان.
سەمەي تورىندە ءوتىپ جاتقان فەستيۆالگە ەلىمىزدىڭ 12 تەاتر ۇجىمى ۇزدىك قويىلىمدارىمەن قاتىسۋدا. التى كۇن بويى سەمەي قالاسىنىڭ قوناقتارى مەن تۇرعىندارى فەستيۆال بارىسىندا ق.قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى، ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى، اباي اتىنداعى قازاق مۋزىكالىق دراما تەاترى، ن.ءجانتورين اتىنداعى ماڭعىستاۋ وبلىستىق مۋزىكالىق-دراما تەاترى، م.گوركيي اتىنداعى مەملەكەتتىك اكادەميالىق ورىس دراما تەاترى، ف.م. دوستويەۆسكيي اتىنداعى ورىس دراما تەاترى، قىزىلوردا وبلىستىق ن.بەكەجانوۆ اتىنداعى قازاق مۋزىكالىق دراما تەاترى، «Nomad» تەاترى، ج.ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترى، «داريعا-اي» جاستار تەاترى، س.مۇقانوۆ اتىنداعى سولتۇستىك قازاقستان وبلىستىق قازاق سازدى-دراما تەاترى، شىعىس قازاقستان وبلىستىق دراما تەاترلارىنىڭ قويىلىمدارىن تاماشالاي الادى.
DN-اقپارات
