الماتى وبلىسى سارقان اۋدانى كوكتەرەك اۋىلدىق وكرۋگى مەن «جەبەۋ» رەسپۋبليكالىق قوعامدىق بىرلەستىگى ءوزارا كەلىسىم نەگىزىندە قانداستارىمىزدى اۋىلعا قونىستانىپ، ەگىن مەن مال شارۋاشىلىعىن وركەندەتۋگە شاقىرادى. كەزىندە مىڭداعان گەكتار جەرگە كوكونىس، جەمىس-جيدەك، قاۋىن-قاربىز، ءداندى داقىلدار ەگىپ، قازاقستانعا عانا ەمەس، ونىمدەرىن كەڭەس وداعىنىڭ ءبىراز بولىگىنە ەكسپورتتاعان، مىڭعىرتىپ مال باققان، بالىق شارۋاشىلىعىن وركەندەتكەن وكرۋگتىڭ قۇنارلى جەرى تۋسىراپ جاتىر. بۇل تۋرالى ءبىزدىڭ رەداكسياعا «جەبەۋ» بىرلەستىگىنىڭ حاتشىسى قارۋ قاسەن ۇلى حابارلادى.


ورمان-توعايلى، نۋلى-سۋلى، جىلدىڭ ءتورت مەزگىلى مەيىرىن اياماعان سارقان ءوڭىرىنىڭ ەڭ ءبىر شۇرايلى اۋىلى دا وسى – كوكتەرەك. اۋىلدىق وكرۋگتىڭ جالپى جەر اۋماعى 42847 گەكتار، مۇنىڭ 38079 گەكتارى جايىلىمدىق جەر. قالعان اۋماعى ەگىن ەگۋگە، بالىق شارۋاشىلىعى مەن جەمىس-جيدەك وسىرۋگە جارامدى. اۋىلدىق وكرۋگ اۋماعىن لەپسى مەن باسقان وزەنى كەسىپ وتەدى. وزەندەردىڭ ەكى جاعالاۋى كەزىندە جايقالتىپ استىق وسىرگەن سۋارمالى اتىز ەدى. ءقازىر دە لەپسىنىڭ سۋىن بۇرىپ، زاماناۋي تەحنيكامەن استىق وسىرەم دەگەن ادامدار بولسا، جۇگەرى، سويا، كۇنباعىس، بيداي سەكىلدى جانە الماتى وبلىسى ايرىقشا قولداۋ ءبىلدىرىپ وتىرعان قانت قىزىلشاسى، ماقسارى سياقتى كەز كەلگەن استىق ءتۇرىن وسىرۋگە قولايلى. وزەننىڭ ەكى القابىن ءقازىر جەرگىلىكتى تۇرعىندار جايىلىمعا پايدالانىپ وتىر. كەيبىر شارۋا قوجالىقتارى مىڭداعان گەكتار جەر العانىمەن، ولارعا سەلبەسەتىن ەڭبەك كۇشى جەتىسپەيدى. قانداستارىمىز اۋىلعا باراتىن بولسا، جۇمىسپەن قامتىلىپ، جەرگىلىكتى شارۋالارمەن ىنتىماقتاسا ءىس باستاۋلارىنا مۇمكىندىك مول.
اۋىلدىق اكىمشىلىك ءدال ءقازىر كوشىپ بارعىسى كەلگەن قانداستار (ورالماندار) ءۇشىن 600 گەكتار سۋارمالى ەگىن القابىن ءبولىپ بەرۋگە ءازىر. ال ەگەر ءىرى شاۋا قوجالىعىن قۇرامىن دەۋشىلەر بولسا وزەن بويىنداعى كەزىندە الىپ اتىزدىق بولعان جەرلەردى ۇلەستىرىپ بەرەدى.

[caption id="attachment_29310" align="aligncenter" width="640"] الماتى وبلىسى سارقان اۋدانى[/caption]

بۇدان بولەك، وكرۋگكە قاراستى جايلاۋ، قىستاۋ، كۇزەۋ، كوكتەۋگە ىڭعايلى جەرلەر دە وتە مول. كوشىپ بارعان ورالمانداردىڭ ەگىندىك جانە جايىلىمدىق جەر الىپ، اۋىلدا تۇراقتى تۇرۋى ءۇشىن ولاردىڭ ءتيىستى قۇجاتتارىن راسىمدەۋىنە، جەرلەرىن زاڭداستىرۋىنا اكىمشىلىك تاراپى كومەك قولىن سوزادى.
«ءبىزدىڭ ماقسات – كەزىندە ەگىن جانە مال شارۋاشىلىعى ارقىلى اتى الىسقا جەتكەن كوكتەرەكتىڭ تىنىس-تىرشىلىگىن جانداندىرۋ ءارى الىستان كەلگەن قانداستارىمىزدى وسى اۋىلدى بىرگە كوركەيتۋگە جۇمىلدىرۋ. اعايىندارىمىز اۋىلعا كەلسە، وزدەرى ءۇشىن دە، اۋىل ءۇشىن دە ءتيىمدى بولار ەدى»، – دەيدى اۋىل اكىمى سەرىك سماعۇلوۆ. اكىمنىڭ ايتۋىنشا، كوكتەرەك اۋىلدىق وكرۋگىندە ىشكى ميگراسيا سالدارىنان بوس قالعان قورا-جايلار مەن ۇيلەر دە بارشىلىق. ولاردى ارزان باعاعا ساتىپ الۋعا بولادى. ەگەر جاڭا ءۇي سالامىن دەۋشىلەر بولسا، جەر تەلىمى تەگىن بەرىلەدى.
اۋىلدىڭ قاتىناسى قولايلى. تەمىر جول مەن تاس جولعا قاشىق ەمەس.
ەگەر كوكتەرەك اۋىلىنا بارىپ، تۇراقتى تىركەۋگە تۇرىپ، مال باعىپ، ەگىن وسىرەم دەگەن قانداستارىمىز بولسا اۋىل اكىمىنە تىكەلەي حابارلاسۋىنا بولادى.
سەرىك سماعۇلوۆتىڭ تەلەفون ءنومىرى: 87711753065.

قارۋ قاسەن ۇلى: 87019898899