نازاربايەۆتىڭ ءباسپاسوز-حاتشىسى تۇڭعىش پرەزيدەنت كۇنى قارساڭىندا ازىرلەنگەن دەرەكتى ءفيلمنىڭ ترەيلەرىن كورەرمەن نازارىنا ۇسىندى دەپ حابارلايدى Dalanews.kz. 

"شتريحي ك پورترەتۋ" دەپ اتالاتىن دەرەكتى ءفيلمنىڭ تۇساۋكەسەرى ەرتەڭ كەشكى ساعات 21:40-تا "حابار" ارناسىندا وتەدى. مۇنى تۆيتتەر پاراقشاسى ارقىلى حابارلاعان نازاربايەۆتىڭ ءباسپاسوز-حاتشىسى فيلمنەن از-كەم ءۇزىندى ۇسىنعان ەكەن.

"ادامعا 100 پايىز سەنىم ارتاسىڭ. جانىڭا جاقىن ۇستايسىڭ. ول بولسا ارقا تۇسىڭنان تاسپەن ۇرادى. اسا ءبىر جيىركەنىشتى ارەكەت. ساتقىندىق پا؟ ساتقىندىقتى ەش ۋاقىتتا كەشىرمەيمىن. ءتىپتى تۋعان-تۋىسقانىمنىڭ وزىنە اياۋشىلىق تانىتقان جوقپىن"، – دەيدى وسى فيلمدە تۇڭعىش پرەزيدەنت.

فيلم جەلىسى نەگىزىنەن وتكەن وتىز جىلدى قورىتىندىلاۋعا قۇرىلعان سىڭايلى. نازاربايەۆ وسى كەزەڭدى وي ەلەگىنەن وتكىزە وتىرا، وتباسى ماسەلەسىن دە قوزعايدى.

دەرەكتى فيلم بىرنەشە بولىمنەن تۇرادى. تۇڭعىش پرەزيدەنتتىڭ ءومىرى جولى مەن قىزمەتتىك جىلدارىن تۇتاستاي قامتيتىن كارتينانىڭ رەجيسسەرى ايگۇل ءادىلوۆا دەگەن جۋرناليست. ءفيلمدى دايىنداۋعا ەلباسىنىڭ باسپاسوز-قىزمەتى مەن نازاربايەۆ قورى دەمەۋشىلىك ەتىپتى.

"ءسىز بۇل فيلمدە نازاربايەۆتى مۇلدە باسقا قىرىنان تانيسىز" – دەيدى ارىپتەسىمىز.

بۇل تۇڭعىش پرەزيدەنت كۇنىنە ارنالعان جالعىز جوبا ەمەس. مەرەكە كۇنى كورەرمەن "نازاربايەۆ فاكتورى" دەپ اتالاتىن تاعى ءبىر دەرەكتى ءفيلمدى تاماشالايتىن بولادى.

https://twitter.com/Aidos_Ukibay/status/1333350415241539584