ەنەرگەتيكا ءمينيسترى الماسادام ساتقالييەۆ ەلدە مۇناي ونىمدەرى تاپشىلىعىنىڭ الدىن الۋ ءۇشىن جاڭا مۇناي وڭدەۋ زاۋىتىن سالۋدى ۇسىندى، دەپ حابارلايدى Dalanews.kz.

مينيستر بۇل ماسەلەنى ماجىلىستەگى ۇكىمەت ساعاتىندا كوتەردى. ايتۋىنشا، 2036 جىلعا قاراي جەڭىل مۇناي ونىمدەرىنىڭ تاپشىلىعى كۇتىلۋدە.

“سول سەبەپتى قۋاتى جىلىنا 10 ملن توننا بولاتىن جاڭا مۇناي وڭدەۋ زاۋىتىن جوبالاۋدى 2030 جىلدان كەشىكتىرمەي قولعا الىپ، قۇرىلىستى 2032 جىلى باستاۋ ماڭىزدى”، - دەيدى ول.

ساتقالييەۆتىڭ سوزىنشە، بۇل جوبا 2040-2050 جىلدار ارالىعىندا ەلدىڭ جانار-جاعارمايعا دەگەن سۇرانىسىن تولىق قامتاماسىز ەتىپ قانا قويماي، ورتالىق، وڭتۇستىك جانە وڭتۇستىك-باتىس ازيانىڭ ءوسىپ كەلە جاتقان نارىقتارىنا جانار-جاعارماي ەكسپورتتاۋعا مۇمكىندىك بەرەدى.

سونىمەن قاتار مينيستر مەملەكەت باسشىسىنىڭ ىشكى نارىقتى وتاندىق بيتۋممەن قامتاماسىز ەتۋ قاجەتتىگىن ەرەكشە اتاپ وتكەنىن ايتتى.

“قازىرگى تاڭدا زاۋىتتاردىڭ جالپى وندىرىستىك قۋاتى 1،2 ملن توننانى قۇرايدى، بۇل ىشكى سۇرانىستى تولىق جابۋعا جەتكىلىكتى”، — دەدى مينيستر.

ايتا كەتەيىك، بۇگىن دەپۋتات باقتىقوجا ىزمۇحامبەتوۆ جاڭا مۇناي كەن ورىندارىن بارلاۋ جۇمىستارى جەتكىلىكسىز دەڭگەيدە قارجىلاندىرىلىپ جاتقانىن مالىمدەگەن ەدى.

“بۇگىن مۇناي وڭدەۋ زاۋىتتارىنا جەتكىزىلەتىن شيكىزات تۋرالى ايتىلدى. وتاندىق مۇناي وندىرۋشىلەر قورلارى ازايىپ، ءتيىمسىز جوبالارمەن اينالىسۋعا ءماجبۇر. بۇل الداعى جىلدارى مۇناي ءوندىرۋ كولەمىن ارتتىرۋدى بىلاي قويعاندا، قازىرگى دەڭگەيدە ۇستاپ تۇرۋدىڭ ءوزى قيىنعا سوعاتىنىن كورسەتەدى. بارلاۋ جۇمىستارىنا ەرەكشە كوڭىل ءبولۋ قاجەت، الايدا بۇل باعىتتا جاسالىپ جاتقان قادامدار جەتكىلىكسىز،” – دەدى دەپۋتات.

سونىمەن قاتار ىزمۇحامبەتوۆ گەولوگيالىق بارلاۋعا ءبولىنىپ جاتقان قارجىنىڭ تىم از ەكەنىن ايتتى.

“ەنەرگەتيكا مينيسترلىگىنىڭ مالىمەتىنشە، 2030 جىلعا دەيىن بارلاۋ جۇمىستارىنا 5 ميلليارد دوللار ينۆەستيسيا قۇيىلادى. جىلىنا بۇل شامامەن 1 ميلليارد دوللاردان از قارجىنى قۇرايدى. الايدا بۇل كولەم جەتكىلىكسىز، مۇنداي قارقىنمەن جوسپارلانعان جوبالاردى ىسكە اسىرۋ مۇمكىن بولمايدى. سوندىقتان بارلاۋ سالاسىنا كوبىرەك قارجى ءبولۋ كەرەك،” – دەپ تۇيىندەدى ول.

ەسكە سالايىق، بۇعان دەيىن دەپۋتات ەدىل جاڭبىرشين الداعى 15 جىلدا قازاقستانداعى كومىرسۋتەك رەسۋرستارىنىڭ قورى تاۋسىلۋى مۇمكىن ەكەنىن ايتقان ەدى.

ەدىل جاڭبىرشين بۇگىنگى تاڭدا مەملەكەتتىڭ ەسەبىندە كومىرسۋتەك شيكىزاتىنىڭ 548 كەن ورنى بار ەكەنىن، مۇناي قورىنىڭ جالپى كولەمى 4،3 ملرد توننانى قۇرايتىنىن ەسكە سالدى.

"كومىرسۋتەك شيكىزاتى قورىنىڭ 72% - ى تەڭىز، قاشاعان جانە قاراشىعاناق سياقتى ءىرى كەن ورىندارىنا تيەسىلى. 10-15 جىلدان كەيىن وسى ءۇش ءىرى كاسىپورىندا مۇناي مەن گاز ءوندىرۋ كولەمى تومەندەيتىنى انىق. سونىمەن قاتار، يگەرۋدىڭ كەش كەزەڭىندەگى كەن ورىندارىنىڭ كەيبىرىندە مۇناي مەن گاز ءوندىرىسى تومەندەيدى، كەيبىرىندە جۇمىس ءتىپتى توقتايدى... ەگەر گەولوگيالىق بارلاۋدىڭ قازىرگى باياۋ قارقىنى جانە مۇناي ءوندىرىسىنىڭ بۇگىنگى دەڭگەيى ساقتالسا، وندا الداعى 15 جىلدا كومىرسۋتەك رەسۋرستارىنىڭ قورى تۇگەسىلەدى"، - دەدى دەپۋتات.

ول قازاقستاندا جاڭا سۋتەكتەر قورىن اشۋ ءۇشىن بىزدەگى گەولوگيالىق بارلاۋ سالاسىنىڭ الەۋەتى جەتكىلىكتى ەكەنىن ايتادى. الايدا بۇل باعىتتاعى جۇمىستار سىلبىر جۇردە. ماسەلەن، دەپۋتاتتىڭ ايتۋىنشا، تاۋەلسىزدىك العالى 30 جىل ىشىندە ەلىمىزدە ءبىر عانا جاڭا كەن ورىنى اشىلعان.

بۇعان دەيىن وسى ۇكىمەت ساعاتىندا بايانداما جاساعان ەنەرگەتيكا ءمينيسترى الماسادام ساتقالييەۆ بيىلعى مۇناي ءوندىرىسى كولەمىنىڭ كۇرت قىسقارۋىنا نە سەبەپ بولعانىن تۇسىندىرگەن ەدى.