اقش-قا جۇمىس ساپارى اياسىندا پرەزيدەنت قاسىم-جومارت توقايەۆ Boeing كورپوراسياسىنىڭ باسشىلىعىمەن كەزدەستى، دەپ حابارلايدى Dalanews.kz.
كەزدەسۋدە جاڭا ۇشاقتار ساتىپ الۋ جانە شىمكەنتتە تەحنيكالىق قىزمەت كورسەتۋ ورتالىعىن اشۋ ماسەلەلەرى تالقىلاندى.
مەملەكەت باسشىسى Air Astana، SCAT جانە Vietjet Qazaqstan اۋە تاسىمالداۋشىلارى بىرلەسكەن جوبالاردى ىلگەرىلەتۋگە مۇددەلى ەكەنىن اتاپ ءوتتى. پرەزيدەنت Air Astana مەن Boeing اراسىنداعى اۋە كەمەلەرىن جەتكىزۋ تۋرالى كەلىسىمگە قول جەتكىزىلگەنىن قۇپتادى.
جوسپار بويىنشا، 2026 جىلدىڭ ەكىنشى جارتىسىندا قازاقستانعا Boeing 787 Dreamliner ۇشاقتارى جەتكىزىلەدى. بۇل اقش-پەن تىكەلەي اۋە قاتىناسىن ىسكە قوسۋعا مۇمكىندىك بەرمەك.
سونىمەن قاتار SCAT كومپانياسى قوسىمشا Boeing ۇشاقتارىن ساتىپ الۋدى جوسپارلاپ وتىر. بۇدان بولەك، اۋەكومپانيا شىمكەنت اۋەجايىندا Boeing-پەن سەرىكتەستىكتە تەحنيكالىق قىزمەت كورسەتۋ جانە جوندەۋ بويىنشا العاشقى ورتالىق اشۋ مۇمكىندىگىن قاراستىرۋدا. بۇل جوبا جۇزەگە اسسا، قازاقستاننىڭ وڭتۇستىگى وڭىرلىك اۆياسيالىق حابقا اينالۋى ىقتيمال.
Boeing كومپانياسىنىڭ وكىلى دجەفف شوككي سيفرلاندىرۋ باعىتىنداعى جوسپارلارىمەن ءبولىسىپ، قازاقستاننىڭ ترانزيتتىك الەۋەتىن جوعارى باعالادى. ول جۇك اۆياسياسى سالاسىندا ىنتىماقتاستىقتى كەڭەيتۋگە مۇمكىندىك بار ەكەنىن ايتتى.
كەزدەسۋ بارىسىندا وتاندىق اۆياسيا سالاسىنا ماماندار دايارلاۋ جانە جۇك ۇشاقتارى پاركىن دامىتۋ ماسەلەلەرى دە قوزعالدى.
ايتا كەتەيىك، بۇعان دەيىن پرەزيدەنت اقش-تىڭ حالىقارالىق دامۋ قارجى كورپوراسياسىنىڭ اتقارۋشى ديرەكتورى بەن بلەكپەن دە كەزدەسۋ وتكىزگەن ەدى.
