– بۇگىن ءبىز رەسەيدىڭ ۋكرايناعا جاساعان اگەرسسيالىق ارەكەتىنە قارسى التىنشى سانكسيالار پاكەتىن جاريالادىق. ءبىرىنشى كەزەكتە – بىزدەر رەسەيدىڭ جوعارى لاۋازىمدى اسكەري قىزمەتكەرلەرى مەن وزگە دە جاۋاپتى تۇلعالارىنىڭ بۋچا مەن ماريۋپول قالالارىندا ادامشىلىققا جاتپايتىن ارەكەتكە جول بەرگەنى ءۇشىن ولارعا قارسى سانكسيا جاريالاپ وتىرمىز. بۇل كرەملدىڭ اسكەريلەرى ءۇشىن ۇلكەن ەسكەرتۋ. ءبىز ولاردىڭ كىمدەر ەكەنىن جاقسى بىلەمىز. الداعى ۋاقىتتا ولار جاساعان قىلمىستارى ءۇشىن جاۋاپ بەرەتىن بولادى، – دەپ ۋرسۋلا فون دەر ليايەن رەسەيگە سەس كورسەتتى.
سونىمەن بىرگە ەو باسشىسى رەسەيدىڭ ەڭ ءىرى بانكى «سبەربانك» SWIFT جۇيەسىنەن اجىراتىلىعانىن جاريا ەتتى.
– التىنشى سانكسيالار پاكەتىن وراي، رەسەيدىڭ جەتەكشى بانكى «سبەربانك» SWIFT جۇيەسىنەن اجىراتىلدى. بۇل اگرەسسور ەلدىڭ قارجى جۇيەسىنە جاسالعان ۇلكەن سوققى. ەندى رەسەي ءۇشىن دۇنيەجۇزىلىك قارجى جۇيەسى قولجەتىمسىز، – دەدى ۋرسۋلا فون دەر ليايەن.
جاڭادان قابىلدانعان سانكسيالار پاكەتىندە رەسەيدىڭ ءۇش بىردەي مەملەكەتتىك ارنالارىنىڭ ەۋرووداق اۋماعىنا حابار تاراتۋ قۇقىعىنان ايىرىلعانى ءمالىم بولدى. بۇل جايىندا ۋرسۋلا فون دەر ليايەن ويىن بىلايشا ساباقتادى.
– ەندى كرەملدىڭ پروپاگانداسىمەن اينالىساتىن مەملەكەتتىك ارنالار ەۋرووداق اۋماعىنا كابەل، سپۋتنيك جانە ينتەرنەت ارقىلى حابار تاراتۋىنا توسقاۋىل قويىلدى. رەسەيدىڭ مەملەكەتتىك ارنالارى ءپۋتيننىڭ جالعان مالىمدەمەلەرىن تاراتىپ، جۇرتتىڭ ميىن ۋلاۋىنا جول بەرمەيمىز. وسىعان دەيىن رەسەي ەۋروپا ەلدەرىنىڭ بىلىكتى بۋحگالتەر، كەڭەسشى جانە پيار ماماندارىنىڭ قىزمەتىنە جۇگىنىپ كەلگەن ەدى. ەندى ءبىزدىڭ تاجىريبەلى ماماندار رەسەي كومپانيالارىنا قىزمەت كورسەتپەيدى، – دەدى ەو باسشىسى.
بۇدان باسقا ەۋرووداق رەسەيدىڭ مۇنايىنان باس تارتۋ ماسەلەسىن قاراستىرىپ جاتقانىن ۋرسۋلا فون دەر ليايەن ءمالىم ەتتى.
– قازىرگى تاڭدا بىزدەر رەسەي مۇنايىن ەۋرووداق ەلدەرىنە ساتۋىنا تىيىم سالۋدى قاراستىرۋدامىز. الداعى ۋاقىتتا رەسەيدەن قۇبىر، تەڭىز جولدارىمەن كەلەتىن مۇناي جانە مۇناي ونىمدەرىنىڭ بارىنە تىيىم سالاتىن بولامىز. قازىرگى تاڭدا كەزەڭ-كەزەڭىمەن رەسەي مۇنايىنان باس تارتۋدى جولىن قاراستىرىپ جاتىرمىز. الداعى التى ايدا رەسەيدىڭ شيكى مۇنايىن باس تارتساق، جىل اياعىندا مۇناي ونىمدەرىن ەو اۋماعىنا تاسىمالداۋعا تولىقتاي توسقاۋىل قويامىز، – دەپ ەو باسشىسى جوسپارىمەن ءبولىستى.
