ق ر ۇلتتىق بانكىنىڭ ساراپشىلار قاۋىمداستىعى اراسىندا جۇرگىزگەن كەزەكتى ماكروەكونوميكالىق ساۋالنامانىڭ ناتيجەسى جاريالاندى. وعان سايكەس،ساراپشىلار 2025 جىلى كۇتىلەتىن ينفلياسيا كولەمىن 7،5%-عا دەيىن كوتەردى، دەپ جازادى Dalanews.kz.
Brent ماركالى مۇنايدىڭ باعاسى، قازاقستان ەكونوميكاسىنىڭ ءوسىمى، ينفلياسيا، بازالىق مولشەرلەمە، تاۋارلار مەن قىزمەتتەردىڭ ەكسپورتى جانە يمپورتى، سونداي-اق تەڭگە باعامى – ساۋالنامانىڭ نەگىزگى پارامەترى رەتىندە الىنعانىن باسا اتاپ وتەلىك.
ۇلتتىق بانكتىڭ مالىمەتىنشە، 2025 جىلدىڭ قاڭتار ايىندا جىل بويىنا ارنالعان مۇناي باعاسى بويىنشا سەناريي شارتتارى جاڭارتىلعان. مەديانالىق كۇتۋلەرگە سايكەس، 2025 جىلى Brent ماركالى مۇنايدىڭ ءبىر باررەلى 75،0 اقش دوللار دەڭگەيىندە قالىپتاسادى (بۇعان دەيىن – 76،5 اقش دوللار). 2026 جىلى "قارا التىننىڭ" ءبىر باررەلىنە ارنالعان بولجام 74،0 اقش دوللار دەڭگەيىندە ساقتالعان. 2027 جىلى كۇتىلەتىن باعا دا 75،0 اقش دوللار دەڭگەيىندە قالىپتاستى.
قازاقستاننىڭ 2025 جانە 2026 جىلدارعا ارنالعان ەكونوميكالىق ءوسۋ بولجامدارى وزگەرىسسىز قالىپ، تيىسىنشە 4،7% جانە 4،5% قۇرادى. 2027 جىلى ساراپشىلاردىڭ بولجامى بويىنشا ەكونوميكالىق ءوسىم قارقىنى 4،5% دەڭگەيىندە ساقتالادى.
"ساراپشىلار ينفلياسيا بولجامدارىن 2025 جىلعا — 6،9%-دان 7،5%-عا دەيىن، ال 2026 جىلعا — 6،0%-دان 6،5%-عا دەيىن كوتەردى. 2027 جىلى ينفلياسيا 5،6% دەڭگەيىندە بولادى دەپ باعالانادى. ينفلياسياعا قاتىستى باعامداردىڭ وزگەرۋىنە سايكەس بازالىق مولشەرلەمە بويىنشا بولجامدار دا قايتا قارالدى. 2025 جىلعا ارنالعان بولجامداردىڭ مەديانالىق ماندەرى 12،5%-دان 14،7%-عا دەيىن، 2026 جىلى — 10،3%-دان 11،8%-عا دەيىن تۇزەتىلدى. 2027 جىلى بازالىق مولشەرلەمە 10،5% دەڭگەيىندە بولادى دەپ بولجانادى"، دەلىنگەن ۇلتتىق بانك حابارلاماسىندا.
اقشا باعامىنا كەلەتىن بولساق، ساراپشىلار پىكىرىنشە، 2025 جىلدىڭ قورىتىندىسى بويىنشا ەلىمىزدە ۇلتتىق ۆاليۋتاعا شاققانداعى 1 اقش دوللارىنىڭ بولجامدى قۇنى 486،9 تەڭگەدەن 514،5 تەڭگەگە، 2026 جىلى 498،3 تەڭگەدەن 530 تەڭگەگە، 2027 جىلى 550 تەڭگەگە دەيىن ءوستى.
ساۋالناماعا قازاقستان بويىنشا ماكروەكونوميكالىق كورسەتكىشتەردى تالداۋمەن جانە بولجاۋمەن اينالىساتىن 12 ۇيىم قاتىستى. رەسپوندەنتتەردىڭ قاتارىنا نارىقتىڭ كاسىبي قاتىسۋشىلارى، زەرتتەۋ ينستيتۋتتارى، حالىقارالىق ۇيىمدار مەن رەيتينگتىك اگەنتتىكتەر كىرەدى.
ماكروەكونوميكالىق ساۋالناماعا ۇلتتىق بانك بولجامدارى كىرمەيتىنىن اتاپ وتكەن ءجون. وندا نارىقتاعى كاسىبي قاتىسۋشىلاردىڭ ىشكى جانە الەمدىك نارىقتارداعى احۋالدىڭ دامۋى جايىندا تاۋەلسىز پىكىرلەرىنە، باعالاۋلارىنا جانە كۇتۋلەرىنە شولۋ جاسالعان.
بۇعان دەيىن سايتىمىزدا "2025 جىلى يفلياسيا وتكەن جىلدىڭ سوڭىنداعىداي تاعى قارقىن الۋى مۇمكىن بە" دەگەن ماقالا جاريالانعان.Halyk Finance اناليتيكالىق ورتالىعىنىڭ باسشىسى ءمادينا قابجاليالوۆا بۇل زەرتتەۋىندە دە 2025 جىلى ينفلياسيالىق كۇتىلىم 7،5%-دى قۇرايدى دەپ بولجايدى.
